கோயம்புத்தூர்: மருதமலை மற்றும் அதன் சுற்றுவட்டார வனப்பகுதிகளில் சுமார் 10க்கும் மேற்பட்ட காட்டு யானைகள் முகாமிட்டுள்ளன. இந்த யானைகள் நாள்தோறும் இரவு நேரங்களில் குடியிருப்பு பகுதிகளில் புகுந்து வருவது தொடர் கதையாகி வருகிறது. குடியிருப்பு பகுதிக்குள் வரும் யானைகள் வீட்டின் கதவை உடைத்து உள்ளே இருக்கும் அரிசி உள்ளிட்ட உணவுப் பொருட்களை சாப்பிட்டு வருகிறது.
இதன் காரணமாக மருதமலை ஐஓபி காலனி உள்ளிட்ட அதன் சுற்றுவட்டாரப் பகுதிகளில் உள்ளவர்கள் அச்சமடைந்துள்ளனர். இந்நிலையில், நேற்று இரவு வனப்பகுதியில் இருந்து வெளியேறிய ஒற்றை ஆண் யானை, ஐஓபி காலனி பாலாஜி நகர் குடியிருப்புக்குள் புகுந்தது. பின்னர், அந்த ஒற்றை யானை செந்தில்குமார் என்பவரின் வீட்டின் கேட்டை உடைத்துக் கொண்டு உள்ளே சென்று சர்வ சாதாரணமாக உணவு தேடியுள்ளது. அங்கு உணவு ஏதும் இல்லாததால் மீண்டும் அருகில் உள்ள குடியிருப்பை நோக்கிச் சென்றது.
இந்த காட்சிகள் எதிர் வீட்டில் பொருத்தப்பட்டிருந்த கண்காணிப்பு கேமராவில் பதிவாகியுள்ளது. இது குறித்து அப்பகுதி மக்கள் கூறுகையில், "நாள்தோறும் இரவு 8 மணிக்கே குடியிருப்பு பகுதிக்குள் காட்டு யானைகள் வந்து விடுகிறது. வனத்துறையினர் அதனை தடுக்க பல்வேறு நடவடிக்கை எடுத்தாலும் யானைகள் குடியிருப்பு பகுதிக்குள் வருவதை தடுக்க முடியவில்லை.
மேலும், வனத்துறையில் ஊழியர்கள் பற்றாக்குறை இருப்பதால் அதிகமான இடங்களில் யானை வரும் போது அவர்களால் சமாளிக்க முடியவில்லை. எனவே, ஊழியர்கள் எண்ணிக்கையை அதிகப்படுத்தி யானைகளை கண்காணித்தால் மட்டுமே மனித மிருக மோதலில் இருந்து தப்பிக்க முடியும்" என தெரிவித்தனர்.
இதையும் படிங்க: நான் வந்துட்டேன்.. வால்பாறை சாலையில் ஒய்யார நடைபோடும் சுள்ளி கொம்பன் யானை! - SULLI KOMBAN ELEPHANT
