தென்காசி: தென்காசி மாவட்டம் சங்கரன்கோவிலில் உள்ள சங்கரநாராயணன் சாமி கோயிலில் கோமதி யானை உள்ளது. இந்த யானை, சங்கர கோமதியம்மன் கோயிலில் நடைபெறும் சிறப்பு பூஜைகள் மற்றும் முக்கிய திருவிழாக்களின் போது, ஊர்வலங்களில் கலந்து கொண்டு பக்தர்களுக்கு ஆசி வழங்குவது வழக்கம்.
கடந்த 1997-ஆம் ஆண்டு, தொழிலதிபர் சி.பா.சிவந்தி ஆதித்தனார் இந்த யானையைக் கோயிலுக்கு வழங்கினார். பக்தர்களால் கோமதி என்று செல்லமாக பெயரிடப்பட்ட இந்த யானை நல்ல முறையில் பராமரிக்கப்பட்டு வருவதாக கோயில் நிர்வாகத்தினர் தெரிவிக்கின்றனர். இந்த கோமதி யானைக்கு கடந்தாண்டு அக்டோபர் 16ஆம் தேதி அன்று 31வது பிறந்தநாள் கொண்டாடப்பட்டது.
பல ஆண்டுகளாக கோயில் நிர்வாகத்தால் பாதுகாக்கப்பட்டு வரும் இந்த கோமதி யானைக்கு, கோடை காலம் நெருங்கி வருவதால் நீச்சல் குளம் கட்ட வேண்டும் என பக்தர்கள் பலரும் கோரிக்கை வைத்தனர். இதனையடுத்து, சங்கரன்கோவில் சட்டமன்ற உறுப்பினர் ராஜா, தொகுதி மேம்பாட்டு நிதியில் இருந்து 25 லட்சம் ரூபாய் மதிப்பீட்டில் நீச்சல் குளம் அமைக்கப்படும் என உறுதியளித்தார்.
இதனையடுத்து, சங்கரன்கோவிலில் இருந்து சுரண்டை செல்லும் சாலையில் அமைந்துள்ள நந்தவனத்தில் நீச்சல் குளம் அமைப்பதற்கான இடம் தேர்வு செய்யப்பட்டு, அதற்கான பணிகள் நடைபெற்று வந்தன. இந்த நீச்சல் குளம் பணியை முழுமையாக நிறைவடைந்து, நேற்று (மார்ச் 16) திறப்பு விழா நடைபெற்றது. இதில் சட்டமன்ற உறுப்பினர் ராஜா கலந்து கொண்டு, யானைக்கு கட்டப்பட்ட நீச்சல் குளத்தை திறந்து வைத்தார்.
பின்ன,ர் கோமதி யானை நிலவும் உச்சி வெயிலில் குழந்தை போல் நீச்சல் குளத்தில் அங்கும், இங்குமாக புரண்டு உற்சாக குளியல் போட்டது. இந்த நிகழ்வின போது கோயில் நிர்வாகிகள், பக்தர்கள், அரசியல் கட்சி நிர்வாகிகள் மற்றும் பொதுமக்கள் என பலரும் நீச்சல் குள திறப்பு விழாவில் கலந்து கொண்டு, கோமதி யானை உற்சாக குளியல் போட்டதைக் கண்டு ரசித்தனர்.
இதையும் படிங்க: தேர்தல் நடத்தை விதிமுறைகள் என்றால் என்ன? இந்தியா முழுவதும் இன்று முதல் அமலாகும் கட்டுப்பாடுகள்!
