சென்னை: உலக செஸ் போட்டியில் சாம்பியன் பட்டம் வென்று இந்தியா திரும்பிய தமிழகத்தை சேர்ந்த செஸ் சாம்பியன் டி.குகேஷுக்கு பாராட்டுக்கள் தெரிவிக்கும் வகையிலும், தாயகத்திற்கு வரவேற்கும் வகையிலும் தமிழ்நாடு சமையல் கலை தொழிலாளர் முன்னேற்ற சங்க தலைவர் இட்லி இனியவன் ஏற்பாட்டில் 60 கிலோ அரிசி, 12 கிலோ உளுத்தம் பருப்பு மாவு சேர்த்து அரைத்த ஆறடி நீளம், ஆறடி அகலம் கொண்ட பிரம்மாண்ட இட்லியை தயாரித்து காட்சிப்படுத்தி வைத்துள்ளனர்.
தமிழ்நாடு சமையல் கலைஞர்கள் முன்னேற்ற சங்க தலைவர் இனியவன் தலைமையில் 12 சமையல் கலைஞர்கள் இட்லியில் செஸ் போர்டு செய்து அதில் குகேஷ் உருவத்தை தயார் செய்ததாக கூறுகிறார் இட்லி இனியவன். மேலும், ஈடிவி பாரத்திற்கு செய்தியாளருக்கு பேட்டியளித்த அவர், "குகேஷ் இளம் வயதிலேயே உலக செஸ் சாம்பியன் பட்டத்தை வென்று சாதனை படைத்துள்ளார். மேலும் குகேஷ் உலக நாடுகள் மத்தியில் இந்தியாவுக்கு மிகுந்த பெருமையை தேடி தந்துள்ளார்.
இதையும் படிங்க: எனது வெற்றிக்கு இதுதான் காரணம்! உலக செஸ் சாம்பியன் குகேஷ் பெருமித பேச்சு!
இவர் 18 வயதில் இவ்வளவு பெரிய சாதனை புரிந்துள்ளது மகிழ்ச்சியளிக்கிறது. அவரைப் பாராட்டி வரவேற்கும் வகையில் இந்த 100 கிலோ எடை கொண்ட பிரம்மாண்ட சதுரங்க இட்லியை தயார் செய்தோம். அதில் குகேஷ் உருவத்தையும் வைத்து காட்சிபடுத்தியுள்ளோம். இதைக் காண வருபவர்களுக்கு இனிப்புகளை வழங்கி எங்கள் மகிழ்ச்சியை வெளிப்படுத்தி வருகிறோம்.
அவருடைய சாதனை தமிழகத்தில் விளையாட்டில் ஆர்வுமுள்ள அனைத்து மாணவர்களுக்கும் ஊக்கமளிக்கும். தமிழகத்தில் தற்போது இளைஞர்கள் பல்வேறு விளையாட்டு போட்டிகளில் பதக்கம் வென்று வருகின்றனர். அவர்களுக்கு தேவையானவற்றை அரசு செய்து தர வேண்டும்," என்று இட்லி இனியவன் வலியுறுத்தியுள்ளார்.
சிங்கப்பூரில் அண்மையில் நடைபெற்ற "World Chess Championship" தொடரின் 14வது போட்டியில் சீனாவின் வீரர் டிங் லாரனை வென்று உலக சாம்பியன் பட்டத்தை இந்திய வீரர் குகேஷ் பெற்றார். இதன்மூலம் 18 வயதில் உலக செஸ் சாம்பியன் பெற்ற இளம் வீரர் என்ற பெருமையையும் அவர் பெற்றுள்ளார்.
இதையடுத்து, பிரதமர் மோடி, தமிழ்நாடு முதல்வர் மு.க.ஸ்டாலின் உள்ளிட்ட முக்கிய பிரமுகர்கள் பலரும் தமிழ்நாட்டைச் சேர்ந்த குகேஷ்க்கு வாழ்த்துக்களை தெரிவித்திருந்தனர். மேலும், குகேஷுக்கு ரூ.5 கோடி ரொக்கப் பரிசு வழங்கப்படும் என்று தமிழ்நாடு முதலமைச்சர் அறிவித்திருந்தார்.
இந்த நிலையில், தமிழக அரசின் சார்பில் சென்னை கலைவாணர் அரங்கில் குகேஷுக்கு நேற்று பாராட்டு விழா நடைபெற்றது. கிராண்ட் மாஸ்டர் விஸ்வநாதன் ஆனந்த், துணை முதலமைச்சர் உதயநிதி ஸ்டாலின் உள்ளிட்டோரும் இந்நிகழ்ச்சியில் கலந்து கொண்டுள்ளனர்.
