தீபத் திருநாளான தீபாவளிக்கு பட்டாசுகளை வெடிக்க ஆர்வமாக இருக்கிறீர்களா? சில வழிகாட்டுதல்களை நினைவில் வைத்துக்கொள்வதன் மூலம் பட்டாசுகளால் ஏற்படும் அசம்பாவிதங்களை நம்மால் தடுக்க முடியும். அதனை நினைவில் வைத்துக்கொண்டு பட்டாசுகளை கையாழுங்கள்..
என்ன செய்ய வேண்டும்?:
- பட்டாசுகளை வெடிக்கும் போது எப்பொழுதும் திறந்தவெளியைத் தேர்ந்தெடுக்க வேண்டும். அப்பகுதியில் எளிதில் தீப்பற்றக்கூடிய பொருட்கள் எதுவும் இல்லை என்பதை உறுதி செய்த பின்னரே பட்டாசுகளை வெடிக்க தொடங்க வேண்டும்.
- வீட்டில் பட்டாசுகளை வைக்கும் இடத்தில் எளிதில் தீப்பற்றக்கூடிய எந்த பொருளும் இருக்கக்கூடாது.
- கால்களில் காலணிகளை கட்டாயம் அணிந்திருக்க வேண்டும்
- பட்டாசு வெடிக்கும் போது உங்கள் ஆடையில் அதிக கவனம் செலுத்த வேண்டும். நீளமாகவும் தொளதொளப்பாகவும் இருக்கும் ஆடைகளை அணிந்து கொண்டு பட்டாசுகளை வெடிக்கக் கூடாது. அதற்கு பதிலாக, பருத்தி ஆடைகளை அணிய வேண்டும்.
- பெற்றோர்கள் அல்லது பெரியவர்களின் கண்காணிப்பில் மட்டும் தான் குழந்தைகள் பட்டாசுகளை வெடிக்க வேண்டும்
- ஆஸ்துமா மற்றும் நுரையீரல் பிரச்சனை உள்ள நபர்கள் பட்டாசு வெடிக்கும் இடங்களில் இருக்க கூடாது. குறிப்பாக, சுவாச பிரச்சனை உள்ள குழந்தைகள் வீட்டிற்குள் இருப்பதை உறுதிப்படுத்துங்கள்
- தண்ணீர் நிறைந்த வாளியை பட்டாசு வெடிக்கும் இடத்திற்கு அருகில் வைக்க வேண்டும். இதனால், தீ விபத்து போன்றவை ஏற்பட்டாலும் வேகமாக செயல்பட்டு அணைக்கலாம்.
- பட்டாசுகளை வெடித்த பின்னர், தண்ணீர் நிறைந்த வாளியில் போட்டு விடுவதால் தேவையற்ற தீ காயங்களை தவிர்க்கலாம்
- பட்டாசுகளை வெடித்து முடித்த பின்னர் கண்டிப்பாக சோப்பை பயன்படுத்தி கைகளை நன்றாக கழுவ வேண்டும்
- பட்டாசுகளை பட்டாசு விற்க உரிமம் பெற்றவர்களிடம் இருந்து மட்டுமே வாங்க வேண்டும்
என்ன செய்யக்கூடாது?:
- கையில் பட்டாசுகளை கொளுத்தி தூக்கி எறிவது போன்ற வேடிக்கை விளையாட்டில் ஈடுபடக் கூடாது
- மின்சார ஒயர்கள், கம்பங்கள் மற்றும் மரங்கள் இருக்கும் இடங்களுக்கு கீழே பட்டாசுகளை வெடிக்க கூடாது
- வாகனங்களுக்கு உள்ளே பட்டாசுகளை வெடிக்க வைக்க முயற்சி செய்ய கூடாது
- பட்டாசுகளை வெடிக்கும் பொழுது நைலான், சில்க் போன்ற துணிகளை அணியக்கூடாது
- சானிடைஷர் எளிதாக தீப்பற்ற கூடிய பொருள் என்பதால் பட்டாசு வெடிக்கும் போது அதை அருகில் வைக்க கூடாது
- தெருநாய்கள் மீது பட்டாசுகளை தூக்கி வீசக்கூடாது.
- தீப்பட்டி, லைட்டர் போன்றவற்றை தவிர்த்து பட்டாசுகளை வெடிக்க நீளமான அகர்பத்தியை பயன்படுத்த வேண்டும்
- உபயோகப்படுத்தப்படாத பட்டாசுகளை விளக்குகள், மெழுகுவர்த்தி போன்ற பொருள்களுக்கு அருகில் வைக்கக்கூடாது
- வெடிக்கும் பொழுது தீக்காயம் ஏற்பட்டால் மருத்துவரின் ஆலோசனை இல்லாமல் களிம்பு, மருந்துகளை தடவக்கூடாது.
- பட்டாசு வெடிப்பதை செல்பி எடுக்காதீர்கள்
பட்டாசுகளை வெடிக்கும் போது, மேலே கொடுக்கப்பட்டுள்ள வழிமுறைகளை பின்பற்றி மகிழ்ச்சியுடனும் பாதுகாப்புடனும் தீபாவளியை கொண்டாடுங்கள்.
இதையும் படிங்க: பாரம்பரிய பொருட்களில் கிஃப்ட்.. மதி அங்காடியின் அசத்தல் பேக்கேஜ்! தீபாவளி எண்ணெய் குளியல்..காய்ச்சும் முறையும் பயன்படுத்தும் முறையும் இப்படி தான்! |
- ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
