சென்னை: சென்னையில் இருந்து மலேசிய தலைநகர் கோலாலம்பூர் செல்லும் தனியார் பயணிகள் விமானம் ஒன்று நேற்று அதிகாலை சென்னை சர்வதேச விமான நிலையத்தில் இருந்து புறப்பட தயாராகிக் கொண்டு இருந்தது. அப்போது அந்த விமானத்தில் பயணம் செய்ய வந்த பயணிகளின் உடமைகளை பாதுகாப்பு அதிகாரிகள் பரிசோதித்து அனுப்பிக் கொண்டு இருந்த நிலையில், சென்னையைச் சேர்ந்த ஆண் பயணி ஒருவர், சுற்றுலாப் பயணிகள் விசாவில் இந்த விமானத்தில் மலேசியா செல்வதற்காக வந்திருந்தார்.
இந்நிலையில், அவரின் உடமைகளை பாதுகாப்பு அதிகாரிகள் சோதனை செய்ய முற்பட்டனர். அப்போது அந்த நபர் கையில் வைத்திருந்த இரண்டு அட்டைப்பெட்டிகள் மீது அதிகாரிகளுக்கு சந்தேகம் ஏற்பட்ட நிலையில், அதில் என்ன இருக்கிறது எனக் கேள்வியெழுப்பியுள்ளனர்.
அதற்கு அந்த நபர் சமையலுக்குத் தேவையான அரிசி, பருப்பு சோறு வகைகள் இருப்பதாக கூறியுள்ளார். ஆனால் அந்த அட்டைப்பெட்டிகள் லேசாக அசைவது போல அதிகாரிகளுக்கு தெரிந்ததால், அந்த அட்டைப்பெட்டியை சோதனைக்காக திறந்துள்ளனர். அப்போது உயிருடன் கூடிய நட்சத்திர ஆமைகள் இருப்பதைக் கண்ட அதிகாரிகள், அந்த பயணியையும், அட்டைப் பெட்டிகளில் இருந்த நட்சத்திர ஆமைகளையும் சென்னை விமான நிலைய சுங்க அதிகாரிகளிடம் ஒப்படைத்தனர்.
இதனையடுத்து, சுங்க அதிகாரிகள் அந்தப் பயணியின் மலேசியா பயணத்தை ரத்து செய்து, அவரிடம் தொடர்ந்து விசாரணை மேற்கொண்டனர். பின் அந்த இரண்டு அட்டைப் பெட்டிகளிலும் இருந்த நட்சத்திர ஆமைகளை கணக்கிட்ட போது, அதில் 160 நட்சத்திர ஆமைகள் இருப்பது தெரியவந்தது.
மேலும், அந்த விசாரணையில் இந்த நட்சத்திர ஆமைகள் ஆந்திர மாநிலம் சதுப்பு நிலப் பகுதியில் இருந்து கொண்டு வருவதாகவும், இந்த நட்சத்திர ஆமைகளுக்கு இந்தியாவில் 50 ரூபாய் 100 ரூபாய் விலையில் விற்கப்படுவதாகவும், ஆனால் மலேசியா நாட்டில் இந்த நட்சத்திர ஆமைகள், ஒரு ஆமையை ரூபாய் 5,000 வரை விலை கொடுத்து வாங்குகின்றனர் எனவும், அந்த நாட்டின் மீன் தொட்டிகளில் அலங்காரத்திற்கு இந்த நட்சத்திர ஆமைகளை வளர்க்கின்றனர்.
அதுமட்டுமின்றி நட்சத்திர விடுதிகளில், இறைச்சி மற்றும் சூப்புக்காகவும் இவை பயன்படுத்துகின்றனர். மேலும், இந்த ஆமை ஓடுகளில் வண்ண கலர்களால் அலங்காரம் செய்து கைவினைப்பொருட்கள் தயாரிக்கின்றனர். மிக முக்கியமாக மருத்துவ குணம் உடைய இந்த நட்சத்திர ஆமைகளை மருந்துகள் தயாரிக்கவும் பயன்படுத்துகின்றனர் என்றும் தெரியவந்துள்ளது.
இவ்வாறு நமது நாட்டில் இது அழிந்து வரும் ஒரு உயிரினமான இந்த நட்சத்திர ஆமைகளை வெளிநாட்டுக்கு அனுப்புவதற்கு மத்திய அரசு தடை விதித்துள்ள நிலையில், விமானப் பயணி ஒருவர் விமானம் மூலம் வெளிநாட்டுக்கு இதை கொண்டு செல்லப்பட்ட முயற்சி செய்த சம்பவம் பரபரப்பை ஏற்படுத்தியுள்ளது. மேலும், இந்த நட்சத்திர ஆமைகளை கிண்டியில் உள்ள சிறுவர் பூங்கா அல்லது வண்டலூர் உயிரியல் பூங்காவில் ஒப்படைக்க முடிவு செய்யப்பட்டுள்ளதும் குறிப்பிடத்தக்கது.
இதையும் படிங்க: என்கவுன்டரில் சுட்டுக்கொல்லப்பட்ட திருவேங்கடத்தின் உடல் தகனம்!
