சென்னை: சென்னை நுங்கம்பாக்கம் லேக் ஏரியா ஆறாவது தெருவில் உள்ள ஃபஷீலத்துல் ஜமீலா என்பவருக்குச் சொந்தமான வீட்டை, கடந்த 2021ஆம் ஆண்டு ஏப்ரல் மாதம் முதல் வாடகைக்கு எடுத்து இசையமைப்பாளர் யுவன் சங்கர் ராஜா ஸ்டூடியோவாக பயன்படுத்தி வந்துள்ளார். அந்த வீட்டிற்கு மாத வாடகை ஒரு லட்சத்து 25 ஆயிரம் மற்றும் வைப்புத் தொகை 12 லட்சம் என அக்ரிமெண்ட் போடப்பட்டுள்ளதாக தெரிகிறது.
இந்நிலையில், கடந்த 2023ஆம் ஆண்டு பிப்ரவரி மாதம் முதல் மாத வாடகை ஒரு லட்சத்து 50 ஆயிரம் ரூபாயாக அதிகரிக்கப்பட்டுள்ளது. இதனைத் தொடர்ந்து, கடந்த 2022ஆம் ஆண்டு செப்டம்பர் மாதம் முதல் 2023ஆம் ஆண்டு வரை 18 லட்சம் வாடகை பணத்தைச் செலுத்தாமல் அலைக்கழித்ததாகக் கூறி, இசையமைப்பாளர் யுவன் சங்கர் ராஜாவுக்கு வீட்டின் உரிமையாளர் வக்கீல் நோட்டீஸ் ஒன்று அனுப்பி உள்ளார்.
இதையடுத்து, யுவன் சங்கர் ராஜா மொத்த வாடகையான 18 லட்சம் ரூபாய்க்கு ,12 லட்சம் ரூபாய் மட்டும் காசோலையாக வீட்டின் உரிமையாளரிடம் கொடுத்ததாகக் கூறப்படுகிறது. மீதமுள்ள ஆறு லட்சம் மற்றும் கடந்த ஆண்டு நவம்பர் மாதம் முதல் தற்போது வரை 20 லட்சத்திற்கும் மேலான வாடகை பணத்தை கொடுக்காமல் யுவன் சங்கர் ராஜா காலம் தாழ்த்தி வருவதாக வீட்டின் உரிமையாளர் தரப்பில் குற்றச்சாட்டும் முன் வைக்கப்பட்டது.
இந்நிலையில், வீட்டு வாடகை பணம் கொடுப்பது குறித்து சரியான பதில் அளிக்காததால் வீட்டின் உரிமையாளர் திருவல்லிக்கேணி துணை ஆணையர் அலுவலகத்தில் யுவன் சங்கர் ராஜா மீது புகார் அளித்துள்ளார். இந்த புகாரின் அடிப்படையில் போலீசார் விசாரணை நடத்தி வருகின்றனர்.
இந்த விவகாரம் தொடர்பாக யுவன் சங்கர் ராஜா தனது வழக்கறிஞர் மூலமாக வீட்டின் உரிமையாளருக்கு நோட்டீஸ் ஒன்று அனுப்பி உள்ளார். அதில், என் மீது வீட்டின் உரிமையாளர் தொடர்ச்சியாக அவதூறு பரப்பி வருகிறார். இதற்கு அவர் ரூ.5 கோடி நஷ்ட ஈடு கொடுக்க வேண்டும் எனவும், மேலும் இது சிவில் சம்பந்தமான பிரச்னை என்பதால் கிரிமினல் வழக்காகக் கொண்டு செல்லப்படும் என குறிப்பிட்டுள்ளார்.
மேலும், என் மீது அவதூறு கருத்துக்களை தெரிவித்து, என்னை மிகுந்த மன உளைச்சலுக்கு உள்ளாக்கியதால், என் மீது அவதூறு கருத்துக்கள் பரப்பியவர்கள் மீது தகுந்த நடவடிக்கை எடுக்கப்படும் என நோட்டீஸில் குறிப்பிட்டுள்ளார். இதனைத் தொடர்ந்து, இருவர் தரப்பிலும் போலீசார் விசாரணை நடத்தி வருவதாக கூறப்படுகிறது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க: பிரபல நடிகர் மோகன்லால் மருத்துவமனையில் அனுமதி! - Mohanlal Hospitalised
