மதுரை: மதுரையில் பாலமேடு ஜல்லிக்கட்டு இன்று (ஜனவரி 15) நடைபெற உள்ள நிலையில், ஆயிரம் காளைகளும் 900 மாடுபிடி வீரர்களும் களமிறங்க உள்ளதாக மாவட்ட நிர்வாகம் தெரிவித்துள்ளனர். இந்நிலையில், ஜல்லிக்கட்டு போட்டிக்கான முன்னேற்பாடு பணிகள் முழுவதும் நிறைவடைந்து போட்டிக்கு களம் தயாராகியுள்ளது.
தமிழர்களின் பாரம்பரியம் வீர விளையாட்டான ஜல்லிக்கட்டு ஆண்டுதோறும் தைத்திருநாளில் நடைபெறுவது வழக்கம். அதிலும், குறிப்பாக மதுரையில் அவனியாபுரம், பாலமேடு, அலங்காநல்லூர் ஆகிய இடங்களில் ஜல்லிக்கட்டு போட்டி விமர்சையாக நடைபெறும். இந்த நிலையில், மதுரையில் பாலமேடு ஜல்லிக்கட்டு இன்று மாட்டுப் பொங்கல் அன்று (ஜனவரி 15) நடைபெற உள்ளது.
இதற்கான, முன்னேற்பாடு பணிகள், மஞ்சமலை ஆற்றில் அமைந்துள்ள வாடிவாசல் பகுதியில், மகாலிங்க சாமி மடத்து கமிட்டி மற்றும் பாலமேடு பேரூராட்சி சார்பாக முழுவதும் நிறைவடைந்துள்ளது.
இதையும் படிங்க: அவனியாபுரம் ஜல்லிக்கட்டு நிறைவு.. 19 காளைகளை அடக்கிய கார்த்திக்கு கார் பரிசு!
பரிசுகள்:
நடைபெறவிருக்கும் உலகப் புகழ் பெற்ற பாலமேடு ஜல்லிக்கட்டுப் போட்டியில் முதல் பரிசாக சிறந்த காளைக்கு தமிழக முதலமைச்சர் சார்பில் டிராக்டரும், சிறந்த மடுபிடி வீரருக்கு துணை முதலமைச்சர் சார்பில் கார் வழங்கப்படுகிறது. மேலும், இரண்டாவது பரிசாக காளைக்கு நாட்டின பசு மற்றும் கன்று, வீரருக்கு பைக் என பரிசுப் பொருட்கள் அறிவிக்கப்பட்டுள்ளது. தற்போது, வெற்றிபெறும் காளைகளுக்கும் மற்றும் மாடுபிடி வீரர்களுக்கும் பரிசு பொருட்கள் ஜல்லிக்கட்டு நடைபெறும் இடத்தில் வைக்கப்பட்டுள்ளன.
இந்த பாலமேடு ஜல்லிக்கட்டுப் போட்டியில் ஆயிரம் காளைகளும், 900 மாடுபிடி வீரர்களும் களமிறங்க உள்ளனர். மேலும், காவல்துறையினர் சுமார் 2400 பேர் பாதுகாப்புப் பணியில் ஈடுபட உள்ளது குறிப்பிடத்தக்கது.
