ஐதராபாத்: 2024ஆம் ஆண்டு தொடங்கியது முதலே இந்திய கிரிக்கெட் அணி தொடர்ந்து பிஸியாக இருந்து வருகிறது. ஆப்கானிஸ்தான் அணிக்கு எதிரான டி20 தொடருடன் ஆண்டை தொடங்கிய இந்திய அணி அதன்பின் ஜனவரி - மார்ச் மாதத்தில் இங்கிலாந்து அணிக்கு எதிரான 5 போட்டிகள் கொண்ட டெஸ்ட் தொடரில் விளையாடியது.
டெஸ்ட் கிரிக்கெட் நிறைவடைந்த அடுத்த சில நாட்களில் ஐபிஎல் போட்டிகள் தொடங்கியதால் இந்திய வீரர்கள் அதில் கலந்து கொண்டு விளையாடினர். ஐபிஎல் முடிந்த 5 நாட்களில் டி20 உலக கோப்பை கிரிக்கெட் தொடர் தொடங்கியது. அமெரிக்கா மற்றும் மேற்கு இந்திய தீவுகளில் இந்த ஆண்டு நடைபெற்ற 20 ஓவர் உலக கோப்பை தொடரில் இந்தியா கலந்து கொண்டது.
— follow @rushiii_12 (@middle451817) August 16, 2024
கலந்து கொண்டது மட்டுமின்றி இறுதிப் போட்டியில் தென் ஆப்பிரிக்கா அணியை வீழ்த்தி ஏறத்தாழ 23 ஆண்டுகளுக்கு பின்னர் மீண்டும் 20 ஓவர் உலக கோப்பையை இந்தியா வென்று வரலாறு படைத்தது. டி20 உலக கோப்பை முடிந்த கையோடு சுப்மான் கில் தலைமையிலான இந்திய இளம் படை ஜிம்பாப்வே கிளம்பிச் சென்று 20 ஓவர் போட்டிகளில் விளையாடின.
தொடர்ச்சியாக கடந்த மாதம் இலங்கை சுற்றுப்பயணம் மேற்கொண்டு தலா மூன்று போட்டிகள் கொண்ட ஒருநாள் மற்றும் டி20 கிரிக்கெட் தொடரில் இந்திய வீரர்கள் பங்கேற்றனர். இப்படி ஆண்டு தொடங்கியது முதல் தொடர்ந்து பிஸியாக இருந்து வரும் இந்திய வீரர்கள் இலங்கை தொடருக்கு பின்னர் சற்று ஓய்வில் உள்ளனர்.
விராட் கோலி லண்டன் பறந்த நிலையில், நட்சத்திர வீரர் ஹர்திக் பாண்டியா கிரீஸ் சுற்றுப்பயணம் மேற்கொண்டுள்ளார். இப்படி சீனியர் வீரர்கள் தற்போது விடுமுறையை குதூகலமாக கொண்டாடி வருகின்றனர். இந்நிலையில், இந்திய அணியின் கேப்டன் ரோகித் சர்மா மும்பை சாலையில் லம்போர்கினி காரில் சீறிப் பாய்ந்து செல்லும் வீடியோ தற்போது சமூக வலைதளத்தில் வெளியாகி வேகமாக பரவி வருகிறது.
0264 என்ற நம்பர் பிளேட் பொருத்திய சொகுசு காரில் செல்லும் ரோகித் சர்மாவை சுற்றி நின்று கொண்டு ரசிகர்கள் வீடியோ எடுக்கின்றனர். தற்போது இந்த வீடியோ சமூக வலைதளத்தில் வேகமாக பரவி வருகிறது.
அதென்ன 0264 நம்பர் பிளேட்:
ரோகித் சர்மா காரின் நம்பர் பிளேட்டில் உள்ள 0264 என்ற எண்களுக்கு அர்த்தம் தெரியுமா?. 2014ஆம் ஆண்டு இலங்கை அணிக்கு எதிரான ஒருநாள் கிரிக்கெட் போட்டியில் அபாரமாக விளையாடிய ரோகித் சர்மா 173 பந்துகளில் 264 ரன்கள் அடித்து நொறுக்கினார். அதை நினைவு கூறும் வகையில் தனது லம்போர்கினி காரின் நம்பர் பிளேட்டில் 0264 என்ற எண்களை அவர் வைத்திருப்பதாக தெரிவிக்கப்பட்டுள்ளது.
2014ஆம் ஆண்டு இலங்கை அணிக்கு எதிரான ஆட்டத்தில் தொடக்கம் முதலே அதிரடியாக விளையாடிய ரோகித் சர்மா 264 ரன்களை குவித்தார். இதுதான் சர்வதேச ஒருநாள் கிரிக்கெட் போட்டியில் தனிநபர் அதிகபட்சம் ரன் என்பது குறிப்பிடத்தக்கது. அந்த ஆட்டத்தில் ரோகித் சர்மாவின் உதவியுடன் இந்திய அணி 5 விக்கெட் இழப்புக்கு 404 ரன்களை குவித்தது. இறுதியில் இந்தியா 153 ரன்கள் வித்தியாசத்தில் வெற்றி பெற்றது குறிப்பிடத்தக்கது.
இதையும் படிங்க: இந்த முறை 25 பதக்கம்! பாரீஸ் புறப்பட்ட இந்திய பாராலிமிபிக் அணி! எந்தெந்த போட்டிகளில் பதக்க வாய்ப்பு? - Paris Paralympics 2024
