நாம் தினமும் உண்ணும் உணவுகள் நமது ஆரோக்கியத்தை வடிவமைப்பதில் முக்கிய பங்கு வகிக்கிறது. சில உணவுகள் நமக்கு ஊட்டமளித்து பலப்படுத்தினாலும், மற்றவை காலப்போக்கில், நம் உடலுக்கு தீங்கு விளைவிக்கும். மோசமான உணவுத் தேர்வுகள் நாள்பட்ட நோய்களின் அபாயத்தை அதிகரிப்பது, முக்கிய உடல் செயல்பாடுகளை சீர்குலைப்பது, சில சமயங்களில் நமது ஆயுட்காலத்தை குறைக்கும் அபாயத்தையும் ஏற்படுத்தும். அந்த வகையில், நமது ஆயுட் காலத்தை குறைக்கும் உணவுகள் என்ன என்பதை தெரிந்து கொள்ளலாம் வாங்க..
பதப்படுத்தப்பட்ட இறைச்சிகள்: பதப்படுத்தப்பட்ட இறைச்சிகள், சிக்கன் சாசேஜ்களில் (Sausages) செய்யப்பட்ட வகைவகையான உணவுகள் உண்பதற்கு ருசியாக இருந்தாலும், உடலில் பல பிரச்சனைகளை ஏற்படுத்தும். புற்றுநோயின் அபாயத்தை குறிப்பாக, குடல் புற்றுநோயின் அபாயத்தை அதிகரிக்கும் நைட்ரேட்டுகள் மற்றும் நைட்ரைட்டுகளால் இறைச்சிகள் பதப்படுத்தப்படுகிறது என்றால் நம்ப முடிகிறதா?
2010ல் NCBI நடத்தில் ஒரு ஆய்வில், சிவப்பு மற்றும் பதப்படுத்தப்பட்ட இறைச்சியை உட்கொள்வது, இறப்பு விகிதம், புற்றுநோய் ஆபத்து மற்றும் இதய நோய்களின் அபாயத்துடன் தொடர்புடையது என கூறுகிறது. இந்த இறைச்சிகளில் நிறைவுற்ற கொழுப்புகள் (Saturated fats) மற்றும் சோடியம் அதிகமாக உள்ளது, இது இதய நோய் மற்றும் உயர் இரத்த அழுத்தத்தை அதிகரிக்கிறது.
குளிர்பானங்கள்: சர்க்கரை அளவு அதிகமாக உள்ள பானங்கள் அனைத்தும் உடலில் பிரச்சனைகளை மட்டுமே ஏற்படுத்தும் என கூறப்படுகிறது. அதிகப்படியான சர்க்கரை நுகர்வு எடை அதிகரிப்பு, இன்சுலின் எதிர்ப்பு, மற்றும் டைப் 2 நீரிழிவு, இதய நோய் மற்றும் கல்லீரல் பிரச்சனைகள் அதிகரிக்கும் அபாயத்திற்கு வழிவகுக்கிறது.
2021ல் நேஷ்னல் லைப்ரரி ஆஃப் மெடிசன் இதழில் வெளியிடப்பட்ட ஆய்வில், இருதய நோய்கள், நீரிழிவு மற்றும் உடல் பருமன் போன்ற பிரச்சனைகளால், ஒவ்வொரு ஆண்டும் உலகளவில் 1,84,000 இறப்புகள் ஏற்படுவதாகவும் இதற்கு சர்க்கரை பானங்கள் தான் காரணம் என்கிறது. உங்கள் உடலை நீரேற்றமாகவும் ஆரோக்கியமாகவும் வைத்திருக்க தண்ணீர், மூலிகை தேநீர் அல்லது இயற்கையான இனிப்பு பானங்களான இளநீர் போன்றவற்றை எடுத்துக்கொள்ள பரிந்துரைக்கப்படுகிறது.
பிரட், அரிசி: நமது அனைவரது வீடுகளிலும் பிரதானமான உணவாக இருக்கும் அரிசி, பிரட், பாஸ்தா போன்ற உணவுகள் நன்கு சுத்திகரிக்கப்பட்டு ஊட்டச்சத்துக்கள் இன்றி இருக்கிறது. இவை, தயார் செய்யப்படும் தானியங்கள் நன்கு சுத்திகரிக்கப்படுவதால், அதிலுள்ள நார்ச்சத்து, வைட்டமின்கள் மற்றும் தாதுக்கள் போன்ற அத்தியாவசிய ஊட்டச்சத்துக்கள் நீக்கப்படுகின்றன.
இந்த ஊட்டச்சத்து குறைபாடு காலப்போக்கில் டைப் 2 நீரிழிவு மற்றும் உடல் பருமன் ஏற்படும் அபாயத்தை அதிகரிக்கிறது. கவுனி, குதிரைவாலி போன்ற அரிசிகள், கினோவா மற்றும் முழு கோதுமை ரொட்டி போன்ற முழு தானியங்களைத் தேர்ந்தெடுப்பது நீண்ட கால நல்வாழ்வுக்கான ஆரோக்கியமான தேர்வாகும்.
வறுத்த/பொரித்த உணவுகள்: சிக்கன் 65, பிரஞ்சு பிரஸ் தொடங்கி வீட்டில் செய்யப்படும் பஜ்ஜி, பக்கோடா வரை அனைத்து உடலுக்கு தீங்கு விளைவிக்கும். உணவங்களில் வழங்கப்படும் வறுத்த உணவுகள் பெரும்பாலும் டிரான்ஸ் கொழுப்புகள் அதிகம் உள்ள எண்ணெய்களில் சமைக்கப்படுகின்றன, அவை கெட்ட கொழுப்பின் (எல்டிஎல்) அளவை உயர்த்தி நல்ல கொழுப்பை (எச்டிஎல்) குறைப்பதாக கண்டறியப்பட்டுள்ளது.
இது இதய நோய் மற்றும் பக்கவாதம் ஏற்படும் அபாயத்தை அதிகரிக்கிறது. வறுத்த உணவுகளை வழக்கமாக உட்கொள்வது, குறிப்பாக பெண்களில், ஆரம்பகால மரணத்தின் அதிக ஆபத்துடன் தொடர்புடையது என்று 2019ம் ஆண்டு பிரிட்டிஸ் மெடிக்கல் ஜெர்னலில் (theBMJ) நடத்தப்பட்ட ஆய்வில் தெரியவந்துள்ளது. வறுத்த மற்றும் பொரித்த உணவுகளில் கலோரிகள் அதிகமாக இருப்பதால் உடல் எடை அதிகரிக்கும்.
சிப்ஸ் பாக்கெட் மற்றும் ஸ்நாக்ஸ்கள்: உருளைக்கிழங்கு சிப்ஸ் மற்றும் பாக்கெட் தின்பண்டங்கள் மிகவும் பதப்படுத்தப்பட்டு ஆரோக்கியமற்ற சேர்க்கைகள், உப்பு ஆகியவற்றால் நிறைந்துள்ளது. அதிக சோடியம் உட்கொள்வது உயர் இரத்த அழுத்தம், சிறுநீரக பிரச்சினைகள் மற்றும் பக்கவாதம் அதிகரிக்கும் அபாயத்திற்கு வழிவகுக்கும். இந்த தின்பண்டங்களை உண்பதற்கு பதிலாக, நட்ஸ்கள், விதைகள் அல்லது பழங்கள் போன்றவற்றை எடுத்துக்கொள்ள பரிந்துரைக்கப்படுகிறது.
இதையும் படிங்க: உப்பு அதிகம் உட்கொண்டால் ஆயுட்காலம் குறையுமா? சொல்லவே இல்ல.!
பொறுப்புத் துறப்பு: இங்கு, உங்களுக்கு வழங்கப்படும் அனைத்து தகவல்களும், பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை நாங்கள் வழங்குகிறோம். இவற்றைப் பின்பற்றும் முன் உங்கள் தனிப்பட்ட மருத்துவரின் ஆலோசனையைப் பெறுவது நல்லது என்பதை குறிப்பிடுகிறோம்.
