சென்னை: சென்னை தேனாம்பேட்டையில் உள்ள திமுக தலைமை அலுவலகத்தில் அக்கட்சியின் அமைப்புச் செயலாளர் ஆர்.எஸ்.பாரதி செய்தியாளர்களைச் சந்தித்துப் பேசினார். அப்போது அவர் பேசியதாவது, "எடப்பாடி பழனிசாமி உண்மைக்கு புறம்பான தகவல்களை வெளியிட்டு வருகிறார். தனிப்பட்ட முறையில் என்னையும் விமர்சித்து பேசி உள்ளார். உண்மையை விளக்க வேண்டியது திமுகவின் கடமை. எந்த கேள்வி கணை எழுப்பப்பட்டாலும், அதற்கு அவ்வப்போது பதில் சொல்லி பழக்கப்பட்டவர்கள் நாங்கள். நேற்றைய தினம் அவர், தான் ஏதோ உத்தம புத்திரன் போல பேட்டி அளித்து இருக்கிறார்.
நெடுஞ்சாலை துறை டெண்டர் முறைகேடு வழக்கில் தன்னை நீதிமன்றம் நிரபராதி என விடுதலை செய்தது போல பேசி இருக்கிறார். உண்மையை மறைக்காமல் அவர் பேட்டி அளித்திருக்க வேண்டும். உண்மை நிலவரம் என்னவென்றால், அவர் ஆட்சியில் இருந்த காலத்தில் அவருடைய சம்பந்திக்கும் மற்றவர்களுக்கும் முறைகேடாக நெடுஞ்சாலை துறையில் டெண்டர் அளித்ததில் பல்லாயிரம் கோடி ரூபாய் முறைகேடு நடைபெற்றது எனவும், விசாரிக்க வேண்டும் எனவும், லஞ்ச ஒழிப்பு துறையில் நான் புகார் அளித்தேன்.
ஆனால் அவர்கள் விசாரிக்காத காரணத்தினால், உயர்நீதிமன்றத்தில் வழக்கு தொடுத்தேன். அதில் புகார் கொடுத்தும் விசாரிக்கவில்லை என சொன்னவுடன் நீதிமன்றத்தில் அந்த வழக்கை விசாரணைக்கு எடுத்து கொண்டனர். இதில் சிபிஐ விசாரணை கேட்கவில்லை. இந்த வழக்கில் நீதிமன்றத்தில் கேட்டதெல்லாம், லஞ்ச ஒழிப்பு துறை விசாாரிக்காததால், தமிழ்நாடு அரசுக்கு உட்பட்ட special investigation team மூலம் விசாரிக்க வேண்டும் என கோரிக்கை வைத்தோம்.
அப்போதைய அரசுத் தரப்பில் பதில் மனு போட்டார்கள். இருதரப்பு வாதங்களையும் கேட்ட நீதிமன்றம், இந்த வழக்கு முறையாக விசாரிக்கப்படவில்லை. பல்வேறு சிக்கல்கள் இருப்பதால் சிபிஐ விசாரணையை நீதிமன்றமே தான் பிறப்பித்தது. ஆகையால், இந்த வழக்கில் அன்றும் சிபிஐ கேட்கவில்லை, இன்றும் கேட்கவில்லை. ஏனெனில், சிபிஐ விசாரணை என்றால் என்னவென்று எங்களுக்கு தெரியும். நான் வழக்கை வாபஸ் பெற்றேன் என எடப்பாடி பழனிசாமி பச்சைப்பொய் பேசுகிறார்.
சென்னை உயர்நீதிமன்றம் சிபிஐ விசாரணையை கடந்த 2018ஆம் ஆண்டு செப்டம்பர் 11ஆம் தேதி முதல் துவக்க உத்தரவிடுகிறது. இதையடுத்து, கடந்த 2017ஆம் ஆண்டு அக்டோபர் 29ஆம் தேதியன்று எடப்பாடி பழனிசாமி இதில் உச்சநீதிமன்றத்தில் இடைக்கால தடை பெறுகிறார். இது தொடர்பாக பத்திரிகைகளில் செய்தி வெளியாகி இருக்கிறது. ஆனால், இன்று பச்சை பொய் பேசுகிறார் எடப்பாடி பழனிசாமி.
பின்பு கடந்த 2022ஆம் ஆண்டு இந்த விவகாரத்தில் இறுதி விசாரணை வருகிறது. அதற்குள் ஆட்சி மாற்றம் ஏற்படுகிறது. ஏற்கனவே விசாரணை சரியில்லை என்பதால், மாநில காவல்துறை சார்பாக விசாரணை துவங்கி நடைபெற்றது.
இதன் காரணமாக ஒரே வழக்குக்கு இரண்டு விசாரணை வேண்டாம் என்ற அடிப்படையில் நான் அளித்த மனுவை திரும்பப் பெற்றேன். இதற்காக டான்சி வழக்கின் போக்கை உதாரணமாக விளக்கிய ஆர்.எஸ்.பாரதி, இதையெல்லாம் எடப்பாடி பழனிசாமி கேட்டு தெரிந்து கொள்ள வேண்டும் என்றார். டான்சி வழக்கை போல், இந்த வழக்கிலும் நடைபெற்றதை எடப்பாடி பழனிசாமி தெரிந்து கொள்ள வேண்டும்.
இந்த வழக்கில் நான் மனுவை திரும்ப பெற்ற போதிலும் கீழ் நீதிமன்றம் விசாரிக்கட்டும். முடிவு செய்யட்டும் என உச்சநீதிமன்றம் தரப்பில் முடித்து வைத்தார்கள். அதன்படி சென்னை உயர்நீதிமன்றம் விசாரணையில் இருதரப்பு வாதங்களை கேட்ட பின்பு, காவல் துறை விசாரணை முறையாக நடைபெற்றது என அவரை விடுவித்தது. இருப்பினும் அதில் மற்றொரு உத்தரவையும் நீதிபதி பிறப்பித்தார்.
அதாவது இந்த வழக்கை தனிப்பட்ட முறையில் ஆர்எஸ் பாரதி நடத்தலாம் என்பது அது. நாங்களும் நடத்தலாம் என்று இருந்தோம். அதற்குள் நாடாளுமன்றத் தேர்தல் வந்துவிட்டது. எப்படி மறைந்த முன்னாள் முதலமைச்சர் ஜெயலலிதா, டான்சி வழக்கில் மாற்றி பேசி மாட்டிக் கொண்டாரோ அதுபோல இன்று எடப்பாடி பழனிசாமி பேசி இருக்கிறார்.
வழக்கு தொடர காலம் இருப்பதால், விக்கிரவாண்டி தேர்தல் முடிந்தவுடன், வழக்கறிஞர் என்.ஆர்.இளங்கோவின் ஆலோசனைப் பெற்று, திமுக தலைவரின் அனுமதி பெற்று, இந்த வழக்கை நான் மீண்டும் தொடர இருக்கிறேன். எடப்பாடி பழனிசாமி சவால் விடலாம்.
ஆனால் சட்டத்துக்கு முன் அவர் தப்பிக்க முடியாது. இந்த விவகாரத்தில் முதலமைச்சருக்கு எதுவும் தெரியவில்லை என்ற பாணியில் எடப்பாடி பழனிசாமி விமர்சிப்பது கண்டனத்துக்குரியது ஆதாரத்துடன் அவர் பேச வேண்டும். பொய் பேசக் கூடாது. எனக்கு வயதானது பற்றி எடப்பாடி பழனிசாமி கவலைப்படுகிறார். உடல்மொழியில் விமர்சிக்கிறார். என்னாலும் அதற்கு பதில் அளிக்க முடியும். எனது வயதுக்கு அது சரியாக இருக்காது.
அவர் வேண்டுமென்றால் சின்ன பையன் என சின்னப்பிள்ளைத்தனமாக நடந்து கொள்ளலாம். சட்டப்பேரவையில் முதலமைச்சர் விவாதிக்க சவால் விடுகிறார். ஆனால் எடப்பாடி பழனிசாமி ஓடி ஒளிகிறார். மக்கள் முன் எடப்பாடி பழனிசாமி நாடகமாடுகிறார்.
சாதிவாரி கணக்கெடுப்பு மத்திய அரசு எடுக்க வேண்டும் என்பது தொடர்பாக முதலமைச்சர் சிறப்பு தீர்மானத்தை பேரவையில் கொண்டு வந்தார். இதனை அனைவரும் வரவேற்று இருக்க வேண்டும். ஆனால் அன்புமணி ராமதாஸ் இதனை எதிர்க்கிறார்.
விக்கிரவாண்டி தேர்தலை மனதில் வைத்து கொண்டு சிலர் இப்படி பேசுகிறார்கள். ஆகையால் பொய் பிரச்சாரம் எடுபடாது என எடப்பாடி பழனிசாமி மற்றும் அன்புமணி ராமதாஸ் ஆகியோருக்கு சொல்லிக் கொள்கிறேன்.
குறிப்பாக, கடந்த 2016 ஆம் ஆண்டு ரூ.570 கோடி கண்டெய்னர் லாரியில் பிடிபட்ட பணம் தொடர்பாக 8 ஆண்டுகள் ஆகியும் சிபிஐ விசாரணையில் எந்த முன்னேற்றமும் இல்லை. அது யாருடைய பணம் என இதுவரை சிபிஐ சொல்லவில்லை. எப்ஐஆர் கூட போடவில்லை. இப்படி பல சிபிஐ வழக்குகள் தமிழ்நாட்டில் நிலுவையில் உள்ளன. ஆகையால் தான் கள்ளக்குறிச்சி கள்ளச்சாராய நிகழ்வு தொடர்பாக சிபிசிஐடி விசாரணைக்கு முதலமைச்சர் உத்தரவிட்டார். விசாரணை ஆணையமும் அமைத்துள்ளார்" என்றார்.
இதையும் படிங்க: 'திமுக தாமாக முன்வந்து ஆட்சியை கலைக்க வேண்டும்'.. ஹரி நாடார் ஆவேசம்! - hari nadar
