செயின்ட் வின்சென்ட்: செயின்ட் வின்சென்ட் நகரில் டி20 உலகக்கோப்பை சூப்பர் 8 சுற்று போட்டியில் வங்கதேசம், ஆப்கானிஸ்தான் அணிகள் விளையாடின. இரு அணிகளும் அரையிறுதிப் போட்டிக்கு தகுதி பெற கட்டாய வெற்றியை நோக்கி களமிறங்கியது. டாஸ் வென்ற ஆப்கானிஸ்தான் பவுலிங்கை தேர்வு செய்தது.
இதன்படி, முதலில் பேட்டிங் செய்த ஆப்கானிஸ்தான் அணி 20 ஓவர்களில் 5 விக்கெட் இழப்புக்கு 115 ரன்கள் மட்டுமே அடித்தது. இருப்பினும், தன் அசாத்தியமான பந்து வீச்சால் முழு மனதுடன் போராடி வங்கதேச அணியை 105 ரன்களுக்கு ஆல் அவுட் செய்தது. இதன்மூலம், ஆப்கானிஸ்தான் அணி 8 ரன்கள் வித்தியாசத்தில் வென்று முதல் முறையாக அரையிறுதிக்கு தகுதி பெற்று சாதனை படைத்துள்ளது. இந்நிலையில், தங்கள் அணியின் செயல்பாடு குறித்து ஆப்கானிஸ்தான் அணி கேப்டன் ரஷித் கான் பேசியுள்ளார்.
அதில், "எங்களுக்கு அரையிறுதியில் விளையாடுவது என்பது கனவு போன்றதாக உள்ளதாக தெரிவித்தார். இந்த தொடரை நாங்கள் தொடங்கிய விதம் தான் இது அனைத்துக்கும் காரணம் எனவும், நியூசிலாந்து அணியுடனான போட்டியில் நாங்கள் வென்ற போது எங்களுக்கு நம்பிக்கை கிடைத்ததாக கூறினார்.
மேலும், இது குறித்து பேச எனக்கு வார்த்தைகளே இல்லை எனவும், இந்த சாதனையை எண்ணி எங்கள் நாட்டில் உள்ள மக்கள் அனைவரும் நிச்சயம் மகிழ்ச்சியில் இருப்பார்கள் எனவும் தெரிவித்தார். எங்கள் அணி அரையிறுதிக்கு முன்னேறும் என தெரிவித்த ஒரே நபர் பிரைன் லாரா ஒருவர் மட்டும்தான் எனவும், இந்த தொடர் தொடங்குவதற்கு முன்பு அவர் சொல்லை நாங்கள் நிச்சயம் காப்போம் என உறுதி அளித்ததாக தெரிவித்தார். இதனால் எங்கள் அணியை எண்ணி பெருமை கொள்வதாக கூறினார்.
