சென்னை: பெண் காவலர்கள் குறித்து அவதூறாகப் பேசியதாக கைது செய்யப்பட்ட யூடியூபர் சவுக்கு சங்கரை, பொது அமைதிக்கு பங்கம் ஏற்படுத்தும் வகையில் செயல்பட்டதாக கூறி குண்டர் சட்டத்தில் சிறையில் அடைத்து, சென்னை மாநகர காவல்துறை ஆணையர் மே 12ஆம் தேதி உத்தரவு பிறப்பித்தார்.
இந்த உத்தரவை ரத்து செய்து தனது மகனை விடுவிக்க வேண்டும் என்ற கோரிக்கையுடன், சவுக்கு சங்கரின் தாயார் கமலா சென்னை உயர் நீதிமன்றத்தில் ஆட்கொணர்வு மனுவை தாக்கல் செய்துள்ளார். அந்த மனுவில், பொது அமைதிக்கு குந்தகம் விளைவிக்கும் வகையில் தனது மகன் செயல்படவில்லை என்றும், சட்டப்படியான நடைமுறைகளை பின்பற்றாமல் தனது மகனை குண்டர் சட்டத்தில் சிறையில் அடைத்த உத்தரவு சட்டவிரோதமானது என்பதால் அதை ரத்து செய்ய வேண்டும் என்றும் மனுவில் கோரிக்கை விடுத்துள்ளார்.
இந்த மனுவை விசாரித்த நீதிபதிகள் சுவாமிநாதன் மற்றும் பாலாஜி அமர்வு, எதிர்காலத்தில் எப்படி நடந்து கொள்வார்? என்னவெல்லாம் செய்ய மாட்டார்? என உத்தரவாதம் அளிக்க நேற்று (மே 23) உத்தரவிட்டனர். இந்நிலையில், இந்த வழக்கு இன்று மீண்டும் விசாரணைக்கு வந்தது.
அப்போது, அரசுத் தரப்பில், சவுக்கு சங்கர் மீது சட்டத்திற்கு உட்பட்டு குண்டர் சட்டம் போடப்பட்டது. அதிகார துஷ்பிரயோகம் செய்யப்படவில்லை என தெரிவிக்கப்பட்டது. இதையடுத்து, சவுக்கு சங்கர் சிறையில் தாக்கப்பட்டது குறித்து தேசிய மனித உரிமைகள் ஆணையம் விசாரணை நடத்த உத்தரவிட்ட நீதிபதிகள், விசாரணையை 4 மாதத்தில் சட்டத்திற்கு உட்பட்டு நடத்தி முடிக்கவும் உத்தரவிட்டனர்.
தொடர்ந்து நடைபெற்ற விசாரணையில், குண்டர் சட்டம் போடப்படுவதற்கு முன், அதாவது மே 12ஆம் தேதிக்கு முன் எத்தனை வழக்குகள் சவுக்கு சங்கர் மீது பதிவு செய்யப்பட்டது என நீதிபதிகள் கேள்வி எழுப்பினர். அதற்கு அரசுத் தரப்பில் 5 வழக்குகள் பதிவு செய்யப்பட்டதால் குண்டர் சட்டம் போடப்பட்டது என தெரிவிக்கப்பட்டது.
இதையடுத்து, மே 11 வரை 5 வழக்குகள் பதிவு செய்யப்பட்டதில், ஒரு வழக்கில் மட்டுமே கைது காட்டப்பட்டுள்ளது. மற்ற 4 வழக்குகளில் ஏன் கைது செய்யப்படவில்லை என கேள்வி எழுப்பினர். மேலும், சவுக்கு சங்கர் மீது குண்டர் சட்டத்தை சென்னை காவல்துறை ஆணையர் உரிய விசாரணைக்குப் பின் பதிவு செய்தாரா என்பது கேள்விக்குறியாக உள்ளது.
இதற்கு அரசுத் தரப்பில், சவுக்கு சங்கர் யூடியூபர் என்ற பெயரில் நீதித்துறை, காவல்துறை, வழக்கறிஞர் மற்றும் அரசுத் துறைகள் என அனைத்து துறைகளையும் தரக்குறைவாக பேசியுள்ளார். கடந்த ஒரு வருடமாக அவதூறு கருத்துக்களை பரப்பிய போதும், அரசு நடவடிக்கை எடுக்காமல் அமைதியாக இருந்தது.
பெண் காவலர்கள் குறித்து அவதூறாகப் பேசியதால் தான் வழக்குப்பதிவு செய்து கைது நடவடிக்கை எடுக்கப்பட்டது. பத்திரிகையாளர் என்பவர் மக்களுக்கான செய்திகளை உண்மையாக, ஒழுக்கமாக கொடுப்பவராக மட்டுமே இருக்க வேண்டும். ஒழுக்கம் தவறினால் அவர் பத்திரிகையாளராக இருக்க முடியாது என தெரிவிக்கப்பட்டது.
இதையடுத்து நீதிபதிகள், சவுக்கு சங்கரை வேறு சிறைக்கு மாற்ற வேண்டும் என்ற கோரிக்கை முடித்து வைக்கப்படுகிறது. நேற்று (மே 23) விசாரணைக்காக புழல் சிறையில் அடைக்கப்பட்டுள்ளதால், தொடர்ந்து புழல் சிறையிலேயே இருக்க சிறைத்துறைக்கு அறிவுறுத்த அரசுக்கு உத்தரவிட்டு தீர்ப்பை பிற்பகல் தள்ளிவைத்தனர்.
இதனையடுத்து, இன்று பிற்பகல் தீர்ப்பு வழங்கிய நீதிபதிகிளில், குண்டர் சட்டர் ரத்து செய்யப்படுவதற்கான அனைத்து முகாந்திரங்களும் உள்ளது. அதனால் சவுக்கு சங்கர் மீதான குண்டர் சட்டத்தை ரத்து செய்து நீதிபதி சுவாமிநாதன் தீர்ப்பளித்தார். பின்னர் தீர்ப்பளித்த நீதிபதி பாலாஜி, காவல்துறையின் விளக்கத்தைக் கேட்க வேண்டி இருப்பதால், குண்டர் சட்டத்தை ரத்து செய்ய முடியாது என தீர்ப்பளித்தார்.
இவ்வாறான நீதிபதிகளின் மாறுபட்ட தீர்ப்பால், மூன்றாவது நீதிபதியின் விசாரணைக்காக வழக்கு தலைமை நீதிபதிக்கு பரிந்துரை செய்யப்பட்டுள்ளது.
இதையும் படிங்க: யூடியூபர் சவுக்கு சங்கர் மீது திருச்சி சூர்யா சிவா பரபரப்பு புகார்! - Trichy Surya Siva
