கோயம்புத்தூர்: தமிழகத்தில் ஆண்டுதோறும் மேற்கு மற்றும் கிழக்கு தொடர்ச்சி மலைகளுக்கு இடையே 6 மாதங்களுக்கு ஒருமுறை பட்டாம்பூச்சிகளின் இடம் பெயர்வு நடக்கிறது. தென்மேற்கு பருவமழை தீவிரமடையும்போது பட்டாம்பூச்சிகள் மேற்குத் தொடர்ச்சி மலையின் நீலகிரி, சிறுவாணி, ஆனைமலையில் இருந்து கிழக்கு தொடர்ச்சி மலைகளில் உள்ள ஏற்காடு, பச்சமலை, கொல்லிமலை, கல்வராயன் மலைகளுக்கு செல்கின்றன.
அதுபோல் வடகிழக்கு பருவமழை காலத்தில் அங்கிருந்து மேற்குத் தொடர்ச்சி மலைகளுக்கு இடம்பெயர்வு நடப்பது வழக்கம். அதன்படி வடகிழக்கு பருவமழை துவங்க உள்ள நிலையில், கிழக்கு தொடர்ச்சி மலையில் இருந்து மேற்குத் தொடர்ச்சி மலையை நோக்கி பட்டாம்பூச்சிகளின் இடம்பெயர்வு துவங்கி உள்ளதால், மேற்குத் தொடர்ச்சி மலை அடிவாரப் பகுதிகளில் அதிக அளவு பட்டாம்பூச்சிகளை காண முடிகிறது.
குறிப்பாக நீர் நிலைகள், காடுகளில் பட்டாம்பூச்சிகளின் இடம் பெயர்வைக் காண முடிகிறது. இதில், வெள்ளலூரில் உள்ள பட்டாம்பூச்சி பூங்காவில் அதிகளவிலான பட்டாம்பூச்சிகள் உள்ளதால் அதனை காண பள்ளி குழந்தைகளும், பொதுமக்களும் ஆர்வமுடன் வருகின்றனர்.
இதுகுறித்து சூழலியல் ஆர்வலர் மணிகண்டன் கூறுகையில், "ஆரம்பத்தில் வெள்ளலூர் குளத்திற்கு தண்ணீர் வரத்து இல்லாத்தால் குளம் வரண்டு காணப்பட்டது. பின்னர் அதன் ராஜ வாய்க்கால்கள் தூர்வாரப்பட்ட பின்னர் குளத்திற்கு தண்ணீர் வந்துள்ளது. இதனைத் தொடர்ந்து பறவைகளும் வந்ததால் இப்பகுதி ரம்மியமாக காட்சி அளிக்கிறது.
இதையும் படிங்க : கோவையில் திறக்கப்பட்ட பட்டாம்பூச்சி பூங்கா! ஆர்வமுடன் குவியும் பார்வையாளர்கள்
தற்போது பட்டாம்பூச்சிகளின் இடம்பெயர்வு காலம் என்பதால் அதிகளவிலான பட்டாம்பூச்சிகள் வந்துள்ளது. இங்கு 103 வகையான பட்டாம்பூச்சிகள் உள்ளது. கோவை மாவட்டத்தில் 200க்கும் மேற்பட்ட பட்டாம்பூச்சி இனங்கள் உள்ள நிலையில், ஒரே இடத்தில் 103 வகையான பட்டாம்பூச்சிகள் காண்பது மகிழ்ச்சியை ஏற்படுத்தியுள்ளது.
பட்டாம்பூச்சிகள் இயற்கையை சம நிலைப்படுத்தவும், மகரந்த சேர்க்கை மூலம் உரிய காலத்தில் பழங்கள் கிடைக்க காரணமாக அமைவதால் அதனை பாதுகாக்க வேண்டும். அடுத்த தலைமுறைக்கு பட்டாம் பூச்சிகளின் அவசியத்தைக் கொண்டு செல்லவே பட்டாம்பூச்சி பூங்காக்கள் உருவாக்கப்பட்டுள்ளது.
மேலும் ஃபுளூ டைகர், டார்க் ஃபுளூ டைகர், காமன் குரோ, டபுள்-பிராண்டட் குரோ ஆகிய வகை பட்டாம்பூச்சிகள் கிழக்குத் தொடர்ச்சி மலைகள் மற்றும் சமவெளிகளிலிருந்து வடகிழக்கு பருவமழை தொடங்குவதற்கு முன்பே இங்கு வந்துள்ளதாகவும், பள்ளி மாணவர்களுக்கு கற்றல் தேவைகாக இந்த பூங்காக்கள் உருவாக்கப்பட்டுள்ள நிலையில், இங்கு வருபவர்கள் பட்டாம்பூச்சிகளின் அவசியத்தை அறிந்துகொள்வார்கள்" என தெரிவித்தார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
