லக்னோ: ஐபிஎல் தொடரின் 54வது போட்டி இன்று லக்னோ எக்னா கிரிக்கெட் மைதானத்தில் நடைபெற்று வருகிறது. இந்தப் போட்டியில் லக்னோ சூப்பர் ஜெயண்ட்ஸ் அணியும், கொல்கத்தா நைட் ரைடர்ஸ் அணியும் மோதி வருகின்றன.
இதில் டாஸ் வென்ற லக்னோ சூப்பர் ஜெயண்ட்ஸ் அணியின் கேப்டன் கே.எல்.ராகுல் பந்து வீச்சை தேர்வு செய்தார். அதன்படி முதலில் கொல்கத்தா நைட் ரைடர்ஸ் அணி பேட்டிங் செய்தது. தொடக்க வீரர்களான பிலிப் சால்ட் மற்றும் சுனில் நரைன் நல்ல தொடக்கத்தையே கொல்கத்தா அணிக்கு கொடுத்தனர்.
சிறப்பாக விளையாடி வந்த கூட்டணி, நவின்-உல்-அக் பந்து வீச்சில் பிரிந்தது. பிலிப் சால்ட் 32 ரன்களில் ஆட்டமிழந்தார். அதன்பின் ரகுவன்சி - நரைனுடன் கைக்கோர்க்க, கொல்கத்தா அணிக்கு ரன்கள் எகிறியது. ரகுவன்சி சிங்கிள் எடுத்து, அவ்வப்போது பவுண்டரிகள் அடிக்க, மறுபக்கம் நரைன் அதிரடியாக விளையாடினார்.
ஒரு கட்டத்தில் சுனில் நரைன் 81 ரன்களில் ஆட்டமிழக்க, அதனைத் தொடர்ந்து ரசல் 12, ரகுவன்சி 32, ரிங்கு சிங் 16, ஷ்ரேயாஸ் ஐயர் 23 ரன்கள் என அடுத்தடுத்து ஆட்டமிழந்தனர். இருப்பினும், 20 ஓவர்கள் முடிவில் கொல்கத்தா நைட் ரைடரஸ் அணி 6 விக்கெட்கள் இழப்பிற்கு 235 ரன்கள் குவித்தது.
லக்னோ அணி சார்பில் அதிகபட்சமாக நவின்-உல்-அக் 3 விக்கெட்களை வீழ்த்தினார். இந்த நிலையில், லக்னோ சூப்பர் ஜெயண்ட்ஸ் அணி 236 ரன்கள் எடுத்தால் வெற்றி என்ற இலக்குடன் விளையாடி வருகிறது.
இதையும் படிங்க: பஞ்சாப்பை பந்தாடிய சென்னை அணி! ரவீந்திர ஜடேஜா அபார ஆட்டம்! - IPL2024 CSK VsPBKS Match Highlights
