தூத்துக்குடி: தூத்துக்குடி மாவட்டம், எட்டயபுரம் அருகே உள்ள ரணசூர் நாயக்கன்பட்டி கிராமத்தைச் சேர்ந்தவர் மீனாட்சி சுந்தரம். இவரது மனைவி வாணி (56). இவர்களுக்கு சக்திவேல், சந்தானவேல் என்ற 2 மகன்கள் உள்ளனர். இருவருக்கும் திருமணமாகி விட்ட நிலையில், சக்திவேல் சென்னையில் வேலை பார்த்து வருகிறார்.
சந்தானவேல் ரணசூர் நாயக்கன்பட்டியில் விவசாயம் செய்து வருகிறார். இந்த நிலையில், நேற்று முன் தினம் மாலை வீடு பூட்டி இருப்பதை கண்டு அருகில் இருந்தவர்கள், சந்தானவேலுக்கு தகவல் கொடுத்துள்ளனர். இதையடுத்து, சந்தானவேல் வீட்டிற்கு வந்து பார்த்த போது வீடு பூட்டி இருப்பதும், வீட்டிற்குள் இருந்து முனங்கல் சத்தம் வருவதை கேட்டதும், கதவினை உடைத்து பார்த்த போது கழுத்தில் காயத்துடன் அவருடைய தாயார் வாணி மயக்க நிலையில் இருப்பதை கண்டு அதிர்ச்சியடைந்தார்.
இதையடுத்து சந்தானவேல் தாயார் வாணியை மீட்டு கோவில்பட்டியில் உள்ள தனியார் மருத்துவமனையில் சிகிச்சைக்கு அனுமதித்தார். அங்கு தீவிர சிகிச்சை பிரிவில் வாணிக்கு சிகிச்சை அளிக்கப்பட்டு வருகிறது. மேலும், கழுத்தில் இருந்த 7 பவுன் தங்க செயின் காணமால் இருப்பது தெரிய வந்தது.
இந்நிலையில், நேற்று காலை கண்விழித்த வாணி, தன்னுடைய மகன் சந்தானவேலிடம் பேசியுள்ளார். தனது வீட்டின் அருகில் இருக்கும் சுடலை முத்து தான் கழுத்தில் கயிறு போட்டு இறுக்கி நகை பறித்து சென்றதாக கூறியுள்ளார். இதையடுத்து, எட்டயபுரம் காவல் நிலையத்தில் சந்தானவேல் புகார் அளித்தார்.
இதனை தொடர்ந்து போலீசார் வாணியிடம் விசாரணை நடத்தினர். விசாரணையில் வாணியின் வீட்டு அருகே வசித்து வரும் பரமசிவம் என்பவரது மகன் சுடலை முத்து, லோடுமேனாக பணியாற்றி வருகிறார். அருகில் உள்ள வீடு என்பதால் சுடலை முத்து வாணி வீட்டில் உள்ள எல்லோருடன் சகஜமாக பழகுவது மட்டுமின்றி, அடிக்கடி வீட்டுக்கு வருவதும் வழக்கம் என்று தெரிகிறது.
அது போல சம்பவத்தன்று வாணி வீட்டிற்கு வந்த சுடலை முத்து சிறிது நேரம் பேசிகொண்டு இருந்துள்ளார். கழுத்தில் சுடலை முத்து கயிறு ஒன்று போட்டு இருந்தாக தெரிகிறது. அது பற்றி வாணி கேட்டதற்கு தான் காட்டிற்கு போவதாக கூறியுள்ளார். மேலும் தனக்கு டீ வேண்டும் என்று சுடலை முத்து கேட்க, வாணியும் டீ போட்டு கொடுத்துள்ளார்.
டீயை குடித்த அடுத்த நொடியே சுடலை முத்து வாணியை தாக்கியது மட்டுமின்றி, தான் கொண்டு வந்த கயிற்றை வாணி கழுத்தில் போட்டு இறுக்கியுள்ளார். இதில் வாணி மயக்கமடைந்தும், அவர் இறந்து விட்டார் என நினைத்து அவருடைய கழுத்தில் இருந்த 7 பவுன் நகையை எடுத்து கொண்டு கதவினை வெளிப்புறமாக பூட்டி விட்டு காட்டிற்கு சென்றது தெரிய வந்தது.
அது மட்டுமின்றி வாணியின் வீட்டிற்கு சென்று நகை பறிப்பதற்கு முன்பு சந்தானவேலுக்கு செல்போனில் தொடர்பு கொண்ட சுடலை முத்து, மருத்துவமனையில் சிகிச்சை பெற்று வரும் சந்தானவேலின் குழந்தைகளின் நலன் குறித்து கேட்டுள்ளார். மேலும், சந்தானவேலின் டிராக்டர் பழுது ஏற்பட்டு நிற்பதால் தான் இன்று சும்மாதான் இருப்பதாகவும், சரி பார்க்கவா? என்று சந்தானவேலிடம், சுடலை முத்து கேட்டுள்ளார். அதற்கு சந்தானவேல், நான் இன்றைக்கு வர வாய்ப்பு இல்லை, நாளைக்கு வந்த பின்னர் பார்த்து கொள்வதாக கூறியுள்ளார்.
இதனால், வீட்டில் வாணி தானியாக இருக்கிறார். யாரும் வர மாட்டார்கள், வாணியை கொலை செய்து விட்டு நகையை திருடி விடலாம் என்று திட்டம் தீட்டி தான் திருட்டு சம்பவத்தினை அரங்கேற்றியுள்ளார். ஆனால், அதிர்ஷ்டவசமாக வாணி உயிர் பிழைத்து கொண்டதால், சுடலை முத்து மாட்டிக்கொண்டார்.
மேலும், வாணியிடம் இருந்து நகையை பறித்து விட்டு, வெளியே சென்ற சுடலை முத்து, சிறிது நேரம் கழித்து சந்தானவேலுக்கு செல்போனில் தொடர்பு கொண்டு, வீடு பூட்டி இருக்கு, அம்மாவும் மருத்துவனைக்கு வந்துள்ளார்களா என்று கேட்டதாக கூறப்படுகிறது. இது குறித்து வழக்கு பதிவு செய்த எட்டயபுரம் போலீசார், சுடலை முத்துவினை கைது செய்து, அக்கிராமத்தில் மரத்திற்கு அடியில் பதுக்கி வைத்து இருந்த 7 பவுன் தங்க நகையை பறிமுதல் செய்தனர்.
போலீசார் சுடலை முத்துவிடம் விசாரித்தில், கடன் அதிகமான காரணத்தினால் நகையை பறித்தாக கூறியுள்ளார். இதையடுத்து போலீசார் சுடலை முத்துவை சிறையில் அடைத்தனர். நல்லவர் போல குடும்பத்துடன் பழகி, பெண்ணின் கழுத்தை நெரித்து 7 பவுன் தங்க நகையை லோடுமேன் பறித்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
