திருநெல்வேலி: திருநெல்வேலி கிழக்கு மாவட்ட காங்கிரஸ் தலைவர் மர்மமான முறையில் உயிரிழந்த நிலையில், கடந்த நான்காம் தேதி அவரது உடல் விவசாய தோட்டத்தின் ஒரு பகுதியில் கண்டெடுக்கப்பட்டது. பாதி எரிந்த நிலையில் கண்டெடுக்கப்பட்ட உடல், திருநெல்வேலி அரசு மருத்துவக் கல்லூரி மருத்துவமனையில் உடற்கூறு பரிசோதனை செய்யப்பட்டது.
உடற்கூறு பரிசோதனையின் முடிவுகள் நேற்று மாலை மாவட்ட காவல்துறை கண்காணிப்பாளர் சிலம்பரசனிடம் இடம் வழங்கப்பட்டுள்ளது. அதில், "ஜெயக்குமாரின் உடலில் அவரது குரல்வளை முற்றிலும் எரிந்து போய் இருந்ததாக கூறப்படுகிறது. அவரது நுரையீரலில் எவ்வித திரவங்களும் இடம்பெறவில்லை. ஏற்கனவே, உயிரிழந்த நபரை எரியூட்டினால் மட்டுமே, குரல்வளை முற்றிலும் எரிந்து போகும் நுரையீரலில் திரவங்கள் ஏதும் இருக்காது என்பது மருத்துவர்களின் தகவல் ஆகும். இதன்மூலம், ஜெயக்குமார் உயிரிழந்த பிறகு அவரது சடலம் தோட்டத்தில் எரியூட்டப்பட்டு இருக்கலாம்" என்பது மருத்துவ அறிக்கை தகவலாக உள்ளது.
இதன் மூலம் அவர் தற்கொலை செய்து கொள்ளவில்லை என்ற முடிவுக்கு காவல்துறை வந்துள்ளதாக தெரிகிறது. கொலை செய்யப்பட்டு இருப்பதற்கான வாய்ப்புகள் உடற்கூறாய்வில் தெரியவந்துள்ளதால், விசாரணையை காவல்துறை தீவிரப்படுத்தி உள்ளது. உடற்கூறு பரிசோதனையின் முடிவுகள் மாவட்ட காவல்துறை கண்காணிப்பாளரிடம் வழங்கப்பட்டு விட்டாலும் இதனை உயர் மருத்துவக் குழுவினர் உறுதிப்படுத்துவதற்காக சென்னைக்கு உடற்கூறு பரிசோதனை அறிக்கை அனுப்பப்பட்டுள்ளது.
ஏற்கனவே ஜெயக்குமார் எழுதியதாக கூறப்படும் கடிதங்களில் காங்கிரஸ் முக்கிய தலைவர்களான கே.வி.தங்கபாலு, தனுஷ்கோடி ஆதித்தன், எம்எல்ஏ ரூபி மனோகரன் மற்றும் தொழிலதிபர்கள் உட்பட 30-க்கும் மேற்பட்ட நபர்களை குறிப்பிட்டு பணம் கொடுக்கல் வாங்கல் தொடர்பாக அவர்களிடம் இருந்து தனக்கு கொலை மிரட்டல் வருவதாக அவர் குறிப்பிட்டு இருந்தார். மேலும், குடும்பத்தில் உள்ள நபர்கள் யாரும் அவர்களை பழிவாங்க வேண்டாம் என குறிப்பிடப்பட்டிருந்தது. எனவே, ஜெயக்குமார் மரணம் தற்கொலையா? கொலையா? என்பது தெரியாமல் போலீசார் கடும் குழப்பத்தில் இருந்தனர்.
அதேபோல், அவரது உடல் இரும்பு கம்பிகளால் கட்டப்பட்டிருந்தால் போலீசருக்கு மேலும் குழப்பம் ஏற்பட்டது. இந்த சூழ்நிலையில் உடற்கூறாய்வு சோதனையில் ஜெயக்குமார் கொலை செய்யப்பட்டிருக்கலாம் என்பது தெரியவருவதால் போலீசார் அடுத்தக்கட்ட விசாரணையை தீவிரப்படுத்தியுள்ளனர்.
குறிப்பாக, ஜெயக்குமார் எழுதியதாக கூறப்படும் கடிதங்களில் இடம் பெற்றுள்ள நபர்களுக்கு சம்மன் அனுப்பப்பட்டு விசாரணை நடைபெற்று வருகிறது. அந்தவகையில், முன்னாள் மத்திய அமைச்சர் தனுஷ்கோடி ஆதித்தனிடம் நேற்று விசாரணை நடைபெற்ற நிலையில் இன்று (மே 7) மனோகரன் மற்றும் கே.வி.தங்கபாலு ஆகியோரிடம் விசாரணை நடைபெற இருப்பதாக தகவல்கள் வெளியாகி உள்ளது.
இதையும் படிங்க: நெல்லை காங்கிரஸ் தலைவர் ஜெயக்குமாரின் கடைசி நிமிடங்கள்.. வெளியான சிசிடிவி காட்சிகள்! - Nellai Congress Leader Jayakumar
