சென்னை: 'மெட்ராஸ் டே' என்பது ஆண்டு தோறும் ஆகஸ்ட் 22 ஆம் தேதி சென்னை மக்களால் கொண்டாடப்பட்டு வருகிறது. கடந்த 1639 ஆம் ஆண்டு ஆகஸ்ட் 22 ஆம் நாள் ஆங்கிலேய கிழக்கிந்திய கம்பெனி சென்னையை கண்டுபிடித்தனர் என்று கூறப்படுகிறது அந்த நாளை கடந்த 2004 ஆம் ஆண்டில் இருந்து ஒவ்வொரு வருடமும் சென்னை மக்களால் 'மெட்ராஸ் டே' என்று விமர்சையாக கொண்டாடப்பட்டு வருகிறது.
இப்படிப்பட்ட சென்னை, புலியூர் கோட்டம் என்ற பெயரில் தான் இருந்தது என்று கேட்டால் நம்மால் நம்ப முடியுமா? ஆம். சென்னையின் முந்தைய பெயர் 'புலியூர் கோட்டம்' இந்த பெயர் எவ்வாறு வந்தது? பின்னர் சென்னையாக உருமாறியது என்பதை ஈடிவி பாரத் வாயிலாக எடுத்துரைக்கிறார் வரலாற்று ஆராய்ச்சியாளர் ரங்கராஜன்.
பழங்குடிகள் ஆட்சி செய்த சென்னை: "புலியூர் கோட்டம் என்பதே சென்னையின் பழைய பெயர், திருமயிலை, திருவான்மியூர், வேளச்சேரி, மணிமங்கலம், மாங்காடு, திருநீர்மலை உள்ளிட்ட முக்கிய நகரங்கள் அனைத்தும் புலியூர் கோட்டம் என்ற பிரிவில் உள்ள ஊர்கள் என்று கூறும், ரங்கராஜன், சென்னையை ஆட்சி செய்தவர்கள் குறும்பர்கள் என்று சொல்லகூடிய பழங்குடியினத்தவர்கள் என்ற தகவலையும் நமக்கு அறிமுகம் செய்கிறார்.
பழங்குடியினர் தாங்கள் ஆட்சி செய்த பகுதியை 24 கோட்டங்களாகப் பிரித்ததாகவும் அதில், ஒன்று தான் தற்போது நாம் சென்னை என்று அழைக்கும் புலியூர் கோட்டம் என்றும் அதன் கீழ் ஆதம்பாக்கம், ஆலந்தூர், வேளச்சேரி, தாம்பரம், மணிமங்கலம், மயிலாப்பூர், திருவான்மியூர், அண்ணாநகர் பகுதிகள், மணலி போன்ற இடங்கள் அவற்றின் கீழ் இருந்துள்ளது. சென்னைக்கு அருகிலுள்ள திருவள்ளூர் மாவட்டப் பகுதிகள் புழல் கோட்டம் என்று அழைக்கப்பட்டது என வரலாற்று உண்மைகளை எடுத்துரைத்து ஆச்சர்யத்தில் ஆழ்த்தினார்.
இதற்கான ஆதாரங்களாக கர்னல் மெக்கென்சி என்ற ஆங்கிலேயர் இந்தியாவின் முதல் சர்வேயர் ஜெனரலாக பணியாற்றியதையும், அவர் திரட்டிய ஆவணங்கள், வரலாற்று குறிப்புகள் தற்போது சென்னை அண்ணா நூலகத்தில் உள்ள 'oriental manuscripts' என்ற பிரிவில் மெக்கென்சியின் தொகுப்புகளாக உள்ளதை எடுத்துரைத்தார்.
சித்தராமையாவின் முன்னோர்கள் ஆண்ட சென்னை: 2000 ஆண்டுகளுக்கு முன்னர் குறும்பரால் இந்த புலியூர் கோட்டம் ஆட்சி செய்யப்பட்டிருக்கிறது. அவர்கள் தற்போது அதிகமாக நீலகிரி மாவட்டத்திலும், கர்நாடக பகுதிகளிலும் வசிக்கின்றனர். தற்போது கர்நாடக முதலமைச்சர் சித்தராமையாவின் மூதாதையர்கள் இந்த குறும்பர் வழி தோன்றலில் வந்தவர்கள் தான் என்ற புதிய தகவலை கூறினார்.
சென்னையின் மையப்பகுதியாக விளங்கும் வடபழனி, கோடம்பாக்கம் தான் அப்போதைய புலியூர். அந்த பகுதியில் இப்பொழுதும் கூட புலியூர் மெயின் ரோடு உள்ளதை பார்க்க முடியும் என்றும் பல்வேறு ஆதாரங்கள் அந்த பகுதியைச் சுற்றியுள்ள சிவன் கோயில்களின் கல்வெட்டுகளில் நாம் பார்க்கலாம் என்று கூறுகிறார் ரங்கராஜன்.
சென்னை பெயர் வந்த வரலாறு: புலியூர் கோட்டத்தை பல சோழர்கள், பல்லவர்கள், பாண்டியர்கள், டச்சுக்காரர்கள், சாம்பவர்கள், விஜயநகர மன்னர்கள், நாயக்கர்கள் என பல்வேறு மன்னர்கள் ஆட்சி செய்தனர். இறுதியாக வந்தவாசியை தாமல் வெங்கடப்பா நாயக்கர் என்பவரும் பூந்தமல்லியை தாமல் அய்யப்ப நாயக்கரும் ஆண்டனர். இவர்களுடைய தந்தை சென்னப்ப நாயக்கர் இவர்களுக்கு ஆட்சி செய்வதற்கு தான் ஆண்ட பகுதியை இரண்டு குறு நிலங்களாக பிரித்து கொடுத்துள்ளார். அதில் அவர் ஆட்சி செய்த பகுதியினை சென்னப்ப பட்டினம் என்று அனைவரும் அழைத்தனர். இந்த பெயரே நாளடைவில் சென்னை என்று மருவியது.
கிழக்கு இந்திய கம்பெனியினர் பிரான்சிஸ் டே என்பவர் தாமல் வெங்கடப்பா நாயக்கரிடம் இருந்து ஒரு சிறு நிலத்தை வாங்கிக் கொண்டார். அதன் வடக்கு பகுதியில் சில மீனவக் குடும்பங்களும், இரு பிரெஞ்சு பாதிரியார்களும் வசித்தனர். அந்த கிராமத்தின் ரோமன் கத்தோலிக்க தலையாரியின் பெயர் மாதராஸன் ஆகும். எனவே அந்த கிராமம் மாதராஸ்பட்டினம் என்றும் வழங்கப்பட்டதாகக் வரலாற்று ஆய்வுகள் கூறுகின்றன. இந்த பெயரும் நாளடைவில் மெட்ராஸ் என்று சுருக்கி ஆங்கிலேயர்களால் அழைக்கப்பட்டு வந்தது.
சென்னப்ப பட்டினம் தெற்கேயும், மதராசப்பட்டினம் வடக்கேயும் இருந்ததால் இரண்டு பகுதிகளையும் இணைத்து ஒரே பெயராக மெட்ராஸ் என்று அழைத்தனர். இப்படி மாபெரும் வரலாற்றை கொண்ட சென்னை ஆங்கிலயேலர்கள் வந்த பிறகுதான் இங்கு முக்கியமான இடமாக மாறியதாக வரலாற்றை சுருக்கப் பார்க்கிறார்கள் என்றும் ஆனால் சென்னை என்பது கடந்த 2000 வருடங்கள் தொன்மையான நகரமாக விளங்கியதையும் நமக்கு வரலாற்றின் வழியே எடுத்துரைத்தார் ஆராய்ச்சியாளர் ரங்கராஜன்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க : எருமை தான் எனக்கு வாகனம்: மாற்றுத்திறனாளியின் அதிரடி முடிவுக்கு காரணம் என்ன? - disabled old man request
