சென்னை: மதுரை வழியாக இயக்கப்படும் நாகர்கோவில்- கச்சிகுடா, மதுரையில் இருந்து இயக்கப்படும் மதுரை-கச்சிகுடா, ராமநாதபுரத்தில் இருந்து இயக்கப்படும் ராமநாதபுரம் - செகந்திராபாத் ரயில்களின் சேவை நீட்டிக்கப்பட்டுள்ளதாக தெற்கு ரயில்வே அறிவித்துள்ளது.
நாகர்கோவில் - கச்சிகுடா ரயில் சேவை:
தெலுங்கானா மாநிலத்தில் உள்ள கச்சிகுடா - நாகர்கோவில் இடையே இயக்கப்படும் வாராந்திர சிறப்பு ரயில் சேவை, டிசம்பர் மாதம் வரை இயக்கப்படும் என ஏற்கனவே அறிவிக்கப்பட்டிருந்தது. தற்போது இந்த ரயில் சேவை மேலும் மூன்று மாதங்களுக்கு நீட்டிப்பு செய்யப்பட்டுள்ளது. ரயில்வே வெளியிட்டுள்ள அறிவிப்பின்படி, கச்சிகுடாவில் இருந்து ஜனவரி 3 முதல் மார்ச் 28 வரை வெள்ளிக்கிழமைகளில் இரவு 07.45 மணிக்கு புறப்பட்டு சனிக் கிழமைகளில் இரவு 10.30 மணிக்கு நாகர்கோவில் வந்து சேரும்.
மறு மார்க்கத்தில் நாகர்கோவிலில்இருந்து ஜனவரி 5 முதல் மார்ச் 30 வரை ஞாயிற்றுக் கிழமைகளில் அதிகாலை 12.30 மணிக்கு புறப்பட்டு திங்கட் கிழமைகளில் காலை 06.30 மணிக்கு கச்சிகுடா சென்று சேரும். இந்த ரயில்களில் ஒரு குளிர்சாதன முதல் வகுப்பு பெட்டி, 2 குளிர்சாதன இரண்டடுக்கு படுக்கை வசதி பெட்டிகள், 4 குளிர்சாதன மூன்றடுக்கு படுக்கை வசதி பெட்டிகள், 9 இரண்டாம் வகுப்பு படுக்கை வசதி பெட்டிகள், 3 இரண்டாம் வகுப்பு பொதுப் பெட்டிகள் மற்றும் 2 இரண்டாம் வகுப்பு மாற்றுத்திறனாளிகளுக்கான பெட்டிகள் ஆகியவை இணைக்கப்படும். இந்த ரயில்களுக்கான பயணச்சீட்டு முன்பதிவு தற்போது நடைபெற்று வருகிறது என தெரிவிக்கப்பட்டுள்ளது.
மதுரை - கச்சிகுடா ரயில் சேவை:
ஹைதராபாத் கச்சிகுடா - மதுரை வாராந்திர சிறப்பு ரயில் சேவை டிசம்பர் மாதம் வரை இயக்கப்படும் என ஏற்கனவே அறிவிக்கப்பட்டிருந்தது. தற்போது இந்த ரயில் சேவை மேலும் மூன்று மாதங்களுக்கு நீட்டிப்பு செய்யப்படுகிறது. அதன்படி, கச்சிகுடா வில் இருந்து ஜனவரி 6 முதல் மார்ச் 31 வரை திங்கட் கிழமைகளில் இரவு 8.50 மணிக்கு புறப்பட்டு செவ்வாய்க் கிழமைகளில் இரவு 8.45 மணிக்கு மதுரை வந்து சேரும். மறு மார்க்கத்தில் மதுரையிலிருந்து ஜனவரி 8 முதல் பிப்ரவரி 2 வரை புதன் கிழமைகளில் அதிகாலை 5.30 மணிக்கு புறப்பட்டு வியாழக் கிழமைகளில் காலை 7.05 மணிக்கு கச்சிகுடா சென்று சேரும்.
இந்த ரயில்களில் ஒரு குளிர்சாதன முதல் வகுப்பு பெட்டி, 2 குளிர் சாதன இரண்டடுக்கு படுக்கை வசதி பெட்டிகள், 6 குளிர் சாதன மூன்றடுக்கு படுக்கை வசதி பெட்டிகள், 7 இரண்டாம் வகுப்பு படுக்கை வசதி பெட்டிகள், 2 இரண்டாம் வகுப்பு பொதுப் பெட்டிகள், ஒரு இரண்டாம் வகுப்பு மாற்றுத்திறனாளிகளுக்கான பெட்டி மற்றும் ஒரு சரக்கு பெட்டியுடன் கூடிய ரயில் மேலாளர் பெட்டி ஆகியவை இணைக்கப்படும். இந்த ரயில்களுக்கான பயணச்சீட்டு முன்பதிவு தற்போது நடைபெற்று வருகிறது என தெரிவிக்கப்பட்டுள்ளது.
செகந்திராபாத் - ராமநாதபுரம் ரயில் சேவை:
செகந்திராபாத் - ராமநாதபுரம் - செகந்திராபாத் சிறப்பு விரைவு ரயில்களின் சேவையை மேலும் மூன்று மாத காலத்திற்கு நீட்டித்து தென் மத்திய ரயில்வே அறிவிப்பு வெளியிட்டுள்ளது. அதன்படி, செகந்திராபாத் - ராமநாதபுரம் சிறப்பு ரயில் (07695) ஜனவரி 1, 8, 15, 22, 29, பிப்ரவரி 5, 12, 19, 26, மார்ச் 5, 12, 19, 26 ஆகிய புதன் கிழமைகளில் செகந்திராபாத்தில் இருந்து இரவு 9.10 மணிக்கு புறப்பட்டு மறுநாள் இரவு 11.45 மணிக்கு ராமநாதபுரம் வந்து சேரும்.
மறு மார்க்கத்தில் ராமநாதபுரம் - செகந்திராபாத் சிறப்பு ரயில் (07696) ஜனவரி 03, 10, 17, 24, 31, பிப்ரவரி 07, 14, 21, 28, மார்ச் 07, 14, 21, 28 ஆகிய வெள்ளிக் கிழமைகளில் ராமநாதபுரத்தில் இருந்து காலை 9.50 மணிக்கு புறப்பட்டு மறுநாள் மதியம் 12.50 மணிக்கு செகந்திராபாத் சென்று சேரும். இந்த ரயில்கள் நலகொண்டா, மிரியால் குடா, சட்டெனப்பள்ளி, குண்டூர், தெனாலி, பாபட்லா, ஓங்கோல், காவாலி, நெல்லூர், கூடூர், சென்னை எழும்பூர், செங்கல்பட்டு, விழுப்புரம், திருப்பாதிரிப்புலியூர், சிதம்பரம், சீர்காழி, மயிலாடுதுறை, திருவாரூர், திருத்துறைப்பூண்டி, அதிராம்பட்டினம், பட்டுக்கோட்டை, அறந்தாங்கி, காரைக்குடி, சிவகங்கை, மானாமதுரை ஆகிய ரயில் நிலையங்களில் நின்று செல்லும். இந்த ரயில்களுக்கான பயண சீட்டு முன்பதிவு தற்போது நடைபெற்று வருகிறது என தெரிவிக்கப்பட்டுள்ளது.
