சென்னை: விளவங்கோடு சட்டப்பேரவை இடைத்தேர்தலில் வெற்றி பெற்ற தாரகை கத்பட், சட்டப்பேரவை உறுப்பினராக இன்று பதவியேற்றுக் கொண்டார். தலைமைச் செயலகத்தில் தமிழக முதலமைச்சர் மு.க.ஸ்டாலின் முன்னிலையில் சட்டப்பேரவைத் தலைவர் அப்பாவு, தாரகை கத்பட்-க்கு பதவிப் பிரமாணம் செய்து வைத்தார்.
பின்னர் செய்தியாளர்களைச் சந்தித்த தமிழக காங்கிரஸ் கமிட்டி தலைவர் செல்வப்பெருந்தகை, “41 ஆயிரம் வாக்குகள் வித்தியாசத்தில் விளவங்கோடு சட்டமன்ற உறுப்பினர் தாரகை கத்பட் வெற்றி பெற்றுள்ளார். வெற்றி பெற காரணமாக இருந்த முதலமைச்சர் மு.க.ஸ்டாலின் மற்றும் காங்கிரஸ் பேரியக்கம் தனது நன்றியை தெரிவித்துக் கொள்கிறது. திமுக வேட்பாளர்களை விட கூட்டணிக் கட்சி வேட்பாளர்கள் வெற்றி பெற வேண்டும் என்று அவர் எடுத்த நடவடிக்கைகளையும், முக்கியத்துவங்களையும் அனைவரும் அறிவோம்.
அதேபோல், விடுதலை சிறுத்தைகள், மதிமுக, இந்திய யூனியன் முஸ்லீம் லீக், கம்யூனிஸ்ட் கட்சிகள் உள்ளிட்ட தோழமைக் கட்சிகள் அனைவருக்கும் நன்றி. இந்த தேர்தல் தமிழ்நாட்டில் மிகப்பெரிய செய்தியை தெரிவிக்கிறது. முதலமைச்சரின் மூன்று ஆண்டுகள் ஆட்சிக்கு இந்த தேர்தல் வெற்றி பதில் சொல்லி உள்ளது. மக்களைத் தேடி மருத்துவம், காலை உணவுத் திட்டம், எண்ணும் எழுத்தும் திட்டம் உள்ளிட்ட பல திட்டங்கள் இவற்றை அங்கீகரிக்கும் வகையில் இந்தியாவில் எங்கும் இல்லாத வெற்றியை மக்கள் கொடுத்திருக்கிறார்கள்” என்றார்.
இதைத் தொடர்ந்து செய்தியாளர்களுக்கு பேட்டியளித்த விளவங்கோடு சட்டமன்ற உறுப்பினர் தாரகை கத்பட், “இன்று விளவங்கோடு சட்டமன்ற உறுப்பினராக சட்டப்பேரவைத் தலைவர் முன்பு பதவி ஏற்றுக் கொண்டுள்ளேன். காங்கிரஸ் கமிட்டியில் பெண்களுக்கு அதிக முக்கியத்துவம் கொடுப்பதற்கு சாட்சியாக விளவங்கோடு சட்டமன்றத் தொகுதியில் போட்டியிட்டு அதிக வாக்கு வித்தியாசத்தில் வெற்றி பெற்றுள்ளேன். திமுக மற்றும் கூட்டணிக் கட்சியினர் உறுதுணையாக இருந்தனர்.
இந்த தேர்தலில் அதிகப்படியான வாக்கு வித்தியாசத்தில் வெற்றி பெற வைத்துள்ளதற்கு நன்றி. முதலமைச்சருக்கு இந்த தருணத்தில் முக்கியமாக நன்றி செலுத்த கடமைப்பட்டுள்ளேன். காங்கிரஸ் கமிட்டி என்னை வேட்பாளராக அறிவித்தாலும், திருநெல்வேலியில் நடைபெற்ற கூட்டத்தில் தான் என்னை அறிமுகம் செய்தனர். அப்போது முதலமைச்சர் மு.க.ஸ்டாலின், அவர் நிற்பதாக நினைத்து வாக்களியுங்கள் என்று கூட்டத்தில் பேசினார். வரலாற்று ரீதியான வெற்றியாக மக்கள் இந்த தேர்தலில் கொடுத்துள்ளார்கள்.
எனக்கு இருக்கும் இரண்டு வருடங்களில் மக்களுக்குத் தேவையானதை செய்வேன். முதலில் காமராஜர் ஆட்சியில் கொண்டு வந்த கோதையாறு அணையில் மின்சாரம் உற்பத்தி செய்வதில் இரண்டு யூனிட்டில் ஒன்று செயல் இழந்துள்ளது. முதலில் அதை சரி செய்ய வேண்டும். இந்த தொகுதியில் சாலைகள் மிகவும் மோசமாக உள்ளது. மக்களின் பிரதான தேவையாக உள்ள சாலை, குடிநீர் உள்ளிட்டவற்றை முதலில் கவனம் செலுத்தி சரி செய்ய வேண்டும்.
கடந்த சட்டமன்ற வேட்பாளர் என்ன செய்யவில்லை என்பது முக்கியமில்லை. தமிழகத்தில் காங்கிரஸ் கட்சிக்கு ஒன்பது நாடாளுமன்றத் தொகுதிகள் தான் ஒதுக்கப்பட்டன. அதில் இரண்டு, பெண்களுக்கு ஒதுக்கீடு கொடுக்கப்பட்டுள்ளது. காங்கிரஸ் பெண்களுக்கு முக்கியத்துவம் கொடுக்கும் கட்சி தான்” என்றார்.
இதையும் படிங்க: 'இந்தியா கூட்டணி அமைய ராகுல் காந்தியின் அணுகுமுறை துணையாக இருந்தது' - தமிழக காங்கிரஸ்! - tn Congress general committee
