வேலூர்: ராணிப்பேட்டை ஆட்சியர் அலுவலகத்தில், இந்திய அரசின் ஏபிஐபி திட்டத்தின் கீழ் மாற்றுத்திறனாளிகளுக்கு உதவிகள் மற்றும் உதவி உபகரணங்கள் வழங்கும் சமூக வலுவூட்டல் முகாம் நிகழ்ச்சி இன்று நடைபெற்றது.
இந்த நிகழ்ச்சியில் தமிழக கைத்தறி மற்றும் துணிநூல் துறை அமைச்சர் ஆர்.காந்தி மற்றும் மாவட்ட ஆட்சியர் சந்திரகலா ஆகியோர் பங்கேற்றனர். இந்த நிகழ்ச்சியில் தேர்ந்தெடுக்கப்பட்ட 400 மாற்றுத்திறனாளி பயனாளிகளுக்கு ரூ.20 லட்சம் மதிப்பிலான நலத்திட்ட உதவிகளை அமைச்சர் ஆர்.காந்தி வழங்கினார்.
பின்னர், செய்தியாளர்களைச் சந்தித்து அமைச்சர் ஆர்.காந்தியிடம், பொங்கலுக்கு வழங்கக்கூடிய இலவச வேட்டி, சேலை வழங்குவது குறித்து பாமக நிறுவனர் ராமதாஸ் வெளியிட்டுள்ள அறிக்கை தொடர்பாக செய்தியாளர் கேட்ட கேள்விக்கு பதில் அளித்த அவர், “தமிழக அரசின் அறிக்கையை முழுமையாக தெரிந்து கொள்ளாமல் ராமதாஸ் பேசுகிறார். சப்ஜெக்ட் தெரிந்து பேசினால், அதற்குரிய சரியான பதிலை அளிக்கலாம். ராமதாஸ் அனுபவம் வாய்ந்த தலைவர். தமிழக அரசின் ஆணைக்கு அவர் சம்பந்தமில்லாத அறிக்கையை வெளியிட்டுள்ளார்” என்றார்.
தொடர்ந்து, முதலமைச்சரின் தொழில் முதலீடு, வெளிநாடு பயணங்கள் மக்களை ஏமாற்றுவது என தமிழிசை சௌந்தரராஜன் தெரிவித்திருப்பது குறித்த கேள்விக்கு பதிலளித்த அவர், “திமுக ஆட்சி பொறுப்பேற்றதிலிருந்து அனைத்து துறைகளிலும் சிறப்பான திட்டங்கள் கொண்டு வரப்பட்டு செயல்பட்டு வருகிறது. முதலமைச்சர் மற்றும் அரசை குறித்து விமர்சிப்பவர்கள், மக்களை முட்டாளாக்க நினைக்கிறார்கள்” இவ்வாறு அவர் கூறினார்
முன்னதாக, “தமிழக அரசின் அறிவிப்பில், விசைத்தறி தொழிலாளர்கள் மட்டும் பயன்பெறும் வகையில் அறிக்கை இருப்பதாகவும், கைத்தறி நெசவாளர்கள் மூன்றில் ஒரு பங்கு பயனடையும் விதமாக தமிழக அரசு அரசாணையை மாற்றி அறிவிக்க வேண்டும்” என பாமக நிறுவனர் ராமதாஸ் அறிக்கை வெளியிட்டது குறிப்பிடத்தக்கது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: "பி.எம்.ஸ்ரீ திட்டத்தை ஏற்க மறுப்பது ஏன்?" - அமைச்சர் அன்பில் மகேஷ் விளக்கம்!
