சென்னை: கோயம்பேடு மார்கெட்டில் கடந்த சில வாரங்களாக தக்காளி மற்றும் வெங்காயத்தின் விலை குறைந்திருந்த நிலையில், கடந்த இரண்டு நாட்களாக கிடுகிடுவென உயர்ந்து ஒரு கிலோ தக்காளி 60 ரூபாய் வரையும், வெங்காயம் ஒரு கிலோ 70 ரூபாய் வரையும் விற்பனை செய்யப்படுகிறது.
விலை உயர்வு ஏன்? தக்காளி, வெங்காயம் விலை குறித்தும் காய்கறிகளின் விலை உயர்வு குறித்தும் கோயம்பேடு காய்கனி, மலர் வியாபார சங்கப் பொருளாளர் சுகுமாறன் கூறுகையில், “கடந்த மூன்று நாட்களாக தக்காளி வரத்து குறைந்துள்ளது. எனவே, தக்காளி விலை நேற்றைக்கு கிலோ 50 ரூபாய்க்கு இருந்த நிலையில், இன்று கிலோ 60 ரூபாய்க்கு விற்பனை செய்யப்படுகிறது. இதற்குக் காரணம், வெளிமாநிலங்களில் அதிக வெயிலால் பயிர்கள் வாடியதில் விளைச்சல் குறைந்துள்ளது. இதனால் தினமும் 100 லாரிகளில் (1,000 டன்) வர வேண்டிய தக்காளி, வெங்காயம் வரத்து, 60 லாரியாக (500 டன்) குறைந்துள்ளது” எனத் தெரிவித்தார்.
பிற மாநிலங்களின் இறக்குமதி: மேலும், சென்னை கோயம்பேடு சந்தைக்கு இந்தியாவின் பல்வேறு மாநிலங்கள் மற்றும் தமிழகத்தின் பல மாவட்டங்களிலிருந்து நாள்தோறும் பலவகையான காய்கறிகள் வருகிறது. மேலும், இந்த மார்கெட்டுக்கு வரும் தக்காளி, வெங்காயம் என்பது தமிழ்நாட்டின் மாவட்டங்களிலிருந்து 5 விழுக்காடு மட்டும் தான் வருகிறது. மீதம் 95 விழுக்காடு மற்ற மாநிலங்களிலிருந்து தான் இறக்குமதியாகிறது. எனவே, வெளி மாநிலங்களில் வெயிலின் தாக்கம் அதிகம் இருப்பதால் தக்காளி மற்றும் வெங்காயத்தின் வரத்து குறைந்துள்ளது. இதேபோல், கோயம்பேடு சந்தைக்கு தினமும் 450-500 வரை காய்கறி வாகனம் வர வேண்டிய நிலையில், தற்போது 350 வாகனங்கள் தான் வருகிறது.
