தூத்துக்குடி: தூத்துக்குடி மாவட்டம், மஞ்சநீர்க்காயல் வடக்கு தெருவைச் சேர்ந்த ஆனந்த கிருஷ்ணனின் மகன் ஹரிகரன் (23). இவர் தூத்துக்குடி முத்தையாபுரத்தில் உள்ள தனியார் தொழிற்சாலையில் ஒப்பந்த தொழிலாளியாக வேலை பார்த்து வந்தார். இந்நிலையில், நேற்று மாலை தொழிற்சாலையில் பராமரிப்பு பணி நடைபெற்று வந்தது. அதில், அமோனியா பைப்லைனில் ஏற்பட்ட கசிவை சரி செய்யும் பணியில் ஹரிஹரன், தன்ராஜ், மாரிமுத்து, விஷ்ணு, ஹரி பாஸ்கர் ஆகிய ஊழியர்கள் ஈடுபட்டிருந்தனர்.
அப்போது திடீரென அம்மோனியா வாயு அதிக அளவு கசிந்ததால் ஏற்பட்ட விபத்தில் ஹரிகரன் சம்பவ இடத்திலேயே உயிரிழந்தார். தனராஜ், மாரிமுத்து, விஷ்ணு, ஹரி பாஸ்கர் ஆகியோர் பலத்த காயங்களுடன் தனியார் மருத்துவமனையில் சிகிச்சைக்காக அனுமதிக்கபட்டுள்ளனர்.
பின்னர், ஆலையில் உற்பத்தி நிறுத்தப்பட்டு ஊழியர்கள் வெளியேற்றப்பட்டனர். இச்சம்பவம் குறித்து முத்தையாபுரம் போலீசார் விசாரணை செய்து வருகின்றனர். இத்தகவலறிந்து உடனடியாக தொழிற்சாலைக்கு வந்த மாவட்ட எஸ்பி ஆல்பர்ட் ஜான் மற்றும் தூத்துக்குடி நகர துணை கண்காணிப்பாளர் கேல்கர் சுப்பிரமணியம் ஆகியோர், ஆலைக்குள் சென்று விபத்து நடந்த இடத்தை பார்வையிட்டு விசாரணை நடத்தினர்.
இந்த விபத்தில் உயிரிழந்த ஹரிஹரன் உடல், தூத்துக்குடி அரசு மருத்துவக் கல்லூரி மருத்துவமனையில் வைக்கப்பட்டுள்ள நிலையில், கடந்த 50 ஆண்டுகள் பழமையான இந்த தொழிற்சாலையில் ஏற்கனவே பல்வேறு விபத்துக்கள் நடைபெற்றன.
ஆனால், முறையாக பாதுகாப்பு நடவடிக்கை எதுவும் நிர்வாகம் கையாளவில்லை. மேலும், எவ்வித அனுபவம் இல்லாத ஒப்பந்த ஊழியரான ஹரிஹரனை பாதுகாப்பு உபகரணங்கள் எதுவும் வழங்காமல் ஆலை நிர்வாகம் அம்மோனியா வாயுக்கசிவை சரி செய்ய அனுப்பி உள்ளது.
இதன் காரணமாக அவர் பரிதாபமாக இறந்துள்ளார் என உறவினர்கள் குற்றம் சாட்டினர். இதுகுறித்து முறையாக குடும்பத்திற்கு தகவல் தெரிவிக்காமல், அரசு மருத்துவமனையில் ஹரிஹரன் உடலை ஆலை நிர்வாகம் ஒப்படைத்துச் சென்றுள்ளதும் கண்டனத்துக்குரியது என்றனர்.
எனவே, ஹரிஹரன் மரணத்திற்கு காரணமான ஆலை நிர்வாகத்தின் மீது நடவடிக்கை எடுத்து சம்பந்தப்பட்டவர்கள் மீது வழக்குப்பதிவு செய்து கைது செய்ய வேண்டும் எனவும், ஹரிஹரன் குடும்பத்திற்கு ஒரு கோடி ரூபாய் இழப்பீடு வழங்க வேண்டுமென உள்ளிட்ட பல கோரிக்கைகளை முன் வைத்து உறவினர்கள் தெற்கு காவல் நிலையத்தை முற்றுகையிட்டனர்.
பின்னர், காவல் நிலையத்தில் வைத்து கோட்டாட்சியர் பிரபு தலைமையில் பேச்சுவார்த்தை நடைபெற்றது. அப்போது, ஆலையின் சார்பில் 25 லட்சம் ரூபாய் பாதிக்கப்பட்ட குடும்பத்தினருக்கு நஷ்ட ஈடு வழங்க வேண்டும் எனவும், ஆலையின் சார்பில் போடப்பட்டுள்ள இன்சூரன்ஸ் தொகையாக 10 லட்சம் ரூபாய் வழங்கப்பட வேண்டும் எனவும், ஈமத்திரியை செலவுத் தொகையாக 2 லட்சம் ரூபாய் கொடுக்க வேண்டும் என பேசப்பட்டது.
மேலும், மாதந்தோறும் ஓய்வூதியம் வழங்கப்பட வேண்டும் உள்ளிட்ட நிபந்தனைகள் ஆலையின் சார்பில் ஏற்றுக்கொள்ளப்பட்டதால், உடலை பெற்றுக் கொள்ள உறவினர்கள் சம்மதம் தெரிவித்தனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க : கஞ்சா ஆயில் முதல் போதை சாக்லேட் வரை.. ஒரு மாணவி உள்பட 40 பேரிடம் கிடுக்குப்பிடி விசாரணை! - Police Raid in Potheri
