"பிற சமூக மக்கள் தாக்கப்பட்டால் யாரும் கண்டுகொள்வதில்லை" - நேதாஜி சுபாஷ் சேனை அமைப்பு ஆதங்கம்! - SCHOOL STUDENTS COMMUNAL CLASH

Tirunelveli students clash: பிற்படுத்தப்பட்ட சமூகத்தைச் சேர்ந்த மக்கள் பாதிக்கப்பட்டால் அரசு உட்பட யாரும் கண்டுகொள்வதில்லை என நேதாஜி சுபாஷ் சேனை அமைப்பின் தலைவர் மகாராஜன் தெரிவித்துள்ளார்.

மதுரை: நெல்லை மாவட்டம், நாங்குநேரி அடுத்துள்ள மருதகுளத்தில் அரசு மேல்நிலைப் பள்ளியில் இரு சமூகத்தைச் சேர்ந்த மாணவர்கள் இடையே மோதல் உண்டானதில் இரண்டு மாணவர்கள் மருத்துவமனையில் அனுமதிக்கப்பட்டனர். இது குறித்து மதுரை மாட்டுத்தாவணியில் உள்ள பத்திரிகையாளர் அலுவலகத்தில் நேதாஜி சுபாஷ் சேனை அமைப்பின் தலைவர் மகாராஜன் செய்தியாளர்களைச் சந்தித்தார்.

அப்போது பேசிய அவர், "திருநெல்வேலி அரசு மேல்நிலைப் பள்ளியில் பிற்படுத்தப்பட்ட சமுதாயத்தைச் சேர்ந்த மாணவர்களை, மற்றொரு சமுதாயத்தைச் சேர்ந்த மாணவர்களால் கடந்த 1ஆம் தேதி தாக்கப்பட்டனர். அதில் காயம் அடைந்த மாணவர்கள் திருநெல்வேலி அரசு மருத்துவமனையில் தீவிர சிகிச்சையில் உள்ளார்.

நாங்குநேரியில் பட்டியலின மாணவர் தாக்கப்பட்ட போது அரசும், அரசு அதிகாரிகளும், சமூக ஆர்வலர்களும், திரைப்பட இயக்குநர்கள் என பலர் போட்டி போட்டு உதவி செய்தனர். மேலும், காவல்துறை சார்பில் தாக்குதலில் ஈடுபட்ட நபர்கள் மீது கடுமையான நடவடிக்கை எடுக்கப்பட்டது.

ஆனால், தற்போது தாக்குதலுக்குள்ளான மாணவர் பிற்படுத்தப்பட்ட சமுதாயத்தைச் சேர்ந்தவர் என்பதால் அரசும், அதிகாரிகளும் கவனத்தில் எடுத்துக்கொள்வதில்லை. சமூக நீதி பேசும் அரசு, இன்று பிற்படுத்தப்பட்ட சமுதாயத்தைச் சேர்ந்த மாணவர் என்பதால் கண்டுகொள்ளவில்லை. பாதிக்கப்பட்ட மாணவர்களுக்கு அரசு உரிய உதவிகள் வழங்க வேண்டும்.