வாஷிங்டன்: அமெரிக்க துணை அதிபர் கமலா ஹாரிஸ், அந்நாட்டு அதிபர் தேர்தலில் ஜனநாயக கட்சியின் வேட்பாளராக போட்டியிட தேவையான கட்சி பிரதிநிதிகளின் ஆதரவை பெற்று இருப்பதாக தகவல் வெளியாகி உள்ளது. கட்சியில் நடந்த முதல் வாக்கெடுப்பில், அதிபர் வேட்பாளராக தேர்ந்தெடுக்கப்படுவதற்கு தேவையான ஆயிரத்து 976 பிரதிநிதிகளின் ஆதரவை கமலா ஹாரீஸ் பெற்றதாக சொல்லப்படுகிறது.
நவம்பர் மாதம் நடைபெற உள்ள அதிபர் தேர்தலில் குடியரசுக் கட்சி சார்பில் வேட்பாளராக டொனால்டு ட்ரம்ப் களம் காணுகிறார். அவருக்கு எதிராக ஜனநாயக கட்சி சார்பில் அதிபர் ஜோ பைடன் களம் இறங்குவார் என எதிர்பார்க்கப்பட்டது. அதேநேரம் டிரம்ப்புடன் ஒப்பிடுகையில் பைடனின் செல்வாக்கு சரிந்து வந்த நிலையில் கட்சி வட்டாரங்கள் மற்றும் கட்சிக்குள்ளேயே கடும் எதிர்ப்பு கிளம்பியது.
கடும் எதிர்ப்பினைத் தொடர்ந்து அதிபர் தேர்தல் போட்டியில் இருந்து விலகுவதாக பைடன் அறிவித்தார். இதனைத் தொடர்ந்து ஜனநாயக கட்சியின் வேட்பாளராக துணை அதிபர் கமலா ஹாரிஸ் அறிவிக்கப்பட வாய்ப்பு அதிகரித்தது. அதிபர் ஜோ பைடன் தனது ஆதரவை கமலா ஹாரிஸுக்கு தெரிவித்த பின் கூடுதல் ஆதரவுகள் கிடைக்கத் தொடங்கின.
அமெரிக்காவின் விஸ்கான்சின் தொகுதியில் கமலா ஹாரிஸ் போட்டியிடுகிறார். கடந்த சில மாதங்களாக அதிபர் பைடன் தேர்தல் பிரச்சாரத்துக்காக நிதி திரட்டி வந்தார். ஆனால் நன்கொடையாளர்கள் தாராளமாக நிதி வழங்காத நிலையில், அதிபர் தேர்தல் போட்டியில் இருந்து அவர் விலகிய நிலையில், கமலா ஹாரிஸ் தேர்தல் நிதி திரட்டும் பணியைத் தொடங்கினார்.
முதல் 7 மணி நேரத்தில் மட்டும் கமலாவுக்கு இந்திய மதிப்பில் 400 கோடி ரூபாய்க்கு மேல் நன்கொடை குவிந்ததாக கூறப்படுகிறது. மிக குறுகிய நேரத்தில் அதிக அளவில் நன்கொடை குவிந்து இருப்பதாகவும் இதன் மூலம் ஜனநாயக கட்சி உறுப்பினர்களுக்கு புது நம்பிக்கை பிறந்து இருப்பதாகவும் சொல்லப்படுகிறது.
அமெரிக்க அதிபர் தேர்தலுக்கு இன்னும் 100 நாட்களே உள்ள நிலையில், அடுத்தடுத்த நாட்களில் ஜனநாயக கட்சியின் வேட்பாளராக கமலா ஹாரீஸ் அறிவிக்கப்படுவார் என எதிர்பார்க்கப்படுகிறது. பைடனை தவிர்த்து மேலும் சில தலைவர்களும் கலமா ஹாரீஸ்க்கு தங்களது ஆதரவை தெரிவித்து உள்ளனர்.
இதையும் படிங்க: மீண்டும் கனடா பாப்ஸ் கோயில் சேதம்.. சட்டத்துறை நடவடிக்கை எடுக்க வலியுறுத்தல்! - BAPS Swaminarayan Mandir vandalised
