சென்னை: கடந்த சட்டமன்ற நிதிநிலை அறிக்கையில் அறிவிக்கப்பட்ட மருத்துவத் துறை சார்ந்த திட்டங்கள், அதில் செயல்படுத்தப்பட்ட மற்றும் செயல்படுத்த வேண்டிய திட்டங்கள் குறித்தும் வரும் நிதிநிலை அறிக்கையில் அறிவிக்கப்பட வேண்டிய திட்டங்கள் குறித்த ஆய்வு கூட்டம் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் தலைமையில் இன்று (நவ.11) தமிழ்நாடு அரசு பன்னோக்கு உயர் சிறப்பு மருத்துவமனையில் நடைபெற்றது.
அதன் பின்னர் செய்தியாளர்களிடம் பேசிய மருத்துவம் மற்றும் மக்கள் நல்வாழ்வுத்துறை அமைச்சர்
மா.சுப்பிரமணியன், "கரோனா காலத்தில் பணியாற்றிய செவிலியர்களுக்கு அரசுப் பணியில் வாய்ப்பு அளிக்க வேண்டும் என்பதற்காக படிப்படியாக செவிலியர்கள் நிரந்தர மற்றும் தற்காலிக பணியில் அமர்த்தப்பட்டு வருகின்றனர்.
அந்த வகையில், கடந்தாண்டு மட்டுமே கரோானா காலத்தில் பணியாற்றிய 1412 செவிலியர்கள் ஒப்பந்த அடிப்படையில் பணியில் அமர்த்தப்பட்டனர். தற்பொழுது 1271 நிரந்தரப் பணியிடங்கள் ஏற்பட்டுள்ளது. அந்த காலிப்பணியிடங்களுக்கு வரும் 14 மற்றும் 15ஆம் தேதி கரோனா காலத்தில் பணியாற்றிய 1271 ஒப்பந்த செவிலியர்களை நிரந்தர பணியாளர்களாக நியமிக்க ஆணைகள் வழங்கப்பட உள்ளது. மேலும், கரோனா காலத்தில் பணியாற்றிய எஞ்சிய 954 செவிலியர்கள் ஒப்பந்த செவிலியர்களாக பணியாற்ற ஆணை வழங்கப்பட உள்ளது.
இதுமட்டும் அல்லாது, இந்த செவிலியர் பணியிடங்கள் நிரப்பப்பட்ட பிறகு மீதமுள்ள 300 செவிலியர்களுக்கான பணியிடங்களை மருத்துவத் தேர்வு வாரியம் மூலம் பணியமர்த்த நடவடிக்கை எடுக்கப்படும். இதன் மூலம் 100 சதவீதம் செவிலியர்கள் காலி பணியிடங்கள் இல்லாத நிலை உருவாக்கப்படும் மற்றும் கரோனா காலத்தில் பணியாற்றிய அனைவருக்கும் வேலை வாய்ப்பு வழங்கப்படும்.
இதையும் படிங்க: "விவாதத்திற்கு தயார்" - ஈபிஎஸுக்கு உதயநிதி ஸ்டாலின் சவால்!
பொது சுகாதாரத்துறையில் காலியாக உள்ள 2553 மருத்துவ பணியிடங்களுக்கு வருகின்ற ஜனவரி 27ஆம் தேதி ஆன்லைன் தேர்வு நடைபெற உள்ளது. இதற்கு 25 ஆயிரம் விண்ணப்பங்கள் பெறப்பட்டு, அவர்களின் சான்றிதழ்கள் சரிபார்க்கப்பட்டுள்ளது. மேலும், அவர்களுக்கு தேர்வினை ஆன்லைன் மூலம் நடத்துவதற்கு உரிய நிறுவனம் தேர்வு செய்யப்பட்டுள்ளது. தேர்வு முடிந்த பின்னர் காலிப்பணியிடங்கள் நிரப்பப்படும்.
தற்பொழுது பொது சுகாதாரத்துறையில் 1533 பணியிடங்களும், மருத்துவம் மற்றும் ஊரகநலப் பணிகள் சேவை இயக்குநரகத்தில் 552 பணியிடங்களும், மருத்துவக் கல்வி மற்றும் ஆராய்ச்சி நிறுவனத்தில் 1600 பணியிடங்களும் காலியாக உள்ளது. மேலும், மருத்துவக் கல்வித் துறையில் காலியாக உள்ள பணியிடங்கள் முதுகலைப் படித்த மாணவர்கள் மூலம் நிரப்பப்படும்.
ஆகவே, மருத்துவத் துறையை பொறுத்தவரை ஒரு காலிப்பணியிடம் கூட இல்லாத நிலையை உருவாக்க வேண்டும் என தொடர்ந்து பணிகள் மேற்கொண்டு வருகிறோம். அந்த வகையில், மருத்துவ துறையில் காலிப்பணியிடங்கள் 100 சதவீதம் நிரப்பப்படும்" என கூறினார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
