சென்னை: கள்ளக்குறிச்சி விஷச்சாராய வழக்கு சிபிஐ விசாரணைக்கு மாற்றப்பட்டு இருப்பது குறித்து அரசு சட்டப்படி நடவடிக்கை மேற்கொள்ளும் என தி.மு.க செய்தித் தொடர்பாளர் டி.கே.எஸ் இளங்கோவன் தெரிவித்துள்ளார்.
அண்ணா அறிவாலயத்தில் திமுக தலைவர் மு.க ஸ்டாலின் தலைமையில் திமுக உயர்நிலை செயல்திட்டக் குழுக் கூட்டம் இன்று நடைப்பெற்றது.
இக்கூட்டத்தில், சட்டமன்ற தேர்தலுக்கு தயாராகும் வகையில் தேர்தல் பிரச்சாரங்களை இன்றே துவக்க வேண்டும் என்றும் மத்திய வருவாயில் மாநில அரசுக்கு 50% நிதி பகிர்வை வழங்கிட வேண்டும் உள்ளிட்ட தமிழக கோரிக்கைகளை 16வது நிதிக்குழுவின் அறிக்கையில் முழுமையாக இடம் பெற்று அதனை மத்திய அரசு ஏற்க வேண்டும் என்றும் மணிப்பூர் மாநிலத்தில் உள்ள மக்களின் பாதுகாப்பை உறுதி செய்ய வேண்டும் என்றும் தமிழ்நாட்டு மீனவர்களின் பாதுகாப்பை உறுதி செய்ய வேண்டும் என்றும் மற்ற மொழிகளை புறந்தள்ளி இந்திக்கு முக்கியத்துவம் அளிப்பது, சாதி வாரி கணக்கெடுப்பு எடுக்காமல் இருக்கும் மத்திய அரசுக்கு கண்டனம் உள்ளிட்ட 6 தீர்மானங்கள் நிறைவேற்றப்பட்டது.
இதையடுத்து செய்தியாளர்களுக்கு பேட்டியளித்த தி.மு.க செய்தித் தொடர்பாளர் டி.கே.எஸ் இளங்கோவன், '' குறிப்பிட்ட காலத்திற்குள் கூட்டம் நடைபெற வேண்டும் என்பதால் இன்றைக்கு திமுக உயர்நிலை செயல்திட்ட குழு கூட்டத்தை நடத்தி அதில் அரசியல் பிரச்சனைகள் தீர்மானமாக நிறைவேற்றப்பட்டுள்ளது என தெரிவித்தார்.
இதையும் படிங்க: ஓசூர் பயங்கரம்.. அரிவாளால் வெட்டப்பட்ட வழக்கறிஞர் ஆபத்தான நிலையில் மருத்துவமனையில் அனுமதி!
மேலும், கட்சியில் அமைப்பு ரீதியாக மாற்றங்கள் செய்வது குறித்த அதிகாரம் உயர்நிலை செயல் திட்ட குழுவுக்கு கிடையாது என்றும் அந்த அதிகாரம் பொதுக்குழுவுக்கு தான் உண்டு எனவும் கூறினார். தொடர்ந்து பேசியவர், தேர்தலுக்கு மக்களை சந்திப்பது, ஆட்சியின் சாதனைகளை மக்களிடம் கொண்டு செல்வது குறித்து ஆலோசனை வழங்கப்பட்டது என்றார்.
மேலும், திமுகவின் பொதுக்குழு நடத்துவது குறித்து விரைவில் திமுக தலைவர் முடிவெடுப்பார் எனக்கூறியவர், கள்ளக்குறிச்சி விஷச்சாராய வழக்கு சிபிஐ விசாரணைக்கு மாற்றப்பட்டு இருப்பது குறித்து அரசு சட்டப்படி நடவடிக்கை மேற்கொள்ளும் என்றும் உள்ளாட்சித் தேர்தலுக்கு அரசியல் கட்சியாக திமுக எப்போதும் தயாராகவே இருக்கிறது. நடைப்பெற்ற அனைத்து தேர்தல்களிலும் திமுக வெற்றி பெற்றுள்ளது'' என்றார்.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
