சென்னை: பெரம்பூர் பகுதியில் கடந்த 5-ஆம் தேதி பகுஜன் சமாஜ் கட்சி மாநில தலைவர் ஆம்ஸ்ட்ராங் 6 பேர் கொண்ட கும்பலால் கொடூரமாக படுகொலை செய்தனர். இந்த வழக்கில், முதற்கட்டமாக 11 பேர் கைது செய்யப்பட்டனர். இந்த 11 பேரில் திருவேங்கடம் என்பவர் தான் பதுக்கி வைத்த ஆயுதங்களை எடுப்பதற்காக காவல்துறையினர் அழைத்துச் சென்ற போது, போலீசாரை தாக்க முயன்றதாக கூறப்படும் நிலையில் தற்காப்புக்காக சுட்டதில் திருவேங்கடம் உயிரிழந்ததாக போலீசார் தெரிவித்துள்ளனர்.
இதையடுத்து கைது செய்யப்பட்டவர்களிடம் விசாரணை மேற்கொண்டதில், வழக்கறிஞர் மலர்கொடி வங்கி கணக்கில் பணப்பரிமாற்றம் நடந்துள்ளது தெரியவந்தது. இந்நிலையில், ஆம்ஸ்ட்ராங் கொலையில் உதவியதாக மலர்கொடி, ஹரிஹரன், சதீஷ் ஆகியோரை காவல்துறையினர் நேற்று முன்தினம் கைது செய்தனர். இந்த வழக்கில் இதுவரை 14 நபர்களை போலீசார் கைது செய்துள்ளனர்.
மேலும், ஆம்ஸ்ட்ராங் கொலையில் தொடர்புடையதாக கூறப்படும் பாஜக மகளிர் அணி நிர்வாகி அஞ்சலை என்பவரை பிடிக்க காவல் துறையினர் தீவிரமாக தேடி வருகின்றனர். அதோடு, கைது செய்யப்பட்ட ஹரிஹரன் கொடுத்த தகவலின் பேரில் சம்போ செந்திலையும் காவல்துறையினர் வலைவீசி தேடி வருகின்றனர்.
செந்தில் கொடுத்த பணத்தில் ஹரிஹரன் மூலமாக 4 லட்சம் பணம் அருளுக்கு கைமாறியுள்ளதாக தெரிகிறது. அப்பணம் மலர்கொடி உள்ளிட்ட ஆம்ஸ்ட்ராங் கொலை வழக்கில் தொடர்புடைய வங்கி கணக்கில் போடப்பட்டுள்ளது விசாரணையில் தெரியவந்துள்ளது.
இந்தநிலையில் ஆம்ஸ்ட்ராங் கொலையில் தேடப்படும் பிரபல ரவுடி சம்போ செந்தில் நேபாளம் தப்பிச் சென்றிருப்பதாக தகவல் வெளியாகி உள்ளது. ஆம்ஸ்ட்ராங் கொலைக்கு முக்கியமாக ஸ்கெட்ச் போட்டு கொடுத்தது சம்போ செந்திலும் ஒருவர் என போலீசார் விசாரணையில் தெரிய வந்துள்ளது. 4 கொலை உள்ளிட்ட பல வழக்குகளில் தொடர்புடைய சம்போ செந்தில் கடந்த ஆறாண்டுகளுக்கு மேலாக காவல்துறையால் கைது செய்யப்படவில்லை எனவும் கூறப்படுகிறது.
சம்போ செந்தில், நேபாளம், இலங்கை, சிங்கப்பூர் உள்ளிட்ட வெளிநாடுகளில் தான் அதிக அளவில் இருப்பதை வழக்கமாக கொண்டுள்ளார். எனவே வெளிநாடுகளில் இருந்து கொலைக்கு திட்டமிட்டாரா எனவும், செந்தில் குறித்து தனிப்படை போலீசார் தொடர்ந்து தீவிர விசாரணை செய்து வருகின்றனர்.
இதையும் படிங்க: "டிமாண்ட் அதிகமானதால் களத்தில் இறங்கினோம்" - டோபாக்கோ கடத்திய பெண்கள் பகீர் வாக்குமூலம்!
