சென்னை : தமிழ்நாடு அரசு கல்லூரி ஆசிரியர் கழகத்தின் பொதுச் செயலர் சுரேஷ் வெளியிட்டுள்ள அறிக்கையில், "சிதம்பரம் அண்ணாமலை பல்கலைக்கழகத்தில் கடந்த 2000ம் ஆண்டிற்கு பின் முறையான பணியமர்த்துதல் நடவடிக்கைகளை மேற்கொள்ளாமலும், இட ஒதுக்கீட்டினை பின்பற்றாமல் அனுமதிக்கப்பட்ட பணியிடங்களுக்கும் கூடுதலாக ஆசிரியர் மற்றும் ஆசிரியரல்லா பணியாளர்களை நியமனம் செய்ததால், அவர்களுக்கு ஊதியம் கொடுக்க முடியாத நிதி சிக்கலில் இருந்தது.
எனவே, 2013ம் ஆண்டு அதிமுக அரசு சட்டமன்றத்தில் இதற்கென ஒரு சட்டத்தை நிறைவேற்றி, இந்த பல்கலைக் கழகத்தை தமிழக அரசு முழு கட்டுப்பாட்டில் கொண்டு வந்தது. பல்கலைக்கழகத்தில் ஆசிரியர்கள் உபரியாக இருப்பதாக தெரிவித்து 2016ம் ஆண்டு முதல் மூன்று ஆண்டு மாற்றுப்பணி அடிப்படையில் அரசு கல்லூரிகளில் நியமிக்கப்பட்டனர். இவ்வாறு மாற்றுப்பணியில் அரசு கல்லூரிகளில் பணியமர்த்தப்பட்ட ஆசிரியர்களின் எண்ணிக்கை ஆயிரத்திற்கும் அதிகமாக உள்ளது. மாற்றுப்பணி மீண்டும், மீண்டும் புதுப்பிக்கப்படுகிறது.
சமூக நீதி அடிப்படையில், முறையான இட ஒதுக்கீட்டினை பின்பற்றி, ஆசிரியர் தேர்வு வாரியம் மூலமாக கிடைக்க வேண்டிய பணி நியமனம் இதனால் தடுக்கப்படுகிறது. அரசு கல்லூரிகளில் மாற்றுப்பணியில் பணியமர்த்தப்பட்ட அண்ணாமலை பல்கலைக்கழக உபரி ஆசிரியர்களை அரசு கல்லூரிகளில் பணி நிரந்தரப்படுத்த கோருவதே சமூக நீதிக்கு எதிரானதாகும். அண்ணாமலை பல்கலைக்கழகத்தில் பணியாற்றும் ஆசிரியர்கள் பணி ஓய்வு பெறும் போது, உபரி ஆசிரியர்களை திரும்ப அழைத்துக் கொள்ள வேண்டும்.
இதையும் படிங்க : “சீமானுக்கு தமிழ் மேல் அவமரியாதை” - அன்பில் மகேஷ் பதிலடி!
தமிழகத்தில் இயங்கி வரும் அரசு பல்கலைக்கழகங்களில் உள்ள ஏராளமான காலிப்பணியிடங்கள் நீண்ட காலமாக நிரப்பப்படாமல் உள்ளன. இக்காலிப் பணியிடங்களில் அண்ணாமலை பல்கலைக்கழக உபரி ஆசிரியர்களை நியமிக்க வேண்டும்.
கடந்த 1981ம் ஆண்டிற்கு முன்னர், அண்ணாமலை பல்கலைக்கழகத்தில் இளநிலை பாடப்பிரிவுகள் இயங்கி வந்துள்ளன. எனவே, தற்போதும் அங்கு இளநிலைப் பாடப்பிரிவுகளை தொடங்கி அண்ணாமலை பல்கலைக்கழக உபரி ஆசிரியர்களை, அவர்களின் பல்கலைக்கழகங்களிலேயே பணியமர்த்தலாம்.
எனவே, இந்த மாற்று வழிகளை பரிசீலனை செய்து, அரசு கல்லூரிகளில் பணியாற்றும் அண்ணாமலை பல்கலைக்கழக ஆசிரியர்களின் மாற்றுப்பணியை முதலமைச்சர், உயர்கல்வித்துறை அமைச்சர் ரத்து செய்ய வேண்டும்" என தெரிவித்துள்ளார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
