புதுச்சேரி: புதுச்சேரி மாநில பொதுப்பணித்துறையில் மேற்பார்வை பொறியாளராக பணியாற்றிய ஆனந்தன், 1997ஆம் ஆண்டு முதல் 2006ஆம் ஆண்டுகளில் வருமானத்துக்கு அதிகமாக 3 கோடியே 75 லட்சம் ரூபாய் அளவுக்கு சொத்துக்கள் சேர்த்ததாக சிபிஐ வழக்குப்பதிவு செய்தது.
இந்த வழக்கில், ஆனந்தனின் மனைவி மற்றும் மகனும், முன்னாள் எம்.எல்.ஏ.வுமான அசோக் ஆனந்த் ஆகியோர் மீது குற்றம் சாட்டப்பட்டிருந்தது. இவர்களுக்கு எதிரான வழக்கை புதுச்சேரி சிறப்பு நீதிமன்றம் விசாரித்தது. வழக்கு விசாரணையில் இருந்த போது ஆனந்தி மனைவி மரணம் அடைந்தார். அவருக்கு எதிரான வழக்கு மட்டும் கைவிடப்பட்டது.
முன்னாள் எம்எல்ஏ அசோக் ஆனந்த் மற்றும் அவரது தந்தை ஆனந்த் மீதான வழக்கை விசாரித்த புதுச்சேரி நீதிமன்றம், இருவருக்கும் தலா ஓராண்டு சிறை தண்டனையும், ஒரு லட்சம் ரூபாய் அபராதமும் விதித்து கடந்த 2018ஆம் ஆண்டு தீர்ப்பளித்தது. மேலும், வருமானத்துக்கு அதிகமாக சேர்த்த சொத்துக்களை பறிமுதல் செய்யவும் உத்தரவிட்டது. இந்த தீர்ப்பை எதிர்த்து முன்னாள் அரசு அதிகாரி ஆனந்த் மற்றும் முன்னாள் எம்எல்ஏ அசோக் ஆனந்த் ஆகியோர் சென்னை உயர்நீதிமன்றத்தில் மேல்முறையீடு செய்திருந்தனர்.
இதையும் படிங்க: சட்டவிரோதமாக பத்திரப்பதிவு வழக்கு: லஞ்ச ஒழிப்புத்துறை மனித உரிமையை மீறியதாக வழக்கு ரத்து
இந்நிலையில், இந்த மேல்முறையீட்டு வழக்கை இன்று ( ஜன.16) விசாரித்த நீதிபதி பி.வேல்முருகன், வழக்கு தொடர்பான ஆதாரங்களை ஆராய்ந்ததில், குற்றம் சாட்டப்பட்ட இருவர் மீதான குற்றச்சாட்டுக்களை சிபிஐ சந்தேகத்துக்கு இடமின்றி நிரூபித்துள்ளதாக கூறி, இருவருக்கும் விதிக்கப்பட்ட தண்டனையை உறுதி செய்து தீர்ப்பளித்தார். சொத்துக்கள் சேர்த்தது குறித்து உரிய விளக்கம் அளிக்க இருவருக்கும் வழங்கிய போதிய அவகாசத்தை பயன்படுத்தாமல், சட்டத்தில் வழங்கப்பட்டுள்ள பாதுகாப்பு பிரிவுகளை பயன்படுத்த முடியாது.
புலன் விசாரணையில் உள்ள குறைபாடுகளை குற்றம் சாட்டப்பட்டவர்களுக்கு சாதகமாக பயன்படுத்துவதை அனுமதித்தால், பொது ஊழியர்கள் சட்டத்தின் பிடியில் இருந்து தப்பித்து விடுவர் எனத் தெரிவித்து, இருவரின் மேல் முறையீட்டு மனுக்களையும் நீதிபதி தள்ளுபடி செய்து உத்தரவிட்டார்.
