சென்னை: இந்திய ரயில்வே நிறுவனமான ஐஆர்சிடிசி (IRCTC - Indian Railway Catering and Tourism Corporation) உள்நாட்டு மற்றும் வெளிநாட்டு சுற்றுலா சேவைகளை வழங்கி வருகிறது. அந்த வகையில், இந்த ஆண்டு உள்நாட்டு விமான சுற்றுலாக்கள், சர்வதேச விமானப் பயணங்கள், ரயில் சுற்றுலாக்கள் குறித்து ஐஆர்சிடிசி பல்வேறு திட்டங்களை வகுத்துள்ளது.
இது குறித்து சென்னை சேப்பாக்கத்தில் உள்ள பத்திரிகையாளர் மன்றத்தில், இந்தியன் ரயில்வே கேட்டரிங் மற்றும் டூரிசம் பேக்கேஜ் தொடர்பான பத்திரிகையாளர் சந்திப்பு இன்று (வெள்ளிக்கிழமை) நடைபெற்றது. அதில் பேசிய அந்நிறுவனத்தின் பொது மேலாளர் ராஜலிங்கம், “2023-24ஆம் ஆண்டில் ஐஆர்சிடிசி 57 உள்நாட்டு சுற்றுலாக்களை இயக்கியது. இவை அனைத்தும் தென்னிந்திய மக்களிடம் நல்ல வரவேற்பை பெற்றூள்ளது.
இந்த நிதி ஆண்டில் ஐஆர்சிடிசி 70 உள்நாட்டு சுற்றுலாக்களை நடத்த திட்டமிட்டுள்ளது. இவை பிரதமரின் "தேக்கோ அப்னா தேஷ்" என்ற திட்டத்தின் கீழ் வருகிறது. ஐஆர்சிடிசி வருகிற செப்டம்பர் 15ல் சார்தாம் யாத்திரை அறிமுகப்படுத்தியுள்ளது. இந்த யாத்திரையில் தென்னிந்திய உணவுகள் வழங்கப்படும். 2024-25 ஆம் ஆண்டில் செர்ரி ப்ளாஸம் (Cherry Blossom) பருவத்தில் ஜப்பான் மற்றும் வசந்த காலத்தில் கிழக்கு ஐரோப்பா, கம்போடியா, வியட்நாமில் உள்ள அங்கோர் வாட்(Angkor Wat) போன்ற 20க்கும் மேற்பட்ட சுற்றுலாக்களை திட்டமிட்டுள்ளது.
ஆன்மீக தலங்களுக்கு சிறப்பு ஏற்பாடு: கடந்த 2023 - 24 ஆண்டில் 1,253 சுற்றுலாப் பயணிகள் ஐஆர்சிடிசி மூலம் ரயில் சுற்றுலாக்களை மேற்கொண்டனர். நடப்பு நிதியாண்டில் 385 க்கும் மேற்பட்ட சுற்றுலாப் பயணிகள் ஏற்கனவே இந்த சுற்றுப்பயணங்களைப் மேற்கொண்டுள்ளனர். இந்த ஆண்டு 2500 சுற்றுலாப் பயணிகள் என்ற இலக்கு வைக்கப்பட்டுள்ளது. இந்த ஆண்டு நவகிரகம் மற்றும் சபரிமலை போன்ற ஆன்மீக தலங்களுக்கும் செல்ல ஏற்பாடு செய்யப்பட்டுள்ளது.
வசதிகள்: இந்த சுற்றுலாக்களில் பயணிகளுக்கு உறுதி செய்யப்பட்ட ஸ்லீப்பர் மற்றும் 3 டயர் ஏசி ரயில் பயணசீட்டுகள், ஹோட்டல், போக்குவரத்து மற்றும் உணவு ஆகியவை அடங்கும். இந்த சுற்றுலாக்கள் வியாழன் மாலையில் புறப்பட்டு திங்கட்கிழமை காலை முடிவடையும். மத்திய, மாநில மற்றும் அரசு பொதுத்துறை நிறுவனங்களின் ஊழியர்கள் இந்த சுற்றுலாவில் பயணித்து, LTC(Leave Travel Concession)சான்றிதழ்களை பெற்றுக்கொள்ளலாம்.
அமர்நாத் யாத்திரை பொருத்தவரையில் ஐஆர்சிடிசி தமிழ்நாடு சுற்றுலாத் துறையுடன் இணைந்து யாத்திரை மேற்கொள்ளப்பட்டு வருகிறது. ஒரு கட்டத்தில் 30 முதல் 40 பயணிகளை அழைத்துச் செல்ல முடியும். இந்த சுற்றுலா 24 மணி நேரமும் கண்காணிக்கப்படும்.இந்த சுற்றுலா பேக்கேஜ் பயன்படுத்த எந்த வித வயது வரம்பும் இல்லை
ஐஆர்சிடிசி - உள்நாடு, சர்வதேச சுற்றுலாவில் அழைத்துச் செல்லப்படும் இடம் மற்றும் பேக்கேஜ் விவரங்கள்
| இடங்கள் | நாள் | தொகை(ஒரு நபருக்கு) |
| கயா- காசி - அலகாபாத் - அயோத்தியா | ஆகஸ்ட் 3, செப்டம்பர்1, அக்டோபர் 1 | ரூ.43,500 |
| லே, லடாக் | ஆகஸ்ட் 11, செப்டம்பர்26 | ரூ.57,000 |
| காஷ்மீர் | ஆகஸ்ட் 11 | ரூ.52,500 |
| ஆகஸ்ட் 13 | ||
| நேபாளம், காட்மாண்டு, பொக்காரா | ஆகஸ்ட் 14 | ரூ.54,000 |
| பூட்டான் மற்றும் காமாக்யா கோவில் பரோ/புனாகா / திம்பு | ஆகஸ்ட் 15 | ரூ.92,000 |
| இலங்கை, கொழும்பு, நுவரெலியா, கதிர்காம் | ஆகஸ்ட் 29 | ரூ.64,500 |
| குஜராத், சர்தார் வல்லபாய் பட்டேல் சிலை, நிஷ்கலங்க் மகாதேவ் கோவில், ஸ்ரீ சோம்நாத் ஜோதிர்லிங்க கோவில், போர்பந்தர், துவாரகா, மற்றும் அகமதாபாத் | ஆகஸ்ட் 30 | ரூ 43,000 |
| சார்தாம் யாத்திரை | செப்டம்பர்15 | ரூ.62,900 |
| பிகானர், ஜெய்ப்பூர், ஜெய்சல்மர், புஷ்கர், உதய்பூர் | செப்டம்பர் 22 | ரூ.45,000 |
| புவனேஸ்வர்- பூரி -கோனார்க்- ஒடிசா புவனேஸ்வர், கோனார்க், பூரி ஜகன்னாதர் கோவில், மற்றும் சில்கா ஏரி | செப்டம்பர் 28 | ரூ.43,000 |
| ஸ்ரீ மாதா வைஷ்ணோ தேவி அமிர்தசரஸ் பொற்கோயில் | அக்டோபர் 21 | ரூ. 52,000 |
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: மேட்டுப்பாளையம் - தூத்துக்குடி இடையே ரயில் சேவை துவக்கம்.. எங்கெல்லாம் நின்று செல்லும்? - METTUPALAYAM THOOTHUKUDI TRAIN
