திருநெல்வேலி: திருநெல்வேலி மாவட்டம் அம்பாசமுத்திரம் அடுத்த பள்ளக்கால் புதுக்குடி மெயின் ரோடு பகுதியை சேர்ந்தவர் மைதீன் வீட்டில் நேற்றிரவு (டிசம்பர் 17) 11:15 மணியளவில் அடையாளம் தெரியாத நபர்கள் பெட்ரோல் குண்டு வீசித் தாக்குதல் நடத்தியதாக காவல்துறைக்குத் தகவல் தெரிவிக்கப்பட்டது.
சம்பவம் இடம் வந்து விசாரணை நடத்திய காவல்துறையினரிடம், அடையாளம் தெரியாத நபர்கள் வீட்டுகதவு மற்றும் ஜன்னலில் அரிவாளால் கொத்தியதாகவும், தான் கதவைத் திறக்காத காரணத்தினால் ஆத்திரத்தில் அக்கும்பல் பெட்ரோல் குண்டு வீசிவிட்டு தப்பியோடினர் எனவும் மைதீன் தெரிவித்துள்ளார்.
இதனையடுத்து சேதமடைந்த கதவை சோதனை செய்துவிட்டு, பெட்ரோல் குண்டு வீசிய தடையங்களை காவல்துறையினர் சோதனை செய்தனர். மேற்கொண்டு நடத்திய விசாரணையில் சிக்கிய சிசிடிவி பதிவு காட்சிகளின்படி, அப்பகுதியில் வேலைக்கு சென்று விட்டு வந்து கொண்டிருந்த மசூது என்பவரை வழிமறித்து கால் மற்றும் முதுகில் அதே கும்பல் அரிவாளால் வெட்டி தப்பியோடி இருப்பது தெரியவந்தது.
இது குறித்த மைதீன் மற்றும் மசூது கொடுத்த புகாரின் பேரில், பாப்பாக்குடி போலீசார் வழக்குப் பதிவு செய்து, தாக்குதல் சம்பவத்தில் தொடர்புடையதாகக் கருதப்படும் 8 பேரைத் தேடி வருகின்றனர்.
முதல்கட்டமாக அந்த பகுதியில் வைக்கப்பட்டிருந்த சிசிடிவி காட்சிகளை கைப்பற்றி ஆய்வு செய்ததில், அடையாளம் தெரியாத கும்பல் இரண்டு இருசக்கர வாகனங்களில் வந்து இறங்கி, மின்னல் வேகத்தில் மைதீன் வீட்டின் மீது பெட்ரோல் குண்டை வீசிவிட்டு தப்பி செல்லும் காட்சிகள் பதிவாகியுள்ளது.
இதையும் படிங்க: கணவர் உயிரிழந்த பின் மறுமணம் செய்துகொண்ட மனைவிக்கு சொத்தில் பங்கு!
அதேபோல், சாலையில் சென்ற மசூத் என்பவர் அக்கும்பலை சந்தேகத்தோடு பார்த்த காரணத்தால் அவரையும் அக்கும்பல் தாக்கியதாக காவல்துறையினர் தெரிவித்தனர். இது குறித்து அறிந்து ஈடிவி பாரத் செய்தியாளருக்கு பதிலளித்த பள்ளக்கால் புதுக்குடி காவல் நிலைய உதவி ஆய்வாளர் ஆழ்வார், "இந்த சம்பவம் குறித்து தகவல் கிடைத்த உடனே சம்பவ இடத்திற்கு சென்று விசாரித்தோம்.
சிசிடிவி காட்சிகளை கைப்பற்றியுள்ளோம். அதன் அடிப்படையில் விசாரணை நடந்து வருகிறது. தற்போது வரை குற்றவாளிகள் சிக்கவில்லை. முகவரி கேட்பதில் ஏற்பட்ட பிரச்னையால் மைதீன் வீட்டில் பெட்ரோல் குண்டு வீசப்பட்டுள்ளதாக தெரிகிறது. இது குறித்து தொடர்ந்து விசாரித்து வருகிறோம்," என்று கூறியுள்ளார்.
