சென்னை: சென்னை தொழில்நுட்பக் கழகம், பணிபுரியும் தொழில் வல்லுநர்களுக்காக மின்வாகனப் போக்குவரத்து எனப்படும் இ-மொபிலிட்டியில் தொழில் சார்ந்த இணையவழி எம்.டெக் படிப்பை அறிமுகப்படுத்தியுள்ளது. தொழில் வல்லுநர்களுக்கான உள்ளடக்கங்கள் இடம்பெற்றிருப்பது பாடநெறியின் தனித்துவம் வாய்ந்த அம்சமாகும். கல்வி மற்றும் தொழில்துறை நிபுணர்களின் உள்ளீடுகளுடன் உருவாக்கப்பட்ட இந்த எம்.டெக் பாடத்திட்டம், தொழில்துறையின் தேவை அடிப்படையில் தொடர்ந்து மேம்படுத்தப்படும்.
வரும் செப்டம்பர் மாதம் தொடங்க உள்ள இப்பிரிவில் சேர்வதற்கு, மே 26ஆம் தேதி வரையில் விண்ணப்பம் செய்யலாம். பாடத்திட்டம் குறித்த விவரங்களை https://code.iitm.ac.in/emobility என்ற இணையதளத்தில் பெற்றுக் கொள்ளலாம் என சென்னை ஐஐடி சார்பில் தெரிவிக்கப்பட்டுள்ளது.
இந்தப் பாடத்திட்டம் குறித்து சென்னை ஐஐடி இயக்குனர் காமகோடி கூறும்போது, “இ-மொபிலிட்டி களத்தில் பணிபுரியும் தொழில் வல்லுநர்களுக்கு சான்றிதழ் படிப்புகள் மூலம் திறன் மேம்பாட்டுத் திட்டங்களை அளிப்பதில் சென்னை ஐஐடி முன்னணியில் இருந்து வருகிறது. இப்பாடத்திட்டத்தின் இயற்கையான பின்தொடர்தலாக எம்.டெக் படிப்பைத் தொடங்க வேண்டும் என பங்கேற்பாளர்களும், மோட்டார் வாகனத் தொழில்துறையினரும் கோரிக்கை வைத்திருந்தனர்.
மனிதவள மேம்பாட்டை இக்களத்தின் மூலம் விரைவுபடுவதற்கான எங்களது பணியை மேலும் ஊக்குவிக்கும் என்பதால் WEMEM-ஐ அறிமுகப்படுத்துவதில் மிகுந்த மகிழ்ச்சியடைகிறோம். சென்னை ஐஐடியின் அவுட்ரீச் மற்றும் டிஜிட்டல் எஜுகேஷன் சென்டர் மூலம் வழங்கப்படும் இந்த பட்டப்படிப்பு, சென்னை ஐஐடியில் இருந்து எம்.டெக் பட்டம் பெறுவதற்கு எதிர்பார்க்கப்படும் தேவைகளை நிறைவு செய்யும் வகையில் வடிவமைக்கப்பட்டுள்ளது.
சென்னை ஐஐடி பொறியியல் வடிவமைப்புத் துறை WEMEM-ஐ ஒருங்கிணைக்கும் பணியில் ஈடுபட்டிருக்கிறது. ஒரு காலண்டர் ஆண்டில் 3 கல்விப் பருவங்களுடன் மொத்தம் 7 கல்விப் பருவங்களைக் கொண்டதாக இப்பாடத்திட்டம் அமைந்திருக்கும். வரும் செப்டம்பர் மாதம், முதல் தொகுதிக்கான வகுப்புகள் தொடங்கும்.
அடிப்படைக் கணிதம் மற்றும் இயற்பியல் கோட்பாடுகள் ஆகிய பாடங்களில் நடைபெறும் தேர்வின் அடிப்படையில் பங்கேற்பாளர்கள் தேர்வு செய்யப்படுவார்கள். வார நாட்களில் பங்கேற்பாளர்கள் பணியில் இருப்பார்கள் என்பதால், சனிக்கிழமைகளில் ஆசிரியர்களுடன் அவர்கள் நேரடி வகுப்புகளில் அவசியம் கலந்து கொள்ள வேண்டும்” எனத் தெரிவித்தார்.
இதையும் படிங்க: இன்ஜினியரிங் சேர விருப்பமா? அண்ணா பல்கலை துணைவேந்தரின் வழிகாட்டுதல்கள்! - How I Choose Engineering
