மதுரை: தென்காசி மாவட்டம் செங்கோட்டையில் இருந்து சங்கரன்கோவில் வழியாக சென்னை தாம்பரத்திற்கு சிலம்பு எக்ஸ்பிரஸ் ரயில் இயக்கப்படுகிறது. வாரத்திற்கு 3 முறை 17 பெட்டிகளுடன் இயக்கப்படும் இந்த ரயிலில் கூடுதல் பெட்டிகளை இணைக்க வேண்டும் என ரயில் பயணிகள் கோரிக்கை விடுத்து வந்தனர். அந்த வகையில், சிலம்பம் விரைவு ரயிலில் கூடுதலாக 6 பெட்டிகள் இணைக்கப்படுவதாகத் தென்னக ரயில்வே அறிவித்துள்ளது. இந்த அறிவிப்பு தென் தமிழக ரயில் பயணிகள் மத்தியில் வரவேற்பைப் பெற்றுள்ளது.
இதுதொடர்பாக தென்னக ரயில்வே மதுரை கோட்டகம் வெளியிட்டுள்ள அறிக்கையில், "பண்டிகை கால விடுமுறை மற்றும் கூட்ட நெரிசலை சமாளிக்க பயணிகளின் வசதிக்காக, செங்கோட்டை - தாம்பரம் - செங்கோட்டை சிலம்பு எக்ஸ்பிரஸ் ரயில் (வண்டி எண்: 20681/20682) இயக்கப்படுகிறது. தற்போது இந்த ரயிலில் கூடுதலாக 6 ரயில் பெட்டிகள் இணைக்கப்பட உள்ளன.
கூடுதலாக 6 பெட்டிகள் இணைப்பு: அதன்படி இந்த ரயில்களில் நவம்பர் 27ஆம் தேதி முதல் ஜனவரி 30ஆம் தேதி வரை கூடுதலாக ஒரு குளிர்சாதன இரண்டடுக்கு படுக்கை வசதி பெட்டியும், 2 குளிர்சாதன மூன்றடுக்கு படுக்கை வசதி பெட்டியும், 2 இரண்டாம் வகுப்பு தூங்கு வசதி பெட்டியும், ஒரு இரண்டாம் வகுப்பு பொதுப்பெட்டியும் இணைக்கப்பட உள்ளன.
தற்போது இந்த ரயில்களில் ஒரு குளிர்சாதன முதல் வகுப்புப் பெட்டி, ஒரு குளிர்சாதன இரண்டடுக்கு படுக்கை வசதி பெட்டி, 2 குளிர்சாதன மூன்றடுக்கு படுக்கை வசதி பெட்டிகள், 8 இரண்டாம் வகுப்பு தூங்கு வசதி பெட்டிகள், 3 இரண்டாம் வகுப்பு பொதுப்பெட்டிகள், 2 மாற்றுத்திறனாளிகளுக்கான பெட்டிகள் என மொத்தமாக 17 பெட்டிகளுடன் இயங்கி வருகிறது. கூடுதலாக 6 பெட்டிகள் இணைக்கப்படுவதால், மொத்தம் 23 பெட்டிகளுடன் நவ.27ஆம் தேதி முதல் இயங்க இருக்கிறது.
இதையும் படிங்க: சென்னை - செங்கல்பட்டு ரயில்கள் ரத்து: கூடுதல் பேருந்துகள் இயக்கம் - போக்குவரத்துக் கழகம்!
அதேபோல, நவம்பர் 27ஆம் தேதி முதல் ஜனவரி 30ஆம் தேதி வரை தாம்பரம் - நாகர்கோவில் - தாம்பரம் மும்முறை சேவை எக்ஸ்பிரஸ் ரயில்களிலும் (22657/22658) கூடுதலாக 6 பெட்டிகள் இணைக்கப்பட்டு மொத்தம் 23 பெட்டிகளுடன் இயக்கப்படும்" என தெற்கு ரயில்வே அறிவித்துள்ளது. இந்த சேவையால், கூடுதலாக 500 பேர் வரை பயணிக்க முடியும் என்பதால், ரயில் பயணிகள் மகிழ்ச்சி அடைந்துள்ளனர்.
ஈடிவி பாரத் வாட்ஸ்ஆப் சேனலில் இணைய இங்கே கிளிக் செய்யவும்
