தஞ்சாவூர்: தஞ்சாவூர் மாவட்டம், திருவையாறு தியாகராஜர் ஆராதனை விழாவை முன்னிட்டு, நேற்று (ஜன. 30) தஞ்சை மாவட்டத்திற்கு, மாவட்ட ஆட்சியர் தீபக் ஜேக்கப் உள்ளூர் விடுமுறை அறிவித்தார்.
இந்நிலையில் விடுமுறையையொட்டி, கும்பகோணம் அரசு கலைக் கல்லூரியில் மூன்றாம் ஆண்டு பயிலும் பிபிஏ(BBA) மாணவர்கள் 14 பேர் ஒன்றிணைந்து தனிப்பட்ட முறையில், காரைக்காலுக்குச் சுற்றுலா வந்துள்ளனர். அப்போது கடலில் அனைவரும் ஆனந்தமாகக் குளித்து, விளையாடி மகிழ்ந்துள்ளனர். இந்நிலையில் ஹேமமாலினி என்ற கல்லூரி மாணவி கடலில் குளிக்கும் போது, எதிர்பாராவிதமாக கடல் அலையால் இழுத்துச் செல்லப்பட்டதாக கூறப்படுகிறது.
இதனைக் கண்டு அதிர்ச்சியடைந்த சக மாணவர்களான அபிலாஸ் மற்றும் ஜெகதீஸ்வரன் ஆகிய இருவரும் ஹேமமாலினியைக் காப்பாற்றும் நோக்கில் கடலுக்குள் சென்ற போது, அவர்களும் கடல் அலையில் சிக்கி மாயமானதாக கூறப்படுகிறது. இதுகுறித்த தகவல் போலீசாருக்கு தெரிவிக்கப்பட்டது. பின்னர் போலீசார் தலைமையில் கடலில் குளிக்கச் சென்றவர்களைத் தேடும் பணி தீவிரமாக நடைபெற்றது.
இந்த தேடுதல் பணியில், ஹேமமாலினியின் உடல் மீட்கப்பட்டு அரசு மருத்துவமனைக்குக் கொண்டு செல்லப்பட்டது. அப்போது ஹேமமாலினியின் உடலைப் பரிசோதித்த மருத்துவர்கள் மாணவி ஏற்கனவே உயிரிழந்து விட்டதாகத் தெரிவித்தனர். தொடர்ந்து, காப்பாற்றச் சென்ற மாணவர் ஜெகதீஸ்வரன் உடல் மீட்கப்பட்டது. மேலும், மாயமான மாணவர் அபிலாஸ் தேடப்பட்டு வரும் நிலையில், மூன்று பேரும் உயிரிழந்து விட்டதாக, சக மாணவர்கள் பேனர் வைத்து அவர்களுக்கு அஞ்சலி செலுத்தி வருவது குறிப்பிடத்தக்கது.
இந்த சம்பவம் குறித்து போலீசார் விசாரணை நடத்தியதில், உயிரிழந்த மாணவி ஹேமமாலினி கும்பகோணம் அருகே உள்ள சீனிவாசநல்லூர் அண்ணா நகரைச் சேர்ந்தவர் என்றும், அவரது தந்தை சுந்தரேசன் என்றும் தெரியவந்தது. மேலும், உயிரிழந்த மற்றொரு மாணவரான ஜெகதீஸ்வரன், கும்பகோணம் அருகே உள்ள வளையப்பேட்டை அக்ரஹாரம் நேதாஜி நகரைச் சேர்ந்த லெனின் என்பவரது மகன் என்பதும் தெரியவந்தது.
அதேபோன்று கடலில் மாயமான மாணவர் அபிலாஸ், திருவாரூர் மாவட்டம், வடமட்டம் கிராமம் தெற்கு வீதியைச் சேர்ந்த அஜய்குமார் என்பவரது மகன் என்றும் விசாரணையில் தெரிய வந்தது. இச்சம்பவம் கல்லூரி மாணவர்கள் மற்றும் பெற்றோர்கள் மத்தியில் பெரும் சோகத்தை ஏற்படுத்தி உள்ளது.
இந்நிலையில், இன்று (ஜன.31) காலை சம்பந்தப்பட்ட கும்பகோணம் அரசு கலைக்கல்லூரி வளாகத்தில், கல்லூரி முதல்வர் மாதவி தலைமையில், ஆயிரக்கணக்கான கல்லூரி மாணவர்கள் மற்றும், பேராசிரியர்கள் ஒன்று கூடி உயிரிழந்தவர்களின் ஆத்மா சாந்தி அடைய இரு நிமிடம் மௌன அஞ்சலி செலுத்தினர்.
இதைத்தொடர்ந்து கல்லூரி முதல்வர் மாதவி கல்லூரியின் அனைத்து வகுப்புகளும் இன்று (ஜன.31) ரத்து செய்யப்படுவதாக அறிவித்ததைத் தொடர்ந்து மாணவர்கள் அனைவரும் அமைதியாகக் கலைந்து சென்றனர்.
இதையும் படிங்க: இலங்கையிலிருந்து சென்னைக்கு கடத்தி கொண்டு வரப்பட்ட ரூ.3.3 கோடி மதிப்புடைய 5.5 கிலோ தங்கம் பறிமுதல்..!
