தருமபுரி: தருமபுரி மாவட்டம் தொப்பூர் வனச்சாலையில் அடிக்கடி விபத்து ஏற்பட்டு வருவது வழக்கமாக உள்ளது. இதனிடையே, மத்திய அரசு ரூ.750 கோடியில் மேம்பாலம் அமைக்கும் பணி நடைபெறும் என அறிவித்திருந்தது. இந்நிலையில், கிருஷ்ணகிரி முதல் சேலம் மாவட்டம் எல்லை வரை உள்ள 86 கிலோ மீட்டர் சாலையில் மேம்பாட்டுப் பணி தொப்பூர் சுங்கச்சாவடி வரை முடிந்த நிலையில், தற்போது தொப்பூர் வனப்பகுதியில் சாலை போடும் பணி நடைபெற்று வருகிறது.
இதற்காக தொப்பூர் வனச் சாலையில் இருவழிப் பாதையை ஒருவழிப் பாதையாக மாற்றி, அந்த வழியாக வாகனங்கள் சென்று வருகிறது. இந்த நிலையில், இன்று காலை தருமபுரி அரசு நகரப் பேருந்து ஆஞ்சநேயர் கோயில் அருகில் செல்லும் பொழுது, பேருந்தின் பிரேக் பழுதானதால், எதிரே சேலத்தில் இருந்து ஓசூர் நோக்கிச் சென்ற லாரியின் மீது மோதியது.
இதில், அரசுப் பேருந்தின் முன்பகுதி முற்றிலும் சேதம் அடைந்தது. லாரியின் ஓட்டுநர்களான சேலம் அரியலூர் பகுதியைச் சேர்ந்த கிருஷ்ணன் (27) மற்றும் எடப்பாடி கொல்லப்பட்டியைச் சேர்ந்த அருண் (23), சேலம் அரியலூர் பகுதியைச் சேர்ந்த முதலாம் ஆண்டு படித்து வரும் கல்லூரி மாணவன் கண்ணன் (19) ஆகிய மூன்று இளைஞர்கள் பலத்த காயமடைந்தனர். பின்னர், அவர்களை சுங்கச்சாவடி ஊழியர்கள் மீட்டு, தருமபுரி அரசு மருத்துவக் கல்லூரி மருத்துவமனைக்கு சிகிச்சைக்காக அனுமதித்துள்ளனர்.
இதில் பேருந்தில் பயணம் செய்த பள்ளி மாணவர்கள் 13 பேர் மற்றும் பொதுமக்களுக்கு எந்தவித பாதிப்பும் இன்றி அதிர்ஷ்டவசமாக உயிர்த்தப்பினர். இந்த விபத்து குறித்து தொப்பூர் போலீசார் வழக்குப்பதிவு செய்து விசாரித்து வருகின்றனர். மேலும், தேசிய நெடுஞ்சாலை மேம்பாட்டுப் பணி நடைபெற்று வருவதால், ஒருவழிப் பாதையாக மாற்றப்பட்டு வாகனங்கள் இயக்கப்படுகிறது.
இதனால் தினந்தோறும் தொப்பூர் வனப்பகுதி வெள்ளக்கல் பகுதியில் இருந்து இரட்டைப் பாலம் வரை 2 முதல் 5 கிலோமீட்டர் தூரத்திற்கு போக்குவரத்து பாதிப்பு ஏற்பட்டு, வாகன ஓட்டிகள் பெரும் அவதிக்குள்ளாகி வருகின்றனர்.
இதையும் படிங்க: பழுதாகி நின்ற லாரியின் பின்னால் மோதிய பேருந்து.. ஓட்டுநர் கவலைக்கிடம்!
