மதுரை: மதுரை மாவட்டம் மேலூர் வட்டத்திற்குட்பட்ட நாயக்கர்பட்டியில் டங்ஸ்டன் கனிமம் எடுப்பதற்காக கடந்த நவம்பர் 7ஆம் தேதி, வேதாந்தாவின் துணை நிறுவனமான 'ஹிந்துஸ்தான் ஜிங்க் லிமிடெட்'-க்கு சுமார் 5 ஆயிரம் ஏக்கர் நிலத்தை வழங்குவதற்கான ஏல அறிவிப்பை ஒன்றிய அரசு வெளியிட்டிருந்தது.
இதற்காக, இப்பகுதியில் பல்வேறு ஆய்வுகளை மேற்கொண்ட பிறகே இதற்கான அறிவிப்பினை வெளியிட்டுள்ளதாக அரசு தரப்பில் தெரிவிக்கப்பட்டுள்ளது. இந்நிலையில், அந்த 5 ஆயிரம் ஏக்கருக்கு உட்பட்ட 10க்கும் மேற்பட்ட கிராம மக்கள் இந்த டங்ஸ்டன் சுரங்கம் அமைப்புக்கு எதிர்ப்பு தெரிவித்து தொடர் போராட்டத்தை முன்னெடுத்து வருகின்றனர்.
மலை மீது ஏறி போராட்டம்:
இதற்கிடையே, டிசம்பர் 9ஆம் தேதி தமிழக அரசு சிறப்பு சட்டப்பேரவைக் கூட்டத்தைக் கூட்டி, டங்ஸ்டன் திட்டத்திற்கு எதிர்ப்பு தெரிவித்து தீர்மானம் நிறைவேற்றியது. தமிழக அரசின் இந்தத் தீர்மானத்தை வரவேற்றாலும், மத்திய அரசு இதுகுறித்து எந்தவித அறிவிப்பையும் வெளியிடவில்லை. இதனால் மக்கள் தொடர்ந்து போராட்டத்தை நடத்தி வருகின்றனர்.
இந்நிலையில், நேற்று முன்தினம் (டிச.16) மாலை அரிட்டாபட்டி கழிஞ்சமலையில் ஏறி, அங்கு அமர்ந்து போராட்டத்தில் ஈடுப்பட்ட மக்கள், "மத்திய அரசு இந்த ஏல அறிவிப்பை முழுவதுமாக ரத்து செய்ய வேண்டும்" என வலியுறுத்தினர். தொடர்ந்து நாள்தோறும் மாலை 5 மணி முதல் இரவு 7 மணி வரை மலை மீது அமர்ந்து போராட்டம் நடத்துவோம் எனவும் அறிவித்தனர். இதன் தொடர்ச்சியாக நேற்று மாலை அரிட்டாபட்டி ஊர் மந்தையில் கூடிய மக்கள் மத்திய அரசுக்கு எதிராக முழக்கங்கள் எழுப்பினர்.
"அரிட்டாபட்டி மண்ணையும், மக்களையும் காப்போம்"
அந்த போராட்டத்தில் மறைந்த சுற்றுச்சூழல் போராளி அரிட்டாபட்டி ரவிச்சந்திரனின் சகோதரி விமலா கூறுகையில், "இந்த மண்ணின் வளங்களைக் காப்பதற்காக அரிட்டாபட்டி மக்களும், அருகில் உள்ள கிரமங்களான வல்லாளபட்டி, நாயக்கர்பட்டி, கிடாரிப்பட்டி, மாங்குளம், மீனாட்சிபுரம், தெற்குத்தெரு உள்ளிட்ட 10க்கும் மேற்பட்ட கிராம மக்கள் இணைந்து போராடி வருகிறோம்.
நாங்கள் எதிர்பார்க்கும் முடிவு இன்னும் மத்திய அரசிடம் இருந்து கிடைவில்லை. எனவே, எங்களது போராட்டம் மேலும் தீவிரமாகும். இங்குள்ள வளங்களையும், பல்லுயிர்ச்சூழலையும் மட்டுமன்றி இந்த மக்களையும் அழிப்பதற்கு உங்களின் மனசாட்சி எவ்வாறு இடமளிக்கிறது? எங்கள் உயிர் போகும்வரை நாங்கள் போராடுவோம்," என்றார்.
"எங்க ஊர்தான் எங்க உயிர்"
தொடர்ந்து பேசிய ராமஜெயம் என்ற பெண், "எங்களுடைய ஊர்தான் எங்கள் உயிர். எங்களுடைய மண் எங்களின் மானம். இதற்காக நாங்கள் எதையும் விட்டுக் கொடுக்க மாட்டோம். தமிழ்நாடு அரசு எங்களது கோரிக்கையை ஏற்று, இந்த திட்டத்தை எதிர்த்து சட்டப்பேரவையில் தீர்மானம் நிறைவேற்றி உள்ளது. ஆனால் இதுவரை ஒன்றிய அரசு எந்தவித தகவலும் தரவில்லை.
இதையும் படிங்க: நெல்லையில் கொட்டப்பட்ட மருத்துவக் கழிவுகள்! கேரளாவிலிருந்து கொண்டு வரப்பட்டதா?
இதன் காரணமாக எங்களுடைய மக்கள் இரவு நேரங்களில் மலை மீது ஏறி போராட்டம் நடத்தி வருகின்றனர். மக்களால் உருவாக்கப்பட்ட மத்திய, மாநில அரசுகளும் பிரதமர், முதல்மைச்சர் பொறுப்புகளும் எங்களை அழிப்பதற்காகவா? இங்கு 2,500 ஆண்டுகளுக்கு முற்பட்ட தொல்லியல் சின்னங்கள், வழிபாட்டுத் தலங்கள் உள்ளன.
இந்து, முஸ்லீம், சமணம் என பல சமயங்களின் தொகுப்பாக அரிட்டபாட்டி திகழ்கிறது. அந்தந்த மதம் சார்ந்தோர் அனைவரும் ஒருவருக்கொருவர் உறவு பாராட்டி வாழ்கிறோம்," என்றார்.
போராட்டத்தை நிறுத்த மாட்டோம்
மேலும், இது குறித்து பேசிய தெய்வ கலா என்ற பெண், “மக்களுக்கு எந்தவித அறிவிப்பும் கொடுக்காமல் கனிமங்களை எடுக்க முயல்வது ஒருபோதும் ஏற்க முடியாதது. டங்ஸ்டன் கனிமச் சுரங்கத்தால் விவசாயிகள் மட்டுமன்றி பொதுமக்களும், இங்குள்ள இயற்கை வளங்களும் கடுமையாக பாதிப்பிற்கு ஆளாகும்.
எங்களது போராட்டத்தை இத்தோடு நிறுத்திவிடுவோம் என யாரும் நினைக்க வேண்டாம். நல்ல முடிவு கிடைக்கும் வரை போராட்டத்தைக் கைவிட மாட்டோம். இனி வரும் நாட்களில் ஊரில் உள்ள பொது இடங்களில் மாலை 4 மணி முதல் இரவு 7 மணி வரை தொடர் போராட்டத்தில் ஈடுபடுவோம். இந்த போரட்டத்தை நாங்கள் கைவிடுவது மத்திய அரசின் கைகளில்தான் உள்ளது," என்றார்.
