சென்னை: புதுச்சேரி மருத்துவக் கல்லூரி சார்பில் கடந்த 2018 ஆம் ஆண்டு சென்னை உயர் நீதிமன்றத்தில் வழக்கு தொடரப்பட்டது. அதில், 2017-18ம் ஆண்டில் 26 மாணவர்களுக்கான மருத்துவ சேர்க்கை தேசிய மருத்துவ கவுன்சில் விதிப்படி நடைபெறவில்லை எனக்கூறி, மீண்டும் மாணவர் சேர்க்கை நடத்த மருத்துவ கவுன்சில் உத்தரவிட்டது.
இதை எதிர்த்து தொடரப்பட்ட வழக்கை விசாரித்த உயர்நீதிமன்றம், மாணவர்களின் கல்வி பாதிக்கப்படும் என்பதால் எந்த நடவடிக்கையும் எடுக்கக் கூடாது என இடைக்கால உத்தரவு பிறப்பித்தது.
இதனிடையே, மருத்துவ படிப்பை முடித்த 26 மாணவர்களில் சிலர் மேல்படிப்பிலும், மற்றவர்கள் மருத்துவர்களாகவும் தொழில் புரிந்து வருகின்றனர். அதனால் தற்போது உத்தரவு பிறப்பித்தால் மாணவர்களின் எதிர்காலம் பாதிக்கப்படும் என கல்லூரி நிர்வாகம் சார்பில் கூறப்பட்டது.
இந்த வழக்கில் தேசிய மருத்துவ கவுன்சில் சார்பில் ஆஜரான வழக்கறிஞர், மாணவர்களுக்கு எந்தக் கட்டுப்பாடும் விதிக்க முடியாது. அதனால் புதுச்சேரி மருத்துவ கல்லூரி அடுத்த 2 ஆண்டுகளுக்கு சேர்க்கை நடத்த தடை விதிக்க மருத்துவ குழு முடிவு செய்துள்ளது என தெரிவிக்கப்பட்டது.
இதையும் படிங்க: "இந்த வழக்கை உடனே விசாரிக்கவில்லை என்றால் வானம் இடிந்து விழுந்துவிடுமா?" - கோபமடைந்த நீதிபதி!
இதையடுத்து, அடுத்து 2025-26 மற்றும் 2026-27 கல்வியாண்டில் வருடத்திற்கு 13 இடங்கள் என 26 நிர்வாக ஒதுக்கீட்டில் மாணவர் சேர்க்கை நடத்த அரசுக்கு இடங்கள் வழங்கப்படும். அதனால், மாணவர் சேர்க்கையை தொடர அனுமதிக்க வேண்டும் என்று கோரிக்கை விடுக்கப்பட்டது. இதை தேசிய மருத்துவ கவுன்சில் ஏற்றுக்கொண்டது.
வழக்கை விசாரித்த நீதிபதி தண்டபாணி, மருத்துவ கல்லூரி உத்தரவாதம் அளித்திருப்பதால் தேசிய மருத்துவ கவுன்சில் எந்த நடவடிக்கையும் எடுக்க கூடாது. படிப்பை முடித்த 26 மாணவர்களுக்கான நிறைவு சான்றிதழை மருத்துவ கவுன்சில் உடனே வழங்க வேண்டும். கல்லூரி உத்தரவாதத்தின் படி 26 இடங்களை அரசுக்கு வழங்க வேண்டும்.
மேலும், தரமணியில் உள்ள சிறப்பு குழந்தைகளுக்கான கல்வி நிறுவனத்துக்கு 10 லட்சம் ரூபாயும், அடையாறு புற்றுநோய் மருத்துவமனைக்கு 10 லட்சம் ரூபாயும் 2 வாரத்தில் வழங்க வேண்டும் என புதுச்சேரி மருத்துவ கல்லூரிக்கு உத்தரவிட்டு வழக்கை முடித்து வைத்தார்.
