சென்னை: இயக்குநர் எஸ்.யு.அருண்குமார் இயக்கத்தில், நடிகர் விக்ரம் நடித்து வரும் புதிய திரைப்படம் 'வீர தீர சூரன்'. ரியா ஷிபு இந்த படத்தைத் தயாரிக்கிறார். இந்த படத்திற்கு இசையமைப்பாளர் ஜி.வி.பிரகாஷ் குமார் இசையமைக்கிறார். சமீபத்தில், வீர தீர சூரன் படத்தின் டைட்டில் டீசர் மற்றும் படத்தின் போஸ்டர்கள் வெளியானது.
இதில் நடிகர் விக்ரம் இரண்டு கையிலும் அரிவாளுடன் இருப்பது போன்ற போஸ்டர்கள் வெளியாகின. இந்நிலையில், விக்ரம் இளைஞர்கள் மத்தியில் தவறான எண்ணத்தைக் கொண்டு செல்வதாகவும், இதனால் அவர் மீது தக்க நடவடிக்கை எடுக்க வேண்டும் எனவும் சமூக ஆர்வலர் ஆர்.டி.ஐ.செல்வம் ஆன்லைன் மூலமாக சென்னை காவல் ஆணையருக்கு புகார் அளித்துள்ளார்.
அந்தப் புகாரில், "சமூக வலைத்தளத்தில் தவறான எண்ணத்தைக் கொண்டு செல்லும் வகையில் புகைப்படங்கள் மற்றும் வீடியோக்களைப் பகிரும் இளைஞர்கள் மீது காவல்துறை நடவடிக்கை எடுத்து வருகிறது. இதனை வரவேற்கின்றோம்.
அதேபோல், நடிகர் விக்ரம் இளைஞர்கள் மத்தியில் தவறான எண்ணத்தைக் கொண்டு செல்லும் வகையில், அரிவாளுடன் புகைப்படங்கள் வெளியிட்டு உள்ளதால், விக்ரம் மீதும், படக் குழுவினர் மீதும் தக்க நடவடிக்கை எடுக்க வேண்டும் எனக் குறிப்பிட்டுள்ளார்.
இதையும் படிங்க: “கிலோ பருத்தி ரூ.100-க்கு கொள்முதல் செய்க”.. திருவாரூர் விவசாயிகள் கோரிக்கை! - Cotton Purchase In Thiruvarur
