சென்னை: 2026 சட்டமன்ற தேர்தலுக்கான பணிகளை பல்வேறு கட்சிகள் தீவிரப்படுத்த துவங்கி விட்டன. திமுக தொடர்ந்து தன்னுடைய கூட்டணி கட்சிகளை தம் வசம் வைத்திருந்தாலும், தற்போது திமுக எதிரான சில கருத்துகளை விசிக உள்ளிட்ட கூட்டணி கட்சிகள் வைத்து வருகின்றன. முருகன் மாநாடு விவகாரம் கூட்டணி கட்சிகளில் சர்ச்சை ஏற்படுத்தியது.
இந்நிலையில், சென்னை வடபழனியில் உள்ள விசிக தலைமை அலுவலகத்தில் அக்கட்சியின் மாநில உயர்நிலைக்குழு கூட்டம் நடைபெற்றது. கட்சியின் தலைவர் திருமாவளவன் தலைமையில் நடைபெற்ற, இந்த கூட்டத்தில் அக்கட்சியின் துணை பொதுச்செயலாளர் ஆதவ் அர்ஜுனா, தேர்தல் கூட்டணி, திமுக உடனான உறவு உள்ளிட்ட பல்வேறு விவகாரங்களை சுட்டிக்காட்டிப் பேசினார்.
திமுக தோல்விக்கு காரணம் விசிக? அப்போது பேசிய அவர், 2016 தேர்தலில் திமுக கூட்டணி தோல்வி அடைந்ததற்கு பூரண மதுவிலக்கு என்கிற வாக்குறுதி தான் காரணம் என உதயநிதி தவறான தகவலை பதிவு செய்துள்ளார். ஆனால், தரவுகளின்படி கூட்டணியில் இருந்து விசிக வெளியேறியது தான் திமுகவின் தோல்விக்கு மிக முக்கிய காரணம் என்று அவர் கூறினார்.
தொடர்ந்து விசிக, திமுகவுக்கு எதிரான கருத்துகளை கூறி வரும் நிலையில் திமுக - விசிக உறவு எப்படி உள்ளது, வருகிற தேர்தலில் விசிக யுக்திகள் மாறுமா உள்ளிட்ட பல்வேறு கேள்விகளை மூத்த பத்திரிகையாளர் ப்ரியனிடம் ஈடிவி பாரத் முன் வைத்தது. இதற்கு பதில் அளித்த அவர், 2026 ஆம் ஆண்டு நடைப்பெற உள்ள சட்டமன்ற தேர்தலில் விடுதலை சிறுத்தைகள் கட்சியின் வியூகத்தில் பெரிதாக மாறுதல் இருக்காது.
இந்து அறநிலையத்துறை கல்வி நிலையங்களில், மதம் சார்ந்த பாடங்களை நடத்துவது உள்ளிட்ட திமுகவின் செயல்பாடுகளில் விசிகவிற்கு சில சர்ச்சை கருத்துகள் இருக்கலாம், ஆனால், அதற்காக அதிமுகவின் பக்கம் விசிக சென்றுவிடும் என கூறமுடியாது. அண்ணாமலைக்கும், எடப்பாடிக்கும் இடையே தான் தனிப்பட்ட மோதல் நடைபெறுகிறதே தவிர, ஒட்டு மொத்த அதிமுகவிற்கும், பாஜக தலைமைக்கும் இடையேயான மோதல் போல தெரியவில்லை.
பாமக திமுகவில் இணையாது: விசிக இருப்பதால் பாமக திமுகவில் இணையாது. இதன் காரணமாக தலித் வாக்குகள், வன்னியர் அல்லாதவர்கள் வாக்குகள் விசிகவிற்கு கிடைக்கிறது. 2016 ஆம் ஆண்டு தேர்தலில் விசிக 0.77% வாக்குகள் தான் வாங்கியது. அப்போது, அதிமுக கூட்டணி 40.85 % வாக்குகளும், திமுக 39.85 % கூட்டணி வாக்குகள் வாங்கியது. இதை கணக்கிட்டு விசிகவின் 0.77% வாக்குகள் திமுகவிற்கு கிடைத்திருந்தால் கடுமையான போட்டி நிலவி இருக்கும். ஆனால், திமுக ஆட்சி அமைத்திருக்கமுடியுமா என்பது உறுதியாக கூற முடியாது என்றார்.
திமுக அரசுக்கு எதிராக சில கருத்துகளை விசிக வெளிப்படையாக கூறுகிறதே என்ற கேள்விக்கு பதில அளித்த ப்ரியன், இப்போதைய சூழலில் ஒரு சில அதிருப்திகளை விசிக தெரிவித்தாலும், விசிக - திமுக உறவு சுமுகமாக தான் உள்ளது. திமுகவிற்கு சில அரசியல் நெருக்கடிகள் உள்ளது. பாஜகவை எதிர்த்து அரசியல் செய்ய வேண்டியுள்ளது. திமுக கடவுள் நம்பிக்கை இல்லாதவர்கள் என கூறி இந்துக்களின் வாக்குகளை வாங்க பாஜக நினைக்கிறது. அதனால், திமுக சில அரசியல் நடவடிக்கை எடுக்கிறார்கள். இது திருமாவளவனுக்கு தெரியும். இருந்தும் எதிர்ப்பு பதிவு செய்ய வேண்டியுள்ளதால் சிலவற்றை விசிக எதிர்க்கிறார்கள். இதனால் பிளவு ஏற்படும் என கூற முடியாது.
நாம் தமிழர் - தவெக: விஜய் செல்வாக்கு இதுவரை தெரியவில்லை, அவருடைய வாக்கு வங்கி தெரியாத காரணத்தினால் அவரை நம்பி திருமாவளவன் செல்ல மாட்டார். விஜய் தேர்தலில் நின்று தனக்கான வாக்கு வங்கியை காண்பித்து விட்டால் அடுத்த முறை கூட்டணி சேர வருவார்கள். முதல் முறையிலேயே விஜய் 30% வாக்குகள் வாங்கி ஆட்சி அமைக்க முடியுமா என்றால் முடியாது, நாம் தமிழர் கட்சி - விஜய் கட்சி என்றால் யார் தலைமை தாங்குவது என்ற கேள்வி வரும்.
அதிமுக, பாஜகவுடன் விஜய் இணைந்தால் ஊழல் கட்சிகள், மதவாத கட்சிகள் உடன் இணைந்தார் என கூறி விஜய் அரசியல் வாழ்க்கை காலி ஆகிவிடும். விசிகவுடன் விஜய் இணைந்தால் 4 தொகுதிகளிலும் வெற்றி பெறுவது சிரமம், எனவே ஏற்கனவே வெற்றி கூட்டணியில் இருக்கும் போது விசிக புதிய கூட்டணிக்கு சென்று பரிசோதனை செய்துகொள்ளமாட்டார்கள்.
விஜய் தனியாக நிற்பதற்கான கட்டாயம் ஏற்படும், அப்போது தான் அவருடைய வாக்கு வங்கி அவருக்கும் தெரியும். அதன் பிறகு தான் மற்ற கட்சிகளின் பார்வை மாறும். அதிமுக வலிமை இழந்துள்ளதால் அவர்களுடன் கூட்டணி வைக்க மற்ற கட்சிகள் போக சிந்திக்கிறார்கள்.
விசிகவிற்கு திமுக 5 தொகுதி கொடுத்தால் 5 தொகுதிகளிலும் வெற்றி பெறும். அதிமுக 10 தொகுதி கொடுத்தால் விசிக 1 தொகுதியில் தான் வெற்றி பெறும். எனவே, விசிக திமுக பக்கம் தான் நிற்பார்கள். 2026 ஆம் ஆண்டும் திமுக வெற்றி பெறும் என்ற சூழல் தான் தற்போது வரை நிலவுகிறது" என்று ப்ரியன் கூறினார்.
இதையும் படிங்க: சான் பிரான்சிஸ்கோ மாநாட்டில் 6 நிறுவனங்கள் ரூ.900 கோடி; 4,300 பேருக்கு வேலை: தமிழக அரசு அறிவிப்பு
