திருநெல்வேலி : நெல்லை மாவட்டம், திருநெல்வேலி - தென்காசி சாலையில் ராணி அண்ணா அரசு மகளிர் கலை மற்றும் அறிவியல் கல்லூரி அமைந்துள்ளது. இங்கு திருநெல்வேலி மற்றும் தென்காசி மாவட்டத்திலிருந்து ஏராளமான மாணவிகள் பயில்கின்றனர்.
இந்தக் கல்லூரியில் கடந்த ஆகஸ்ட் 19ஆம் தேதி இளங்கலை வணிகவியல் பாடப் பிரிவுக்கான வகுப்பறையில் ரத்தக் கறைகள் சிந்தி கிடந்ததைக் கண்டு மாணவிகள் அதிர்ச்சியடைந்தனர். உடனடியாக அலுவலகத்திற்குச் சென்று ஆசிரியர்களிடம் தகவலை தெரிவித்தனர்.
அதன்படி, கல்லூரி நிர்வாகம் சார்பில், பேட்டை காவல் நிலையத்திற்கு தகவல் தெரிவிக்கப்பட்டது. இத்தகவலறிந்து வந்த போலீசார், சம்பவ இடத்திலிருந்து தடயங்களைச் சேகரித்தனர். குறிப்பாக, வகுப்பறையில் சிந்திக் கிடந்த ரத்த மாதிரிகள் சேகரிக்கப்பட்டு, பரிசோதனைக்காக மதுரைக்கு அனுப்பப்பட்டது.
இந்நிலையில், நான்கு நாள் விசாரணைக்குப் பிறகு, வகுப்பறையில் ரத்தம் சிந்திக் கிடந்த விவகாரத்தில், கல்லூரியில் கட்டிட வேலை பார்த்து வரும் காரைக்குடியைச் சேர்ந்த விக்னேஷ் என்ற நபரை போலீசார் பிடித்து விசாரித்து வந்தனர். அந்த விசாரணையில், விக்னேஷ் ஒருதலைக்காதல் விவகாரத்தில் தன்னைத்தானே பிளேடால் கையை வகுப்பறையில் வைத்து அறுத்துக் கொண்டதாகக் கூறப்படுகிறது.
விக்னேஷ் சிக்கியது எப்படி? ரத்தக்கறை கிடப்பதாக தகவல் கிடைத்த உடனே, போலீசார் கல்லூரி முழுவதும் விசாரணையில் இறங்கினர். குறிப்பாக, அனைத்து வகுப்புகளுக்கும் சென்று மாணவிகள் மற்றும் ஆசிரியர்களிடம் விசாரணை நடத்தியதாக கூறப்படுகிறது.
முதலில் கல்லூரி நிர்வாகம் சார்பில் மான் போன்ற விலங்குகள் ஏதாவது அடிபட்டு, அதன் மூலம் ரத்தம் சிந்தியிருக்கலாம் என கூறியிருந்தனர். இருந்தாலும் சந்தேகமடைந்த போலீசார், வேறு ஏதேனும் பின்னணி இருக்கிறதா என்பதை விசாரித்து வந்தனர்.
ரத்தக்கறை கண்டுபிடிக்கப்பட்ட முந்தைய நாள் ஞாயிறு விடுமுறை என்பதால், அன்று மாணவிகள் வகுப்பறையில் இருக்க வாய்ப்பில்லை. எனவே, வேறு நபர்கள் உள்ளே வந்தார்களா என்பதையும் ஆய்வு செய்தனர். அப்போது தான் கல்லூரியில் கட்டிட வேலை நடந்து வருவது போலீசாருக்கு தெரிய வந்துள்ளது.
மேலும், கட்டிட வேலையில் ஈடுபட்டுள்ள நபர்கள் கல்லூரி வளாகத்தில் தங்கி இருந்தபடி பணி பார்த்துள்ளனர். எனவே, கட்டிட வேலை பார்த்த நபர்களுக்குள் ஏதாவது சண்டை ஏற்பட்டு, அதன் மூலம் ரத்தம் சிந்தி இருக்கலாம் என போலீசாருக்கு சந்தேகம் வலுத்தது.
பின்னர், கட்டிட வேலையில் ஈடுபட்டு வந்த அனைவரிடமும் போலீசார் தனித்தனியே விசாரணை நடத்தினர். அதில், விக்னேஷ் என்ற இளைஞரின் கையில் காயம் இருந்ததால் அவர் மீது போலீசாருக்கு சந்தேகம் எழுந்தது. இந்நிலையில், அவரிடம் துருவி துருவி விசாரணை மேற்கொண்டனர். இதற்கிடையில், ரத்த மாதிரிகள் மதுரைக்கு அனுப்பப்பட்ட நிலையில், அதன் முடிவுகள் போலீசாருக்கு கிடைத்துள்ளது.
அதன்படி, வகுப்பறையில் சிந்திக் கிடந்தது மனிதர்கள் ரத்தம் தான் என்பது உறுதியானது. எனவே, ரத்த மாதிரி என்ன வகையைச் சேர்ந்தது என்பதை போலீசார் தெரிந்து கொண்டனர். அதன் பிறகு விக்னேஷ் ரத்த மாதிரியை எடுத்து சோதித்த போது, இரண்டும் ஒத்து போனதால் விக்னேஷை போலீசார் தீவிரமாக விசாரித்தனர்.
அப்போது போலீசாரிடம் விக்னேஷ், தான் ஒரு பெண்ணை காதலித்து வந்ததாகவும், சம்பவத்தன்று அந்த பெண்ணிடம் வீடியோ காலில் பேசியபோது, அந்த பெண் தன்னை காதலிக்க மறுத்ததால் மன விரக்தியில் பிளேடால் தன்னைத்தானே கையை அறுத்துக் கொண்டதாகவும் தெரிவித்துள்ளார்.
இதையடுத்து, போலீசார் விக்னேஷை காவல் நிலையத்திற்கு அழைத்துச் சென்று மேலும் விசாரித்து வருகின்றனர். விக்னேஷ் காதலித்த பெண் யார் என்பதையும் விசாரித்து வருகின்றனர். அதேநேரம், விக்னேஷ் காதலித்தாக கூறப்படும் பெண் ராணி அண்ணா மகளிர் கல்லூரியைச் சேர்ந்தவர் இல்லை என்பது தெரியவந்துள்ளது. எனவே, இச்சம்பவத்தில் வேறு ஏதும் காரணம் இருக்கிறதா என தொடர்ந்து போலீசார் விசாரித்து வருகின்றனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க : நெல்லை அரசு மகளிர் கல்லூரியில் ரத்தக் கறை; பதறிய மாணவிகள்.. பின்னணி என்ன? - blood stains in class room
