கோயம்புத்தூர்: அவினாசி சாலையில் உள்ள டைடல் பார்க் வளாகத்தில் அமைக்கப்பட்டுள்ள புதிய தகவல் தொழில் நுட்ப பூங்கா மற்றும் காந்திபுரம் செம்மொழி பூங்கா வாளகத்தில் அமைக்கப்பட இருக்கும் கலைஞர் நூலகம் மற்றும் அறிவியல் மையத்திற்கு அடிக்கல் நாட்டு விழா ஆகியவற்றில் முதலமைச்சர் ஸ்டாலின் பங்கேற்கிறார். இதற்கான ஏற்பாடுகள் நடைபெற்று வரும் நிலையில் இந்த இடங்களை
கோவை பொறுப்பு அமைச்சர் செந்தில் பாலாஜி நேரில் ஆய்வு செய்தார்.
இந்த ஆய்வின்போது அமைச்சர் செந்தில் பாலாஜியுடன் மாவட்ட ஆட்சியர் கிராந்தி குமார் பாடி, மாநகர காவல் ஆணையர் பாலகிருஷ்ணன் ஆகியோர் உடன் இருந்தனர். ஆய்விற்கு பின்னர் தீபாவளி டாஸ்மாக் விற்பனை எவ்வளவு என செய்தியாளர்கள் எழுப்பியக் கேள்விக்கு, இன்னும் சரியான தகவல் கிடைக்கவில்லை எனவும் அலுவலர்கள் தீபாவளி விடுப்பில் இருந்ததால் உடனடியாகக் கூற முடியாது எனவும் தெரிவித்த அவர், அலுவலர்களிடம் பேசி தகவல் கிடைத்தவுடன் உங்களிடம் சொல்கிறேன் எனத் தெரிவித்துள்ளார்.
தொடர்ந்து முதலமைச்சரின் கோயம்புத்தூர் நிகழ்வுகளைக் குறித்து பேசிய அவர், “முதலமைச்சர் ஸ்டாலின், நவம்பர் 5 மற்றும் 6 ஆகிய தேதிகளில் கோவை மாவட்டம் வருகிறார். ஐந்தாம் தேதி பிற்பகல் 12 மணிக்கு புதிய தகவல் தொழில்நுட்ப பூங்கா கட்டடத்தைத் திறந்து வைக்கிறார்.”
“தகவல் தொழில் நுட்ப பூங்கா எட்டு தளங்களில் 2 லட்சத்து 94 ஆயிரம் சதுர அடி பரப்பளவில் கட்டப்பட்டுள்ளது. இதை திறந்து வைக்க இருப்பதாகவும், அரசின் திட்டங்களை முதலமைச்சர் கோவையில் இருந்து தொடங்கி வைக்கிறார். ஆறாம் தேதி செம்மொழி பூங்கா வளாகத்தில் கலைஞர் நூலகம் மற்றும் அறிவியல் மையத்திற்கான கட்டடத்திற்கு அடிக்கல் நாட்ட இருக்கின்றார். இவை 300 கோடி ரூபாய் மதிப்பீட்டில், ஒரு லட்சத்து 92 ஆயிரம் சதுரஅடி பரப்பளவில், 7 மாடிக் கட்டடமாகக் கட்டப்படுகிறது.”
| இதையும் படிங்க |
“தமிழ்நாடு முதலமைச்சர் அதிக முறை சுற்றுப்பயணம் செய்த மாவட்டமாக கோவை இருக்கிறது. இன்னும் பல்வேறு சிறப்பு திட்டங்கள் கோவை மாவட்டத்திற்கு வழங்க முதலமைச்சர் தயாராக இருக்கிறார். தகவல் தொழில்நுட்பப் பூங்காவில் எவ்வளவு நிறுவனங்கள் அமைய முடியுமோ, அதற்கேற்றபடி வேலை வாய்ப்புகள் அமையும். இரு நிகழ்வுகளிலும் அரசு நலத்திட்ட உதவிகள் எதுவும் வழங்கப்பட வில்லை,” என்று கூறினார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்.
