சென்னை: சென்னையில் பெரும்பாக்கம், துரைப்பாக்கம் உள்ளிட்ட இடங்களில் அடிப்படை வசதிகள் ஏற்படுத்தக் கோரிய வழக்கு, தலைமை நீதிபதி டி.கிருஷ்ணகுமார், நீதிபதி பி.பி. பாலாஜி அமர்வில் இன்று (நவ.16) மீண்டும் விசாரணைக்கு வந்தது.
அப்போது, தமிழக டிஜிபி சங்கர் ஜிவால் தரப்பில் தாக்கல் செய்த மனுவில், பள்ளி, கல்லூரி மாணவர்களிடையில் போதைப் பொருளுக்கு எதிராக விழிப்புணர்வை ஏற்படுத்த எடுத்து வரும் நடவடிக்கைகளையும், போதையில்லா தமிழ்நாடு என்ற இணையதளம் சார்ந்த செயலி தொடங்கப்படுவது குறித்தும் விளக்கப்பட்டுள்ளது.
அப்போது குறுக்கிட்ட நீதிபதிகள், “அண்டை மாநிலங்களில் இருந்து கொரியர் மூலமாக, போதைப் பொருட்கள் தமிழ்நாட்டிற்குள் நுழைகிறது. மாவட்டம் மற்றும் தாலுகா அளவில் போதைப் பொருட்கள் சாதாரணமாகக் கிடைக்கிறது. இதனைக் கட்டுபடுத்த மக்களிடையே விழிப்புணர்வு ஏற்படுத்த வேண்டும்,” என சட்ட பணிகள் ஆணையக் குழுவிற்கு உத்தரவிட்டனர்.
இதையும் படிங்க: அரசு ஊழியர்களுக்கு வீடு ஒதுக்க வேண்டும்; தலைமைச் செயலக சங்கம் கோரிக்கை
மேலும், பள்ளி மற்றும் கல்லூரிகளில் இருந்து 100 மீட்டருக்குள் எந்த கடைகளும் அமைக்கக் கூடாது எனவும், போதைப் பொருளைக் கட்டுப்படுத்துவதில் காவல் துறையினரின் நடவடிக்கைகளை மேற்பார்வையிட, போதைப் பொருள் தடுப்பு அலுவலர், சிபிஐ அலுவலர் அடங்கிய சிறப்பு கண்காணிப்புக் குழுவை அமைக்க வேண்டும். தொடர்ந்து, சிறப்பு கண்காணிப்பு குழுவில் இடம்பெற உள்ள அலுவலர்களின் விவரங்களை சீலிட்ட கவரில் தாக்கல் செய்ய வேண்டும்,” என மத்திய, மாநில அரசுகளுக்கு நீதிபதிகள் உத்தரவிட்டு வழக்கு விசாரணையை நவம்பர் 21ஆம் தேதிக்கு தள்ளி வைத்தனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
