சென்னை: ஏப்ரல் 19-ஆம் தேதி தொடங்கிய மக்களவைத் தேர்தலுக்கான ஆறு கட்ட வாக்குப்பதிவு நிறைவடைந்துள்ள நிலையில், வரும் ஒன்றாம் தேதி இறுதிக் கட்ட வாக்குப்பதிவு நடைபெறவுள்ளது. ஏழு கட்டங்களில் பதிவான வாக்குகள் ஜூன் 4-ஆம் தேதி எண்ணப்பட்டு முடிவுகள் வெளியாகவுள்ளன.
இந்நிலையில், காங்கிரஸ், திமுக, ஆம் ஆத்மி, திரிணாமுல் காங்கிரஸ், இடதுசாரிகள் உள்ளிட்ட கட்சிகள் அங்கம் வகிக்கும் 'இந்தியா கூட்டணி' தலைவர்களின் ஆலோசனைக் கூட்டம் ஜூன் 1ஆம் தேதி டெல்லியில் நடைபெற உள்ளது. இந்த கூட்டத்தில் பங்கேற்க இந்தியா கூட்டணியில் அங்கம் வகிக்கும் 28 கட்சிகளின் முக்கிய தலைவர்களுக்கு அழைப்பு விடுக்கப்பட்டுள்ளது.
ஆலோசனை கூட்டத்தில் இந்தியா கூட்டணி நாடாளுமன்ற தேர்தலில் செயல்பட்ட விதம், தேர்தல் முடிவுக்கு பிறகு ஒருங்கிணைந்து செயல்படுவது உள்ளிட்டவை குறித்து இந்த கூட்டணியில் ஆலோசனை நடத்த உள்ளதாக தகவல் வெளியாகியுள்ளது.
இந்த கூட்டத்தில் திமுக தலைவரும், முதலமைச்சருமான மு.க.ஸ்டாலின் பங்கேற்க உள்ளார். இதற்காக ஜூன் 1-ஆம் தேதி காலை 7 மணிக்கு சென்னையில் இருந்து விமானம் மூலம் டெல்லி புறப்பட்டுச் செல்ல உள்ளதாக தகவல் வெளியாகியுள்ளது.
இதையும் படிங்க: தமிழகப் பகுதிகளைக் கேரள அரசு தரப்பில் அளவீடு..? விளக்கம் அளிக்க வேண்டி விவசாயிகள் ஆர்ப்பாட்டம்..!
