தூத்துக்குடி: நாடாளுமன்றத் தேர்தல் தேதி குறித்த அறிவிப்பு அடுத்த மாதம் முதல் வாரத்தில் வெளியாகும் என்று எதிர்பார்க்கப்பட்டு வரும் நிலையில், தற்போது நாடாளுமன்றத் தேர்தல் முன்னேற்பாடுகளுக்கான பணிகளை அரசியல் கட்சிகள் துவக்கி உள்ளனர்.
இந்த நிலையில் இந்திய பிரதமர் நரேந்திர மோடி வரும் 27ஆம் தேதி கோவை மாவட்டம், பல்லடத்தில் நடைபெறும் பாஜக மாநில தலைவர் அண்ணாமலையின் 'என் மண் என் மக்கள்' நடைபயன நிறைவு விழாவில் பிரதமர் மோடி பங்கேற்கிறார். தமிழகத்தில் பாஜக செல்வாக்கு பெற்ற மாவட்டம் என பெயர் பெற்ற கோவை மாவட்டத்தில் பிரதமரின் தேர்தல் பிரச்சாரக் கூட்டமாக இது அமையும் வகையில் ஏற்பாடு செய்யப்பட்டு வருகிறது.
இதனைத் தொடர்ந்து 28ஆம் தேதி பிரதமர் மோடி கோவையிலிருந்து ஹெலிகாப்டர் மூலம் தூத்துக்குடி துறைமுக பள்ளி வளாகத்தில் காலை 11 மணியளவில் பிரதமர் வந்து இறங்குகிறார். பின், அங்கிருந்து கார் மூலம் விழா நடக்கும் இடத்திற்கு செல்கிறார்.
இந்நிலையில் பாஜக அமைப்பு பொதுச்செயலாளர் கேசவவிநாயகம் தூத்துக்குடியில் நடக்கும் பல்வேறு இடங்களை பார்வையிடுகிறார். பிரதமர் வருகை குறித்து கட்சி நிர்வாகிகளுடன் ஆலோசனை நடத்துகிறார். பிரதமர் மோடி தூத்துக்குடி துறைமுகப் பகுதியில் நடக்கும் அரசு விழாவில் பங்கேற்கிறார். இதனைத்தொடர்ந்து தூத்துக்குடி வெளித் துறைமுக விரிவாக்கத்திற்கான திட்டத்திற்கும் பிரதமர் மோடி அடிக்கல் நாட்டுகிறார்.
அதன்பின், குலசேகரப்பட்டினம் ராக்கெட் ஏவு தளத்திற்கு அடிக்கல் நாட்டுகிறார். இதற்காக 2,233 ஏக்கர் நிலம் கையகப்படுத்தி தயார் நிலையில் உள்ளது. பின்னர், 580 கோடி ரூபாய் செலவில் ராமேஸ்வரம் பாம்பன் கடலின் நடுவே கட்டப்பட்டுள்ள புதிய ரயில்வே தூக்கு பாலத்தை பிரதமர் மோடி துவக்கி வைத்து நாட்டுக்காக அர்ப்பணிக்கிறார்.
இதையும் படிங்க: ஆருத்ரா நிறுவன இயக்குநர் ரூசோவின் ஜாமீன் ரத்து - சென்னை உயர் நீதிமன்றம் உத்தரவு!
