சென்னை: மத்திய சமூக நீதி மற்றும் அதிகாரமளித்தல் துறை இணை அமைச்சர் ராம்தாஸ் அத்வாலே, ஆம்ஸ்ட்ராங் படுகொலை தொடர்பாக அவரது மனைவியைச் சந்தித்து ஆறுதல் தெரிவித்தார். இதனைத் தொடர்ந்து அவர் செய்தியாளர்களிடம் பேசுகையில், ''கடந்த பல ஆண்டுகளாக தலித் மக்களுக்காக ஆம்ஸ்ட்ராங் உழைத்துள்ளார். ஆம்ஸ்ட்ராங் ஒரு வலிமையான தலித் தலைவர்,
ஆனால், சிலர் அவரை கொலை செய்துள்ளனர். இந்த விவகாரத்தில் முதலமைச்சர் மு.க.ஸ்டாலின் சிபிஐ விசாரணைக்கு உத்தரவிட வேண்டும் என வலியுறுத்துகிறேன். கைது செய்யப்பட்டவர்கள் மட்டுமல்லாமல், இவர்களை பின்னால் இருந்து இயக்கியவர்களை கண்டறிய வேண்டும்.
காவல் ஆணையரை மட்டும் மாற்றினால் போதாது. ஒரு தலித் தலைவருக்கு இந்த மாநிலத்தில் பாதுகாப்பு இல்லை, எனவே, சிபிஐ விசாரணைக்கு உத்தரவிட வேண்டும். தமிழ்நாட்டில் உள்ள தலித் தலைவர்கள் பாதுகாப்பை உறுதி செய்ய வேண்டும். கருணாநிதி ஒரு சிறந்த மனிதர், கருணாநிதி ஒரு காலத்தில் தேசிய ஜனநாயக கூட்டணிக்கு ஆதரவு தெரிவித்துள்ளார். ஆனால், தற்போது ஸ்டாலின் காங்கிரஸ் கட்சிக்கு ஆதரவு தெரிவிக்கிறார். கூட்டணிக் கட்சிகளின் ஆதரவு வலிமையாக உள்ளது. தற்போது இருக்கும் தேசிய ஜனநாயக கூட்டணி நிச்சயம் 5 ஆண்டுகள் ஆட்சி செய்யும்.
மாநில காவல்துறையின் விசாரணை முழுமையானதாக இல்லை. கொலை செய்யப்பட்டவர் ஒரு வலிமையான தலித் தலைவர் ஆனால், கொலை செய்ய திட்டமிட்டவர்கள் தற்போது வரை கைது செய்யப்படவில்லை, எனவே தான் சிபிஐ விசாரணை வேண்டும் என வலியுறுத்துகிறோம்.
ஆம்ஸ்ட்ராங் கொலைச் சம்பவத்தில் பாஜகவிற்கு சம்பந்தம் உள்ளது எனும் குற்றச்சாட்டுகளுக்கு ஒரே பதில் தான். தமிழ்நாட்டில் பாஜக எந்த விதமான குற்றம் செய்யும் கட்சிகளுடன் கூட்டணியில் இல்லை. ஆம்ஸ்ட்ராங் படுகொலை தொடர்பான எனது விசாரணை அறிக்கையை மத்திய உள்துறை அமைச்சர் அமித்ஷாவைச் சந்தித்து கொடுக்க உள்ளேன்.
திருமாவளவன், ஜான் பாண்டியன், கிருஷ்ணசாமி உள்ளிட்ட தலைவர்களுக்கு பாதுகாப்பை மேலும் அதிகப்படுத்த வேண்டும். தொடர்ந்து தமிழ்நாட்டில் தலித் சமூகத்தைச் சேர்ந்தவர்கள் கொலை சம்பவம் அதிகரிப்பதால் தலைவர்களுக்கு பாதுகாப்பு முக்கியம். தமிழ்நாட்டில் கலப்பு திருமணம் செய்பவர்களின் மரணம் அதிகம் நிகழ்கிறது. தலித் உட்பட அனைத்து சமூகத்தினருக்கும் தமிழ்நாடு முதலமைச்சர் உரிய பாதுகாப்பு அளிக்க வேண்டும்" என கூறியுள்ளார்.
இதையும் படிங்க: சென்னையில் இரண்டு தனியார் பள்ளிகளுக்கு வெடிகுண்டு மிரட்டல்! - Bomb threat to Schools in Chennai
