மதுரை: உலகப் புகழ் பெற்ற சித்திரை பெருந்திருவிழாவில், மீனாட்சி திருக்கல்யாணம், தேரோட்டம், கள்ளழகர் வைகை ஆற்றில் எழுந்தருளுதல் ஆகியவை முக்கிய திருவிழாக்கள் ஆகும். இந்த விழாக்களைக் காண மதுரையிலிருந்து மட்டுமின்றி அதன் சுற்றுவட்டார மாவட்டங்களிலிருந்தும் லட்சக்கணக்கான பக்தர்கள் சாமி தரிசனம் செய்ய வருகை தருவர்.
அதேபோல், பாதுகாப்பு கருதி ஆயிரக்கணக்கான காவல்துறையினர் பாதுகாப்புப் பணியில் ஈடுபடுத்தப்பட்டிருப்பர். சித்திரை வெயில் உச்சியில் இருக்கும் தருணத்தில், கூட்ட நெரிசலில் பக்தர்கள் சாமி தரிசனம் செய்ய முண்டியடித்துக் கொள்வர். அத்தகைய தருணத்தில் பல பக்தர்கள் மூச்சு விடச் சிரமப்பட்டு மயங்கி விழுவார்கள். உச்சி வெயிலிலும், கூட்ட நெரிசலிலும், காவல்துறையினரும் தங்களது பாதுகாப்புப் பணியைச் சிரமத்துடன் மேற்கொள்வார்கள்.
இவர்கள் அனைவரும் ஆசுவாசப்படும் விதமாக 7 அடி உயர விசிறியைக் கொண்டு சேவகர்கள் விசிறி வீசி வருவார்கள். சுமார் 30க்கும் மேற்பட்டோர் இந்த சேவையைப் பாரம்பரியமாகச் செய்து வருகின்றனர். சமீப காலமாக இவர்களைத் தேர்த் திருவிழாவிலும், வைகை ஆற்றிலும் அனுமதிக்காமல் தடை செய்வதாகப் புகார் கூறி விசிறி சேவா சங்கத்தினர் மாவட்ட ஆட்சியர் அலுவலகத்திலும், காவல்துறை ஆணையர் அலுவலகத்திலும் மனு அளித்தனர்.
இதுகுறித்து, விசிறி சேவா சங்கத்தின் பொருளாளர் முத்து ராமன் கூறுகையில், "நாங்கள் 10 பைசா வாங்காமல் இதைப் பாரம்பரியமாகச் சேவை நோக்குடன் செய்து வருகிறோம். வைகை ஆற்றில் கள்ளழகரை வீரராகவப்பெருமாள் சுற்றி வரும்போது தாங்களும் சுற்றி வருவது பாரம்பரியம். ஆனால், சமீப காலமாக எங்களை ஆற்றுக்குள் அனுமதிக்காமல் அலைக்கழித்து வருகின்றனர்.
கூட்ட நெரிசலில் சிக்கும் குழந்தைகளுக்கும், பெண்களுக்கும், பாதுகாப்புப் பணியில் ஈடுபட்டிருக்கும் காவலர்களுக்கும் தாங்கள் விசிறி வீசுவது மிகப்பெரிய உதவியாக இருக்கும். காவல்துறையினர் சிறிது நேரம் தங்களுக்கும் விசிறி விடச் சொல்வார்கள்.
அதேபோல், கூட்ட நெரிசல்களில் சிக்கி இருக்கும் குழந்தைகளும், பெண்களும் தங்களுக்கு விசிறி விடச் சொல்லிக் கேட்பார்கள். எந்தவிதமான பலனும் எதிர்பார்க்காமல் மீனாட்சி அம்மனுக்கும், அழகு மலையானுக்கும் செய்யும் சேவையாகவே இதைக் காலம் காலமாகச் செய்து வருகிறோம்.
லட்சக்கணக்கான பக்தர்களுக்கு வெறும் 30 பேர் காலம் காலமாக 7 அடி உயர விசிறியைத் தூக்கி சிரமம் பாராமல் சேவை செய்து வருகிறோம். சமீப காலமாக, தங்களுக்கு உரிய அனுமதி வழங்காமல் அலைக்கழிப்பது வருத்தத்தை அளிக்கிறது. எங்களை ஏன் அனுமதிக்க மாட்டீர்கள் எனக் கேட்டதற்கு மீனாட்சி அம்மன் கோயிலுக்குள் ஏசி வந்துவிட்டது. எனவே விசிறி தேவையில்லை எனக் கூறியும், ஆற்றுக்குள் விஐபிகளுக்கு மட்டுமே அனுமதி எனக் கூறியும் எங்களைப் புறக்கணிக்கின்றனர்.
பாரம்பரியமாக விசிறி சேவை செய்து வரும் இந்த கலாச்சாரம் காலப்போக்கில் அழிந்து விடும் என்பதால், இது தொடர்பாகக் கடந்த வருடமும் மனு கொடுத்தோம், இந்த வருடமும் மாவட்ட ஆட்சியரிடமும், காவல்துறையிடமும் மனு அளித்துள்ளோம். எங்களுக்குப் பெரிதாக எந்த அங்கீகாரமும் தேவையில்லை எங்களுக்கு அனைத்து இடத்திலும் சேவை செய்யும் சுதந்திரத்தை முழுதாக கொடுத்தாலே போதும் எனக் கூறினர்.
இதையும் படிங்க: தேர்தல் விடுமுறை: வீட்டில் மது பாட்டில்களை ஸ்டாக் வாங்கி வைத்த நபர் கைது! - Lok Sabha Election 2024
