விருதுநகர்: நாடளுமன்றத் தேர்தல் இந்தியா முழுவதும் ஏப்.19ஆம் தேதி முதல் ஜூன் 1ஆம் தேதி வரை ஏழு கட்டங்களாக நடைபெறவுள்ளது. இதில், தமிழகத்தில் முதல் கட்டமாக வாக்குப்பதிவு நடைபெறவுள்ளது. இதற்கான வேட்பு மனு தாக்கல் தொடங்கி நிறைவுபெற்றதைத் தொடர்ந்து அரசியல் கட்சிகள் தங்கள் தேர்தல் பணிகளைத் துரிதப்படுத்தி வருகின்றனர்.
அந்த வகையில், இந்தியா கூட்டணி சார்பில் விருதுநகர் நாடாளுமன்றத் தொகுதியில் காங்கிரஸ் கட்சியின் சார்பில் போட்டியிடும் மாணிக்கம் தாகூரின் தேர்தல் அலுவலக திறப்பு விழா நேற்று (வெள்ளிக்கிழமை) நடைபெற்றது. இதில் அமைச்சர் தங்கம் தென்னரசு சிறப்பு விருந்தினராகக் கலந்து கொண்டு அலுவலகத்தை திறந்து வைத்தார்.
விழாவில் காங்கிரஸ் வேட்பாளரான மாணிக்கம் தாகூர் எம்பி பேசுகையில், "அமைச்சர் தங்கம் தென்னரசு தென் தமிழகத்தின் அடையாளமாக உருவெடுத்து வருகிறார். இந்தி மற்றும் ஆங்கில ஊடகங்கள் மோடி அமித்ஷாவின் கைப்பாவையாக மாறிவிட்டன.
ராமர் கோயில் திறக்கும் நேரத்தில் எடுக்கப்பட்ட கருத்துக்கணிப்புகள் தற்போது வெளியாகிக் கொண்டிருக்கிறது. இந்தியா கூட்டணி 300-க்கும் அதிகமான தொகுதிகளில் வெற்றி பெற்று ஆட்சியை கைப்பற்றும். பாஜகவின் 'பி' டீமான அதிமுக, தேமுதிக தனித்து நின்று சிறுபான்மை மக்களைக் குழப்புகின்றனர்" எனப் பேசினார்.
பின்னர் பேசிய அமைச்சர் தங்கம் தென்னரசு, "இந்தியா கூட்டணியில் உள்ள கட்சிகள் அனைத்தும் ஒரே குறிக்கோளுடன் இருக்கிறது. மோடியின் 10 ஆண்டு கால அவல நிலையை அகற்ற, இந்தியாவை காப்பாற்ற ஆட்சி மாற்றம் நிகழ வேண்டும்.
மோடி வீழ்த்தப்பட முடியாதவர் அல்ல, வீழ்த்தப்பட வேண்டியவர் என்பதை நாட்டு மக்களிடம் எடுத்துச் சொல்லுங்கள். 10 லட்சம் மக்களின் வாழ்வாதாரமான பட்டாசு தொழிலை ஒரே உத்தரவில் நசுக்கியவர், மோடி. யார் பட்டாசு தொழிலை அளித்தார்களோ, அவர்கள்தான் இன்று முகமூடியுடன் உங்களிடம் வாக்கு கேட்டு வருகின்றனர்.
மோடி மீண்டும் ஒருமுறை ஆட்சிக்கு வந்தால், வாக்களிக்கக்கூடிய கடைசி தலைமுறை நாமாகத்தான் இருப்போம். மோடி ஆட்சியை அகற்றாவிட்டால் வட மாநிலங்களை ஆக்கிரமித்துள்ள பாசிச சக்தி தமிழகத்தையும் ஆக்கிரமிக்கும்.
தமிழகத்தில் ஏற்பட்ட வெள்ள பாதிப்புக்கு மத்திய அரசு தற்போது சல்லி காசு கூட வழங்கவில்லை. தமிழகம் ஒரு ரூபாய் வரியாக செலுத்தினால், 29 பைசாவை மத்திய அரசு நமக்குத் திருப்பி தருகிறது. ஆனால், உத்தரப்பிரதேச அரசு ஒரு ரூபாய் வரி செலுத்தினால், 12 ரூபாயாக மத்திய அரசு திருப்பி வழங்குகிறது. ஒரு கண்ணில் வெண்ணெய்யையும், ஒரு கண்ணில் சுண்ணாம்பையும் மத்திய அரசு வைக்கிறது.
தமிழக அரசு நிறைவேற்றும் அனைத்து நலத்திட்டங்களும் மாநில அரசின் சொந்த நிதியிலிருந்து வழங்கப்படுகிறது" என குற்றம்சாட்டினார். இந்நிகழ்ச்சியில் சிவகாசி சட்டமன்ற உறுப்பினர் அசோகன், மேயர் சங்கீதா, திமுக மாநகர செயலாளர் உதயசூரியன் மற்றும் கூட்டணிக் கட்சி நிர்வாகிகள் கலந்து கொண்டனர்.
இதையும் படிங்க: “இங்கு கொடி வாங்கினால் எங்கள் கட்சிக்கு வெற்றிதான்..” மதுரை கீழ ஆவணி மூல வீதியில் நடப்பது என்ன?
