செங்கல்பட்டு: செங்கல்பட்டு மாவட்டம் மறைமலைநகர் சீதக்காதி தெருவைச் சேர்ந்த தங்கராஜ் என்பவரின் மகன் விக்கி என்ற விக்னேஷ் (27) பெங்களூருவில் உள்ள தனியார் ஐடி நிறுவனத்திற்கு வீட்டில் இருந்தபடியே பணியாற்றி வந்ததாகக் கூறப்படுகிறது.
இந்த நிலையில், கடந்த 11ஆம் தேதி வீட்டைவிட்டு வெளியே சென்ற விக்னேஷ் வீடு திரும்பவில்லை என்று அவரது தந்தை தங்கராஜ் மறைமலைநகர் போலீசில் புகார் அளித்துள்ளார். இந்த புகாரின் அடிப்படையில் வழக்குப் பதிவு செய்து போலீசார் விசாரணை மேற்கொண்டனர்.
இந்த விசாரணையில், மறைமலை நகரை அடுத்த கோவிந்தாபுரம் விசு என்ற விஸ்வநாதன் (23), கோகுலாபுரத்தைச் சேர்ந்த 17 வயது சிறுவன் மற்றும் பீகார் மாநிலத்தைச் சேர்ந்த தில்கேஷ் குமார் (24) ஆகியோர் சம்பவத்தன்று நண்பர் விக்னேஷை மது அருந்துவதற்காக கோவிந்தாபுரம் ஏரிக்கு அழைத்துச் சென்றுள்ளது போலீசாருக்கு தெரியவந்துள்ளது.
இதனை அடுத்து, தனிப்படை போலீசார் கோகுலாபுரம் பகுதியில் பதுங்கி இருந்த 3 பேரையும் கைது செய்து அவர்களிடம் இருந்து கத்தி உள்ளிட்ட பயங்கர ஆயுதங்களைப் பறிமுதல் செய்தனர். மேலும் அவர்களிடம் நடத்தப்பட்ட விசாரணையில், கடந்த சில நாட்களுக்கு முன்பு மறைமலைநகர் அருகே தனியார் பார் ஒன்றில் விக்னேஷ் மது குடித்திருந்தபோது கோவிந்தாபுரம் பகுதியைச் சேர்ந்த விசு என்கிற விசுவநாதன், விக்னேஷ் வைத்திருந்த சைடிசை எடுத்து சாப்பிட்டுள்ளார்.
இதில் விக்னேஷிற்கும், விசுவிற்கும் வாக்குவாதம் ஏற்பட்டு கைகலப்பாகி விசுவை விக்னேஷ் எட்டி உதைத்ததாகக் கூறப்படுகிறது. இதனை அடுத்து, அவரை அங்கிருந்தவர்கள் சமாதானப்படுத்தி அனுப்பிவைத்துள்ளனர். இதில், ஆத்திரமடைந்த விசு, விக்னேஷை பழி தீர்க்க வேண்டும் என திட்டம் தீட்டி வந்துள்ளார்.
இத்தகைய சூழலில், விசு கோகுலாபுரத்தைச் சேர்ந்த 17 சிறுவன் மூலம் விக்னேஷை இருசக்கர வாகனத்தில் கோவிந்தாபுரம் ஏரிக்கு அழைத்து வந்து சமாதானம் பேசுவது போல் பேசி மதுவினை குடிக்கவைத்துள்ளனர். அதன் பின்னர் அருகில் உள்ள தனது வீட்டிலிருந்து அரிவாளை எடுத்து வந்த விசு, விக்னேஷை சரமாரியாக வெட்டி கொலை செய்துள்ளார்.
அதன் தொடர்ச்சியாக, விசுவுடன் சேர்ந்து அவரது நண்பர்கள் தில்கேஷ்குமார் மற்றும் 17 வயது சிறுவன் 3 பேரும் சேர்ந்து விக்னேஷின் உடலை ஏரியின் அருகிலேயே குழிதோண்டிப் புதைத்துள்ளது போலீசாரின் விசாரணையில் தெரியவந்துள்ளது.
இதனைத் தொடர்ந்து, விக்னேஷ் புதைக்கப்பட்டுள்ள இடத்தை அடையாளம் காட்டப்பட்டு அந்த இடத்தில் வருவாய்த் துறையினர் மற்றும் காவல் துறையினர் முன்னிலையில் விக்னேஷின் உடல் தோண்டி எடுக்கப்பட்டு உடற்கூறு ஆய்வுக்காக அரசு மருத்துவமனைக்கு அனுப்பி வைக்கப்பட்டது.
இதனையடுத்து, விக்னேஷ் காணாமல் போனதாக வழக்குப்பதிவு செய்யப்பட்ட நிலையில் அந்த வழக்கு தற்போது கொலை வழக்காக மாற்றப்பட்டுள்ளது. ஐ.டி ஊழியரை வெட்டிக் கொலை செய்து ஏரியில் புதைத்த சம்பவம் செங்கல்பட்டு் பகுதியில் பெரும் பரபரப்பை ஏற்படுத்தியுள்ளது.
இதையும் படிங்க: சென்னையில் ஒரே இரவில் 12 கிலோ தங்கம் பறிமுதல்!
