மதுரை: மதுரையைச் சோ்ந்த புஷ்பவனம் என்பவர், உயர் நீதிமன்ற மதுரைக்கிளையில் தாக்கல் செய்த பொதுநல மனுவில், “ராமநாதபுரம் அரசு சட்டக் கல்லூரி 2017ஆம் ஆண்டு தொடங்கப்பட்டது. இதற்கு உரிய இடம் இல்லாத காரணத்தால், ராமநாதபுரம் அருகே உள்ள பெருங்குளம் அரசு நடுநிலைப் பள்ளியில் கடந்த 6 ஆண்டுகளாக இயங்கி வருகிறது. இந்தக் கல்லூரியில் 3 ஆண்டு இளநிலை படிப்புக்கு 80 இடங்கள், 5 ஆண்டு படிப்புக்கு 80 இடங்கள், முதுநிலை படிப்புக்கு 20 இடங்கள் ஒதுக்கப்பட்டன.
இந்தச் சூழலில், ராமநாதபுரம் கூத்தகோட்டை பகுதியில் அரசு சட்டக் கல்லூரிக்கான புதிய கட்டடம் கட்டப்பட்டது. ஆனால், இதுவரை பயன்பாட்டிற்கு கொண்டு வரப்படவில்லை. புதிய அரசு சட்டக் கல்லூரி கட்டடத்தில் குடிநீர் வசதி இல்லாததால் திறக்கப்படவில்லை என அதிகாரிகள் தரப்பில் தெரிவிக்கின்றனா்.
இது ஏற்புடையதல்ல. எனவே, புதிய கட்டடத்தை மாணவர்கள் பயன்பாட்டிற்கு கொண்டு வரவும், குடிநீர் உள்பட அடிப்படை வசதிகள் ஏற்படுத்தவும் உத்தரவிட வேண்டும்” என அந்த மனுவில் கோரியிருந்தார்.
இந்த நிலையில், இன்று (பிப்.29) இந்த மனு தலைமை நீதிபதி சஞ்சய் விஜய்குமார் கங்கபூர்வாலா மற்றும் தனபால் ஆகியோர் முன் விசாரணைக்கு வந்தது. அப்போது அரசுத் தரப்பில் ஆஜரான வழக்கறிஞர், “புதிய அரசு சட்டக் கல்லூரியில் அனைத்து பணிகளும் நிறைவடைந்துவிட்டது. கல்லூரி திறப்பு விழாவிற்கு தயாராக உள்ளது. விரைவில் திறக்க நடவடிக்கை எடுக்கப்படும்” என வாதிட்டார்.
இதனைத் தொடர்ந்து நீதிபதிகள் சஞ்சய் விஜய்குமார் கங்கபூர்வாலா மற்றும் தனபால் ஆகியோர், 2024-2025 கல்வியாண்டில் புதிய அரசு சட்டக் கல்லூரி கட்டடத்தை பயன்பாட்டுக்கு கொண்டு வர உத்தரவிட்டு வழக்கை முடித்து வைத்தனர்.
இதையும் படிங்க: நாளை பிளஸ் 2 பொதுத்தேர்வு.. வினாத்தாள் அறைக்கு துப்பாக்கி ஏந்திய போலீஸ் பாதுகாப்பு!
