சென்னை: தன்னுடைய சுய விளம்பரத்தின் மூலமாக யாரும் தலைவராக முடியாது. இதுபோன்ற அற்பத்தனமான செயல்களில் ஈடுபடுபவர்களை மக்கள் தலைவராக ஏற்றுக்கொள்ள மாட்டார்கள் என பாஜக மாநில தலைவர் அண்ணாமலையின் சாட்டை அடி சம்பவம் குறித்து, இந்திய கம்யூனிஸ்ட் கட்சியின் தமிழ்நாடு மாநில செயலாளர் முத்தரசன் கருத்து தெரிவித்துள்ளார்.
முன்னாள் பிரதமர் டாக்டர் மன்மோகன் சிங் நேற்று (டிசம்பர் 26) வியாழக்கிழமை இரவு காலமாகியுள்ளார். அவரது மறைவுக்கு அரசியல் தலைவர்கள் தங்களது இரங்கலைத் தெரிவித்து வருகின்றனர். இந்த நிலையில், சென்னை சத்தியமூர்த்தி பவனில் மறைந்த மன்மோகன் சிங் திருவுருவப்படத்திற்கு இந்திய கம்யூனிஸ்ட் கட்சியின் தமிழ்நாடு மாநிலச் செயலாளர் முத்தரசன், இந்திய மார்க்சிஸ்ட் கம்யூனிஸ்ட் கட்சியின் மாநிலச் செயலாளர் கே.பாலகிருஷ்ணன் ஆகியோர் மலர் தூவி மரியாதை செலுத்தியுள்ளனர்.
பின்னர், செய்தியாளர்களைச் சந்தித்து இந்திய மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயலாளர் கே.பாலகிருஷ்ணன் பேசியதாவது, “பிரதமராக பத்தாண்டு காலம் பொறுப்பு வகித்து நாட்டிற்காக தன்னை முழுமையாக அர்ப்பணித்துக் கொண்டவர் மன்மோகன் சிங். உலக அளவில் தலைசிறந்த பொருளாதார நிபுணராக விளங்கியதுடன் அரசியலில் நிர்ணயத்திற்கு எடுத்துக்காட்டாக திகழ்ந்தவர்.மகாத்மா காந்தி ஊரக வேலைவாய்ப்பு திட்டத்தை மன்மோகன் சிங் நிறைவேற்றினார்” என்றார்.
இதையும் படிங்க: பொருளாதார மேதை முன்னாள் பிரதமர் மன்மோகன் சிங் காலமானார்.. பிரதமர் மோடி, காங்கிரஸ் தலைவர் மல்லிகார்ஜூன கார்கே இரங்கல்!
தொடர்ந்து, இந்திய கம்யூனிஸ்ட் கட்சியின் தமிழ்நாடு மாநில செயலாளர் முத்தரசன் பேசுகையில் ,”முன்னாள் பிரதமர் மன்மோகன் சிங் இழப்பு என்பது மிகவும் கவலைக்குரியது. இடதுசாரிகளின் அனைத்து கோரிக்கைகளையும் நிறைவேற்றிக் கொடுத்தார். எளிய வாழ்க்கை வாழ்ந்தவர், நாடாளுமன்றத்தில் ஒரு முன்மாதிரியாக திகழ்ந்தார்.
அரசியலில் முன்மாதிரி:
நாடாளுமன்ற தேர்தலில் அரசியல் காரணமாக ஒருவர் இவர் மீது தகாத வார்த்தைகளை பேசிய பொழுதிலும், எந்த விதத்திலும் கோபம் கொள்ளாத இவர், பொறுமையாக கத்திபேசுவதால் எந்த பயனுமில்லை என கூறினார்.அதைக் கேட்டு எதிர்த்து பேசியவர் அதிர்ந்து போனார். அரசியலில் முன்மாதிரியாக திகழ்ந்த அவரின் மறைவு என்பது மிகவும் வேதனைக்குரியது” என்றார்.
லண்டன் சென்று வந்ததால் பாதிப்பு?
தொடர்ந்து அண்ணாமலை சாட்டையால் அடித்துக்கொண்டது குறித்து கேட்கப்பட்ட கேள்விக்கு பதில் அளித்த அவர், “அண்ணாமலை சாட்டையை வேறு ஒருவரிடம் கொடுத்து அடிக்கச் சொல்லி இருக்க வேண்டும். வெப்ப காலத்தில் சில பேருக்கு உடல் ரீதியாக பாதிப்பு ஏற்படும். ஆனால், இது டிசம்பர் மாதம் குளிர்காலம் என்பதால் இந்த நேரத்தில் இது போன்ற பாதிப்புகள் ஏதும் ஏற்படாது. ஒருவேளை லண்டன் சென்று படித்து வந்ததால் அண்ணாமலைக்கு இதுபோன்ற பாதிப்புகள் ஏற்பட்டிருக்கும் என நினைக்கிறேன்.
இதையும் படிங்க: "லண்டனில் இருந்து திரும்பியபின் என் பாதை தெளிவாக இருக்கின்றது"-சாட்டையடி போராட்டத்துக்குப் பின் அண்ணாமலை பேட்டி!
தன்னுடைய சுய விளம்பரத்தின் மூலமாக யாரும் தலைவராக முடியாது. இதுபோன்ற அற்பத்தனமான செயல்களில் ஈடுபடுபவர்களை மக்கள் தலைவராக ஏற்றுக்கொள்ள மாட்டார்கள். மக்களோடு சென்று மக்களுக்காக பணியாற்றி, மக்களுக்காக வாழ்பவரே சிறந்த தலைவராக இருக்க முடியும்.
செருப்பை கழற்றி எரிந்து வெறும் காலோடு செல்வது அண்ணாமலை தன்னை விளம்பரப்படுத்திக் கொள்ள வேண்டும் என்பதற்காக மேற்கொள்ளப்படும் விளம்பர போக்கு. அண்ணா பல்கலைக்கழக சம்பவம் மிகவும் கண்டிக்கத்தக்கது. ஆனால், 24 மணி நேரத்தில் காவல் துறை உரிய குற்றவாளியை கைது செய்து நடவடிக்கை மேற்கொண்டு வருகின்றது” இவ்வாறு அவர் தெரிவித்துள்ளார்.
